1, 2. O le ā le fetalaiga a Ieova na faalogo i ai aposetolo o Iesu, ma o le ā le auala na latou tali atu ai?

 O LE ā le auala e te tali atu ai, pe a faatonuina oe e Ieova i se mea e fai? Po o le ā lava le mea e faafinagaloina e Ieova, e mautinoa o le a e naunau e mulimuli i lana taʻitaʻiga.

² E faapena le mea na tupu i aposetolo e toʻatolu o Iesu, o Peteru, Iakopo ma Ioane, ina ua mavae le Paseka i le 32 T.A. (Faitau le Mataio 17:1-5.) A o latou faatasi ma lo latou Matai “i se mauga maualuga,” na latou vāai ai i le faaataga o le mamalu faalelagi o Iesu, i le taimi e avea ai o ia ma Tupu. Na faagaeetia Peteru e faia sona sao i lenei vaaiga mataʻina. A o tautala o ia, na alu ane se ao i o latou luga. Na maua e Peteru, Iakopo ma Ioane se faaeaga e lē laumaua, o le faalogo lea i le siʻufofoga o le Atua. Ina ua uma ona faamautinoa mai e Ieova o Iesu o lona Alo, ona ia fetalai mai lea: “Ia faalogo iā te ia.” Na utagia e le ʻauaposetolo lenā faatonuga mai i le Atua. Na latou faalogo i aʻoaʻoga a Iesu, ma uunaʻia isi e faia faapea.—Galu. 3:19-23; 4:18-20.

3. Aiseā e finagalo ai Ieova e tatou te faalogo i lona Alo, ma o le ā le mataupu e tatau ona tatou iloiloina?

³ O na upu—“Ia faalogo iā te ia”—ua faamauina i le Tusi Paia mo lo tatou lelei. (Roma 15:4) Aiseā? Talu ai o Iesu o le fofoga fetalai a Ieova, ma o ana aʻoaʻoga na faailoa mai ai le finagalo o lona Tamā. (Ioa. 1:1, 14) O le tele lava o taimi, na talanoa ai Iesu e faatatau i le Malo o le Atua, lea e faia aʻe iā te ia ma le 144,000 o le a latou pule faatasi. O lea, e tāua tele ai ona iloiloina totoʻa lenei mataupu. (Faaa. 5:9, 10; 14:1-3; 20:6) Ae muamua, seʻi o tatou iloiloina pe aiseā na talanoa ai Iesu i le tele o taimi e faatatau i le Malo o le Atua.

4. Na faapefea ona faailoa mai e Iesu e tāua iā te ia le Malo?

⁴ Sa tāua iā Iesu le Malo o le Atua. E faapefea ona faamaonia lenā tulaga? O a tatou faamatalaga e iloa ai se mea e matuā tāua iā i tatou. Na fetalai Iesu i le Mataio 12:34, “auā o le tele o mea i le loto e tautala mai ai le gutu.” O le tele lava o taimi na talanoa ai Iesu e faatatau i le Malo o le  Atua. E silia i le 100 taimi o loo taʻua ai le Malo i tusi a Evagelia, ma o le tele o na taimi e faasino atu i fetalaiga a Iesu. Na avea foʻi le Malo ma feʻau autū o lana talaʻiga. Na ia fetalai i le Luka 4:43: “E tatau ona ou folafola atu le tala lelei o le malo o le Atua i isi foʻi aai, auā o le mea lea na auina mai ai aʻu.” Sa faaauau foʻi ona ia talanoa i ona soo e faatatau i le Malo, ina ua mavae lona toetū. (Galu. 1:3) E mautinoa sa tāua iā Iesu le Malo, ma sa uunaʻia ai o ia e talanoa atu i isi e faatatau i lenā mataupu.

5-7. (a) E faapefea ona tatou iloa e tāua iā Ieova le Malo? Faataʻitaʻi. (e) E faapefea ona tatou faailoa atu e tāua iā i tatou le Malo?

⁵ E tāua foʻi le Malo i le finagalo o Ieova. I le ā le itu? Ia manatua, na auina mai e Ieova lona Alo e toʻatasi i le lalolagi, ma o Ia foʻi le puna o fetalaiga ma aʻoaʻoga uma a Iesu. (Ioa. 7:16; 12:49, 50) O Ieova foʻi na faagaeeina mea uma o loo faamauina i tusi a Evagelia, e faatatau i le olaga ma le faiva a Iesu. Seʻi o tatou mafaufau i le uiga o lenā manatu.

