Na ave e le ʻaufaitaulaga sili Iesu i le maota o le kovana. Na fesili atu Pilato iā i latou: ʻO le ā le mea ua outou molia ai lenei tagata?’ Na latou tali mai: ʻUa ia faapea mai o ia o se tupu.’ Na fesili atu Pilato iā Iesu: “Po o oe ea o le tupu o tagata Iutaia?” Na tali mai Iesu: “O loʻu malo e lē mai le lalolagi lenei.”

Ona auina atu lea e Pilato o Iesu iā Herota le pule o Kalilaia, pe e maua e Herota se māfuaaga e molia ai Iesu. E leʻi maua e Herota se mea sesē faasaga iā Iesu, o lea na ia toe auina atu ai Iesu iā Pilato. Ona fai atu lea o Pilato i tagata: ʻE leai se mea ua ma maua ma Herota e molia ai lenei tagata. O le a ou faasaʻolotoina o ia.’ Na alalaga atu tagata: ʻIa fasioti iā te ia! Ia fasioti iā te ia!’ Na sasa e fitafita Iesu, tuufeanu iā te ia ma tapō o ia. Na latou tuu se pale tuitui i lona ao ma toē faaʻamuʻamu iā te ia: “Talofa le Tupu o tagata Iutaia!” Na toe fai atu Pilato i le motu o tagata: ʻOu te lē iloa se mea sesē ua faia e lenei tagata.’ Ae na latou alalaga atu: “Ia tutuʻi o ia i luga o le laau!” O lea, na tuuina atu ai loa e Pilato Iesu ina ia fasiotia.

Na latou ave Iesu i se nofoaga e taʻua o Kolokota, ua tutuʻi o ia i luga o le laau ma faatū i luga le laau. Na tatalo Iesu: “Loʻu Tamā e, ia e faamagalo iā i latou, auā ua latou lē iloa le mea ua latou faia.” Na tauemu tagata iā Iesu ma faapea atu: ʻPe afai o oe o le Alo o le Atua, sau i lalo mai i lenā laau. Ia e faaola iā te oe.’

Na faapea atu se tasi o tagata solitulafono sa faatautau i autafa o Iesu: “Ia e manatua mai aʻu pe a e oo i lou malo.” Na folafola atu e Iesu: “O le a ta faatasi ma oe i le Parataiso.” Ina ua oo i le aoauli, ona pogisa ai lea o le nuu atoa mo itula e tolu. Sa tutū e latalata i le laau sa faatautau ai Iesu nisi o le ʻausoo, e aofia ai ma Maria le tinā o Iesu. Na faapea atu Iesu iā Ioane, ia tausi iā Maria e pei o lona lava tinā.

Mulimuli ane, ona fetalai lea o Iesu: “Ua taunuu!” Ua faagaugau lona ao, ona tō ai lea o lana mānava. O le taimi lava lenā na lūlū ai se mafuiʻe malosi. I totonu o le malumalu, sa saeluaina ai le ʻie puipui lea  sa vaeluaina ai le Mea Paia ma le Mea e Sili Ona Paia. Na faapea ane se taʻitaʻiʻau: ʻE moni lava o le Alo lenei o le Atua.’