Ua tele tausaga talu ona faaipoipo Aperaamo ma Sara. Na la tuua lo la fale manaia i Uro, ae nonofo i se faleʻie. Peitaʻi e leʻi tomumu ai Sara, talu ai sa ia iloa o le faia o le mea na faatonuina e Ieova, e mo lo latou lelei.

O le manaʻo tele o Sara i se pepe, na ia fai atu ai iā Aperaamo: ʻPe a fanau mai se pepe a Akara, o le a avea o ia ma aʻu tama.’ Mulimuli ane na maua se tama a Akara, ma o lona igoa o Isamaeli.

I le tele o tausaga mulimuli ane, ina ua 99 tausaga o Aperaamo ae 89 tausaga o Sara, na asiasi atu ai ni tagata se toʻatolu iā i laʻua. Na valaaulia e Aperaamo i latou e mālōlō i lalo o se laau ma fai ai se latou meaʻai. Pe e te iloa po o ai nei tagata na asiasi atu? O i latou o agelu. Na latou fai atu iā Aperaamo: ʻI le taimi faapenei i le tausaga fou, o le a maua ai sa oulua tama.’ O le taimi lenā o loo faalogologo mai Sara i totonu o le faleʻie. Na ʻataʻata o ia ma faapea ane: ʻPe mafai ona ou fanau mai se tama, a o lenei ua ou loomatua?’

I le tausaga na sosoo ai, na fanau ai e Sara se tama tama e pei lava ona sa folafola atu e le agelu a Ieova. Na faaigoa e Aperaamo le tama iā Isaako, o lona uiga o le “ʻAtaʻata.”

 Pe tusa o le lima o tausaga o Isaako, ae vaai atu Sara o loo taufaalili Isamaeli iā Isaako. Na manaʻo Sara e puipui lana tama, o lea na ia talosaga atu ai iā Aperaamo e tuliese Akara ma Isamaeli. I le taimi muamua, e leʻi manaʻo Aperaamo e fai lenā mea. Ae na finagalo foʻi Ieova e puipuia Isaako. O lea na ia faapea atu ai iā Aperaamo: ʻIa faalogo iā Sara. O le a ou tausia Isamaeli. Ae e ala mai iā Isaako, o le a faataunuuina uma ai aʻu folafolaga.’