⁶ Seʻi faapea o loo e tuufaatasia le tusiata a le tou aiga. E ui e tele ata, ae e lāiti ni ata e mafai ona ofi i le tusiata. O le ā lau gaoioiga e fai? E te filifilia na o ni ata e te manaʻo e tuu i totonu o le tusiata. I se tulaga talitutusa, o tusi a Evagelia ua tai pei o se tusiata ua aumaia ai se ata manino e faatatau iā Iesu. E leʻi faagaeeina e Ieova tusitala o Evagelia e tusia faamatalaga uma e faatatau iā Iesu, a o iai i le lalolagi. (Ioa. 20:30; 21:25) Nai lo o lea, na taʻitaʻia e lona agaga tusitala e tusia fetalaiga ma gaoioiga a Iesu, ina ia tatou malamalama ai i le fuafuaga o lana faiva, ma le mea e sili ona tāua iā Ieova. (2 Timo. 3:16, 17; 2 Pete. 1:21) Talu ai ua faatumulia tusi a Evagelia i aʻoaʻoga a Iesu e faatatau i le Malo, e mafai la ona tatou faapea atu, e tāua le Malo i le finagalo o Ieova. O lona finagalo, ia tatou iloa faamatalaga uma e faatatau i le Malo.

⁷ E tatau ona tatou fesili ifo, ʻPe e tāua iā te aʻu le Malo o le Atua?’ Afai e tāua iā i tatou le Malo, o le a tatou naunau la e faalogo i aʻoaʻoga ma fetalaiga a Iesu e faatatau i le Malo, lea e aofia ai lona tāua, faapea le auala ma le taimi o le a oo mai ai.

8. Na faapefea ona faamatala mai e Iesu le tāua o le Malo?

⁸ I le tatalo faaaʻoaʻo a le Alii, na faamanino mai ai e Iesu le tāua o le Malo, ma mea o le a faataunuuina e lenā Malo. E fitu talosaga o lenā tatalo, ae o uluaʻi talosaga e tolu e fesootaʻi atu i le finagalo o Ieova: Ia faapaia lona suafa, ia oo mai lona Malo, ma ia faia lona finagalo i le lalolagi e pei ona faia i le lagi. (Faitau le Mataio 6:9, 10.) E fesootaʻi na talosaga e tolu. O le Malo faa-Mesia o le meafaigaluega lea  o le a faaaogā e Ieova, e faapaia ai lona suafa ma faataunuu lona finagalo.

9, 10. (a) O ā mea o le a faataunuuina pe a oo mai le Malo o le Atua? (e) O le ā se folafolaga a le Tusi Paia o loo e tulimataʻia lona faataunuuina?

⁹ O ā mea o le a faataunuuina pe a oo mai le Malo o le Atua? Pe a tatou tatalo, “Ia oo mai lou Malo,” o lona uiga o loo tatou talosaga atu ia faia e le Malo ni gaoioiga maʻoti. Pe a oo mai le Malo o le Atua, o le a faaalia lona mana uma i le lalolagi atoa. O le a aveesea e le Malo lenei faiga leaga o mea, e aofia ai pulega faaletagata, ae aumaia le lalolagi fou amiotonu. (Tani. 2:44; 2 Pete. 3:13) Pe a māeʻa lenā, ona pule loa lea o le Malo o le Atua, ma faasolo ina avea le lalolagi atoa ma Parataiso. (Luka 23:43) O le a toe faatutūina mai e le Atua i latou uma o loo ia manatuaina, ma faatasia ma ē pele iā i latou. (Ioa. 5:28, 29) O le a faasolosolo ona maua e tagata usiusitaʻi le tulaga lelei atoatoa, ma maua ai le ola e faavavau. (Faaa. 21:3-5) Pe a māeʻa lenā, ona faataunuuina loa lea o le finagalo o le Atua i le lalolagi e pei ona faia i le lagi. Po o e tulimataʻia le taimi o le a faataunuuina uma ai na folafolaga a le Tusi Paia? Ia manatua, o taimi uma e te tatalo ai ia oo mai le Malo o le Atua, o lona uiga o loo e tatalo ia faataunuuina na folafolaga mataʻina.

¹⁰ E leʻi “oo mai” le Malo o le Atua e tusa ai ma le tatalo faaaʻoaʻo, auā o loo iai pea pulega faaletagata, ma e leʻi oo mai le lalolagi fou amiotonu. Peitaʻi, e iai se tala lelei. Ua faavae le Malo o le Atua, ma o le vala lenā o le a iloiloina i le mataupu o sosoo mai. O lea, seʻi o tatou iloiloina fetalaiga a Iesu e faatatau i le taimi na faavae ai le Malo o le Atua, faapea le taimi o le a oo mai ai.

11. O le ā na faailoa mai e Iesu e faatatau i le faavaeina o le Malo o le Atua?

¹¹ Sa faailoa mai e Iesu e lē faavaeina le Malo i le uluaʻi senituri T.A., e pei ona faatalitalia e nisi o ona soo. (Galu. 1:6) Seʻi o tatou iloiloina nisi o ana talafaatusa e lua.

