Ina ua leai ni meaʻai i Isaraelu, ona ō lea o se fafine Isaraelu e igoa iā Naomi ma lana tane ma le la fanau tama e toʻalua i le nuu o Moapi. Mulimuli ane na maliu le tane a Naomi. Na faaipoipo lana fanau tama iā Ruta ma Orepa o ni fafine Moapi. Ae e faanoanoa ina ua mavae sina taimi, na maliliu foʻi le fanau tama a Naomi.

Ina ua faalogo Naomi ua toe tele meaʻai i Isaraelu, na filifili ai loa o ia e toe foʻi i lona nuu. Na latou malaga faatasi ma Ruta ma Orepa. Ae a o latou iai i luga o le ala, na faapea atu Naomi iā i laʻua: ʻNa avea oulua o ni avā lelei i laʻu fanau tama, ma na oulua alolofa foʻi iā te aʻu. Ou te manaʻo ia oulua toe faaipoipo. Ia toe foʻi i Moapi.’ Na tali mai Ruta ma Orepa: ʻE ma te alolofa iā te oe. E ma te lē mananaʻo e ō ae tuu oe.’ Ae na fai atu pea Naomi iā i laʻua e toe foʻi i lo la nuu. Na iʻu ina toe foʻi Orepa ae e leʻi alu Ruta. Na fai atu Naomi iā te ia: ʻUa toe foʻi Orepa i lona nuu ma ona atua. Ia toe foʻi faatasi ma ia, ma e alu i le aiga o lou tinā.’ Ae na tali mai Ruta: ʻOu te lē tuua oe. O lou nuu e fai ma oʻu nuu, ma o lou Atua, o loʻu Atua foʻi lea.’ O le ā sou manatu, o ā ni faalogona o Naomi ina ua fai e Ruta na upu?

Na taunuu Ruta ma Naomi i Isaraelu i le taimi na amata ai ona selesele karite, o se tasi lea o ituaiga o saito. I se tasi aso, na alu Ruta e ao mai karite na totoe i le fanua o se tamāloa e igoa iā Poasa, le tama tama a Raava. Na faalogo Poasa i tala e faatatau iā Ruta e faapea o ia o se tagata Moapi, ma sa nonofo pea ma Naomi ona o lona alofa faamaoni iā te ia. Na faatonu e Poasa lana ʻaufaigaluega e faatotoe pea i le fanua ni nai karite, ina ia alu atu Ruta e ao mai.

 I lenā lava afiafi, na fesili ai Naomi iā Ruta: ʻO le fanua o ai na e galue ai i lenei aso?’ Na tali atu Ruta: ʻO le fanua o le tamāloa e igoa iā Poasa.’ Na faapea mai Naomi iā te ia: ʻE aiga Poasa ma laʻu tane. Ia galue pea i lona fanua faatasi ma isi fafine talavou. E te saogalemu ai i inā.’

Na faaauau pea ona galue Ruta i le fanua o Poasa seʻia oo lava i le taimi na uma ai le seleseleina o karite. Na mātau e Poasa o Ruta o se tagata e galue malosi ma amiolelei. I na aso, pe afai e maliu se tamāloa ae leʻi maua ni ona atalii, ona faaipoipo lea o sona tauaiga i lana avā. O lea na faaipoipo ai Poasa iā Ruta, ma maua se la tama tama e igoa iā Opeta. Mulimuli ane, na avea Opeta ma tamā o le tamā o le tupu o Tavita. Na matuā fiafia uō a Naomi, ma latou faapea atu: ʻMuamua, sa foaʻi atu e Ieova Ruta iā te oe ma na ia tausia lelei oe, ma o lea ua ia fanauina mai ai se tama tama. Ia viia Ieova.’