O loo iai pea Iesu a lē o se aai i Samaria po o Kalilaia. Ua fesili atu nei le ʻau Faresaio iā te ia po o afea e oo mai ai le Malo. O loo latou faatalitalia o le a oo mai le Malo i se auala iloga, lea e faia ai ni sauniga tetele ma mamalu. Peitaʻi ua fetalai atu Iesu: “E lē oo mai le malo o le Atua i se auala mataʻina. E lē faapea ane tagata, ʻVaai o loo i inei!’ pe ʻO loo i ilā!’ Auā faauta, o loo i lo outou lotolotoi le malo o le Atua.”—Luka 17:20, 21.

E ono manatu nisi o loo uiga atu le fetalaiga a Iesu e faapea, o loo pule le Malo i totonu o loto o auauna a le Atua. Peitaʻi e lē o le tulaga lenā, auā e lē o iai le Malo i loto o le ʻau Faresaio o loo talanoa atu i ai Iesu. Nai lo o lea, o loo i lo latou lotolotoi le Malo, auā o loo latou iai faatasi i lea taimi ma Iesu le Tupu tofia o le Malo o le Atua.—Mataio 21:5.

Atonu ina ua ō ese le ʻau Faresaio, ona toe avatu lea e Iesu o nisi faamatalaga i ona soo e faatatau i le oo mai o le Malo. E tusa ai o lona faatasi mai i le mana o le Malo, ua lapataʻi atu Iesu: “E oo mai aso o le a outou mananaʻo ai e fia vāai i se aso se tasi o le Atalii o le tagata, ae e tou te lē vāai i ai.” (Luka 17:22) Ua faailoa atu e Iesu o le a pule le Atalii o le tagata i le Malo i le lumanaʻi. Ae a o leʻi oo i lenā taimi, atonu o le a matuā saʻili e nisi o ona soo le Malo. Peitaʻi e tatau ona latou faatalitali pea, seʻia oo i le taimi atofaina a le Atua e afio mai ai le Atalii o le tagata.

Ua toe faaauau le fetalaiga a Iesu: “O le a fai atu tagata iā te outou, ʻVaai ua i ilā!’ pe ʻVaai ua i inei!’ Aua tou te ō atu i ai pe mulimuli atu iā i latou. Auā e pei ona emo mai o le uila, ma susulu atu mai i le tasi itulagi i le isi itulagi, e faapena foʻi le Atalii o le tagata.” (Luka 17:23, 24) O le a faapefea ona puipuia soo o Iesu mai i le mulimuli atu i mesia pepelo? Ua faapea atu Iesu, o le a pei le afio mai o le Mesia moni o le emo o le uila, lea e mafai ona iloa atu mai i se mea mamao. O lea, o le a oo ina iloa lelei e i latou o loo mataala, faamaoniga o lona faatasi mai i le mana o le Malo.

Ona faia lea e Iesu o ni faatusatusaga ma mea na tutupu anamua, e faaalia ai uiga o tagata i le taimi o lona faatasi mai i le lumanaʻi: ʻE pei o aso o Noa, o le a faapena foʻi aso o le Atalii o le tagata. E pei foʻi ona faia i aso o Lota: na latou aai, na latou feinu, na faatau mai ma faatau atu, na latou totō, ma fau fale. A ua oo i le aso na alu ese ai Lota mai i Sotoma, ona totō ifo ai lea o le afi ma le teiō mai i le lagi, ma faaumatia ai i latou uma. E faapena foʻi le aso o le a faaalia mai ai le Atalii o le tagata.’—Luka 17:26-30.

E lē o faapea mai Iesu na faaumatia tagata i aso o Noa ma aso o Lota, ona o a latou gaoioiga masani o le olaga e pei o le aai ma feinu, faatau mai ma faatau atu, totō ma fau fale. E oo lava iā Noa ma Lota ma o la aiga, atonu sa latou faia nisi o na mea. Peitaʻi sa faia e isi tagata na mea i aso uma e aunoa ma le uaʻi atu i le finagalo o le Atua, faapea le vaitaimi na latou ola ai. O lea, o loo apoapoaʻi atu Iesu i ona soo ina ia uaʻi atu i le finagalo o le Atua, ma faia ai so latou sao e lē aunoa. O loo faailoa atu e Iesu le auala e faasaoina ai i latou, pe a aumaia e le Atua le faaumatiaga i le lumanaʻi.

E tatau la i le ʻausoo ona ʻalofia le faalavelavea o i latou i mea o le lalolagi, po o “mea o i tua.” Ua fetalai atu Iesu: “I lenā aso, o lē o i luga o le fale, aua neʻi alu ifo i totonu e ave ni mea o iai, ma o lē o i le fanua, aua neʻi toe foʻi i mea o i tua. Ia outou manatua le avā a Lota.” (Luka 17:31, 32) Sa liu tupua masima o ia.

Ua faaauau le fetalaiga a Iesu i ona soo e faatatau i le tulaga o le a iai pe a pule le Atalii o le tagata o se Tupu: “O lenā pō, e taooto ai [tagata] e toʻalua i le moega e tasi; e avea le tasi, ae tuua le isi.” (Luka 17:34) Ioe, e iai i latou o le a faasaoina, ae e iai foʻi i latou o le a tuua pe faaumatia.

Ua fesili ane ona soo: “Le Alii e, o fea e fai ai?” Ua tali atu Iesu: “O le mea e iai le tino, o le mea foʻi lenā e potopoto i ai aeto.” (Luka 17:37) O lea, e pei i latou o le a avea mo le faaolataga o ni aeto e vāai mamao. O le a faapotopoto atu nei soo i le Keriso moni, le Atalii o le tagata. I lenā taimi i le lumanaʻi, o le a faasoa atu ai e Iesu i ona soo upu moni faasaoola mo ē e faaalia le faatuatua.