12. E faapefea i le talafaatusa i le saito ma le vao leaga, ona faailoa mai ai e leʻi faavaeina le Malo i le uluaʻi senituri T.A.?

¹² Le talafaatusa i le saito ma le vao leaga. (Faitau le Mataio 13:24-30.) Atonu na faamatala e Iesu i ona aposetolo lenā talafaatusa i le amataga o le 31 T.A. (Mata. 13:36-43) O le autū lenei o le talafaatusa ma lona uiga: Na lūlū e le Tiapolo vao leaga (Kerisiano faatagāfai) i le saito (“atalii o le Malo,” po o Kerisiano faauuina), ina ua mavae le maliliu o le ʻauaposetolo. O le a ola faatasi le saito ma le vao leaga seʻia oo i le vaitau o le seleselega, po o le “taufaaiʻuiʻuga lea o le faiga o mea a le lalolagi.” Ina ua amata le vaitau o le seleselega, sa vele ese le vao leaga, ae aoaoina mai le saito. E tusa ai ma le talafaatusa, e leʻi faavaeina le Malo i le uluaʻi senituri, ae na faatoʻā faavaeina ina ua amata le vaitau o le seleselega i le 1914.

13. Na faapefea ona faataʻitaʻi mai e Iesu e lē avea o ia ma Tupu i le taimi e toe foʻi ai i le lagi?

 ¹³ Le talafaatusa i le mina. (Faitau le Luka 19:11-13.) Na faia e Iesu lenei talafaatusa i le 33 T.A., a o alu lana malaga mulimuli i Ierusalema. Na manatu nisi o le ʻaufaalogologo, o le a faavaeina e Iesu le Malo pe a ia taunuu i Ierusalema. Ina ia faasaʻo lenā manatu sesē ma faailoa atu iā i latou e leʻi oo i le taimi e faavae ai le Malo, na faatusa ai e Iesu o ia i ʻse alii mamalu’ sa tatau ona alu malaga “i se nuu mamao, ina ia fai o ia ma tupu.” a I le tulaga o Iesu, na faasino atu le “nuu mamao” i le lagi, lea o le a ia maua ai le tulaga tautupu mai lona Tamā. Na silafia e Iesu, e lē faia o ia ma Tupu i le taimi e toe foʻi ai i le lagi. Nai lo o lea, sa tatau ona ia nofo i le itu taumatau o le Atua, seʻia oo i le taimi atofaina, ma e tele senituri sa ia faatalitali ai.—Sala. 110:1, 2; Mata. 22:43, 44; Epe. 10:12, 13.

14. (a) Na faapefea ona tali e Iesu le fesili a ona aposetolo? (e) O le ā ua faailoa mai i le faataunuuga o le valoaga a Iesu e faatatau i le Malo ma lona faatasi mai?

¹⁴ A o leʻi maliu Iesu, na fesili ona aposetolo e toʻafā iā te ia: “O le ā foʻi le faailoga o lou faatasi mai, ma le taufaaiʻuiʻuga o le faiga o mea a le lalolagi?” (Mata. 24:3; Mare. 13:4) Na tali atu Iesu e ala i le faamatalaina o se valoaga e tele ona vala, o loo faamauina i le mataupu e 24 ma le and 25 o le Mataio. Na faamatala e Iesu mea mataʻina o le a tutupu i le lalolagi, lea e faia aʻe ai le faailoga e iloa ai le vaitaimi o lona “faatasi mai.” E tutusa le taimi e amata ai lona  faatasi mai, ma le taimi e faavaeina ai le Malo. Ae e tutusa le taimi e faaiʻu ai lona faatasi mai, ma le taimi e oo mai ai le Malo. E iai faamaoniga e tatou te iloa ai, na amata ona faataunuu le valoaga a Iesu talu mai le 1914. b O lea, o le tausaga lenā na amata ai lona faatasi mai, ma na faavaeina ai foʻi le Malo.

15, 16. O ai e faasino i ai “lenei tupulaga”?

¹⁵ O afea o le a oo mai ai le Malo o le Atua? E leʻi faailoa mai e Iesu le taimi tonu o le a tupu ai lenā mea. (Mata. 24:36) Peitaʻi, e iai nisi ana fetalaiga e faamautinoa mai ai ua lata le taimi e faataunuuina ai lenā vala. Na fetalai Iesu o le a oo mai le Malo pe a māeʻa ona vaaia e “lenei tupulaga,” le faataunuuga o le valoaga e faatatau i le faailoga. (Faitau le Mataio 24:32-34.) O ai e faasino atu i ai “lenei tupulaga”? Seʻi o tatou iloiloina totoʻa fetalaiga a Iesu.

¹⁶ “Lenei tupulaga.” Pe sa talanoa Iesu e faatatau i tagata e lē talitonu? E leai. Seʻi mafaufau i le ʻaufaalogologo a Iesu. Sa ia talanoa e faatatau i lenei valoaga, i nisi o ona aposetolo ina “ua na o i latou.” (Mata. 24:3) O le taimi lea ua lata ina faauuina le ʻauaposetolo i le agaga paia. Ae seʻi mātau foʻi le siʻomaga o le mau. A o leʻi talanoa Iesu e faatatau i “lenei tupulaga,” na ia fetalai: “Ia outou iloa lenei mea mai i le faataʻitaʻiga i le laau o le mati: Pe a faatoʻā tutupu ona lālā fou ma oso mai ai foʻi ma ona lau, ona outou iloa ai lea ua latalata le tau māfanafana. E faapea foʻi outou, pe a outou vaaia nei mea uma, ia outou iloa ua latalata mai o ia, ua i faitotoʻa lava.” Na vāai le ʻaufaauuina i mea na valoia e Iesu, ma malamalama ai i le uiga o le faailoga, “ua i faitotoʻa” Iesu. O lea, ina ua talanoa Iesu e faatatau i “lenei tupulaga,” sa ia mafaufau i le ʻaufaauuina.

17. (a) O le ā e uiga i ai le “tupulaga”? (e) O ā mea e aofia ai i “nei mea uma”?

¹⁷ ʻE lē mavae atu seʻia taunuu nei mea uma.’ E faapefea ona faamaonia le moni o na upu? Ina ia taliina lenā fesili, e lua ni vala e tatau ona tatou malamalama i ai. Muamua, o le ā e faasino i ai “lenei tupulaga”? Lona lua, o ā mea e aofia ai i “nei mea uma”? O le upu “tupulaga,” e masani ona faasino atu i tagata e eseese o latou matutua, na iai se taimi na latou soifua faatasi ai, a o faagasolo se vaitaimi patino. E lē o se vaitaimi e matuā umi tele, peitaʻi e iai lona iʻuga. (Eso. 1:6) O le faaupuga “nei mea uma,” e aofia ai mea uma na muaʻi valoia o le a tutupu a o faagasolo le faatasi mai o Iesu, lea na amata mai i le 1914 seʻia oo i le “puapuaga tele.”—Mata. 24:21.

18, 19. O le ā lo tatou malamalamaga i le fetalaiga a Iesu e faatatau i “lenei tupulaga,” ma o le ā ua tatou talitonu i ai?

¹⁸ O le ā lo tatou malamalamaga i le fetalaiga a Iesu e faatatau i “lenei tupulaga”? O lenei tupulaga e faia aʻe i ni vaega se lua o Kerisiano faauuina, na iai se vaitaimi na feola faatasi ai. O le vaega muamua, e faia aʻe i le ʻaufaauuina  na vaaia le amataga o le faataunuuina o le faailoga i le 1914. Ae o le vaega lona lua, e faia aʻe i Kerisiano faauuina na iai se vaitaimi na feola faatasi ai ma le ʻaufaauuina i le vaega muamua. O nisi i le vaega lona lua, o le a soifua pea ma vāai i le amataga o le puapuaga tele. O nei vaega e lua e faia aʻe ai lenei tupulaga, auā e iai se vaitaimi na latou soifua faatasi ai o ni Kerisiano faauuina. c

¹⁹ Ua tatou molimauina faamaoniga i le lalolagi aoao, o le faatasi mai o Iesu i le mana o le Malo. Ua faasolo ina matutua nisi o le ʻaufaauuina o loo faia aʻe ai “lenei tupulaga,” ma ua tatou mautinoa o le a soifua pea nisi o i latou a o leʻi gāpā le puapuaga tele. O lea, e mafai ona tatou faapea atu, ua toe o se aga ona oo mai lea o le Malo o le Atua, ma amata lana pulega i le lalolagi. Maʻeu lo tatou naunau e tulimataʻia le taimi e faataunuu ai le tatalo: “Ia oo mai lou Malo”!

20. O le ā le autū o lenei lomiga, ma o le ā o le a iloiloina i le mataupu o sosoo mai?

²⁰ Ia aua lava neʻi galo iā i tatou le fetalaiga a Ieova e faatatau i lona Alo: “Ia faalogo iā te ia.” I le avea ai ma Kerisiano moni, e tatou te naunau e faalogo i lenā faatonuga mai le Atua. E tāua iā i tatou fetalaiga ma aʻoaʻoga uma a Iesu e faatatau i le Malo. O mea ua faataunuuina e le Malo i le taimi lenei ma le lumanaʻi, o le autū lenā o lenei lomiga. O le a talanoaina i le mataupu o sosoo mai, mea mataʻina na tutupu a o lata ina faavae le Malo o le Atua i le lagi.