LESONA 07
O le ā le Ituaiga Atua e Iai Ieova?
Pe a e manatunatu iā Ieova le Atua, o le ā e tau i ai lou mafaufau? Po o ia o sē e mamalu ma mataʻutia, ae e mamao ese mai iā te oe e pei o le mamao o fetu o se aniva? Pe e te faaata o ia o sē e malosi e pei o se faititili, ae leai ni ona uiga? O le ā moni lava le ituaiga Atua e iai Ieova? E ala mai i lana Afioga le Tusi Paia, ua faailoa mai e Ieova ona uiga ma lona manatu mamafa mai iā te oe.
1. Aiseā e lē mafai ai ona tatou vāai i le Atua?
“O le Atua o le Agaga.” (Ioane 4:24) E leai se tino faaletino o Ieova. O ia o se Agaga e afio i le lagi, o se nofoaga e lē mafai ona tatou vaaia.
2. O ā nisi uiga o Ieova?
E ui e lē vaaia Ieova, ae o ia o se Atua moni e iai ona uiga matagofie. Ua faapea mai le Tusi Paia: “E fiafia Ieova i le faamasinogatonu, e na te lē tuulafoaʻia foʻi o ē e faamaoni iā te ia.” (Salamo 37:28) O ia foʻi o sē e “alofa faapelepele ma alofa mutimutivale,” aemaise lava i tagata o loo feagai ma mafatiaga. (Iakopo 5:11) “E latalata mai Ieova i ē e lotomomomo; e faaola e ia o ē ua lotonutimomoia.” (Salamo 34:18) Pe e te iloa e aafia foʻi faalogona o Ieova ona o ā tatou gaoioiga? O se tagata e filifili e faia mea leaga, e mafai ona tigā ai lona finagalo ma faanoanoa ai. (Salamo 78:40, 41) Ae o le tagata e na te faia le mea saʻo, e faafiafiaina ai o ia.—Faitau le Faataoto 27:11.
3. E faapefea ona faailoa mai e Ieova lona alofa iā i tatou?
O le uiga autū o Ieova o le alofa. Auā “o le Atua o le alofa lava ia.” (1 Ioane 4:8) Ua faailoa mai e Ieova lona alofa e ala mai i le Tusi Paia ma mea na ia foafoaina. (Faitau le Galuega 14:17.) Seʻi mātau le auala na ia foafoaina ai i tatou. Na ia foaʻi mai iā i tatou le vaai ina ia iloa lanu matagofie, o le faalogo ina ia lagona ai musika mananaia, ma le tofo i meaʻai manogi. E finagalo ia tatou fiafia i le olaga.
SAʻILIʻILI ATILI
Seʻi iloilo le auala na faataunuu ai e Ieova mea mataʻina, ma vaai pe faapefea ona ia faailoa mai ona uiga matagofie iā i tatou.
4. Agaga paia—Mana galue o le Atua
E pei lava ona faaaogā o tatou lima e fai ai galuega, e faapena foʻi ona faaaogā e Ieova lona agaga paia. Ua faailoa mai e le Tusi Paia, o le agaga paia e lē o se Atua, ae o le malosiaga e faaaogā e le Atua e faia ai galuega. Faitau le Luka 11:13 ma le Galuega 2:17, ona talanoa lea i fesili nei:
-
O le a “liligi ifo” e le Atua lona agaga paia iā i latou e ōle atu ai. Pe e te manatu la o le agaga paia o se Atua, po o le mana galue o le Atua? Aiseā?
E faaaogā e Ieova lona agaga paia e faataunuu ai mea mataʻina. Faitau le Salamo 104:30 ma le 2 Peteru 1:20, 21, ona talanoa lea i le fesili lenei:
-
O ā nisi auala ua faaaogā ai e Ieova lona agaga paia?
5. E iai uiga matagofie o Ieova
E ui o Mose o se auauna faatuatua a le Atua, ae sa ia naunau e fia iloa atili Lē na foafoaina o ia. O lea na faapea atu ai Mose iā te ia: “Ia e faailoa mai ou ala, ina ia ou iloa ai oe.” (Esoto 33:13) Na tali mai Ieova ma faailoa mai iā Mose le ituaiga Atua e iai o Ia. Faitau le Esoto 34:4-6, ona talanoa lea i fesili nei:
-
O ā uiga o Ieova na ia faailoa iā Mose?
-
O le ā se uiga o Ieova e sili ona e fiafia i ai?
6. E manatu mamafa Ieova i tagata
Sa nofo pologa i Aikupito tagata o le Atua po o tagata Eperu. Na faapefea ona aafia faalogona o Ieova i o latou mafatiaga? Tā le TALA FAALOGOLOGO ma mulimuli i ai, pe faitau le Esoto 3:1-10, ona talanoa lea i fesili nei.
-
O le ā ua e iloa mai i lenei tala e faatatau i faalogona o Ieova i mafatiaga o tagata?—Tagaʻi i fuaiupu e 7 ma le 8.
-
Pe e te manatu e finagalo moni Ieova e fesoasoani i tagata, ma e mafai ona ia faia faapea? Aiseā?
7. Ua faailoa mai e le foafoaga uiga o Ieova
Ua faailoa mai e Ieova ona uiga e ala i mea na ia foafoaina. Faaali le VITIŌ. Faitau le Roma 1:20, ona talanoa lea i le fesili lenei:
-
O ā uiga o Ieova ua e mātauina i mea na ia foafoaina?
UA FAAPEA MAI NISI: “E lē mafai ona tatou vāai i le Atua, e lē mafai foʻi la ona tatou iloa o ia.”
-
O le ā sou manatu?
-
Aiseā e te manatu ai faapena?
AOTELEGA
O Ieova o le Agaga e lē mafai ona tatou vaaia. E tele ona uiga matagofie, aemaise lava le alofa.
Fesili Autalu
-
Aiseā e lē mafai ai ona tatou vāai iā Ieova?
-
O le ā le agaga paia?
-
O ā nisi o uiga o Ieova?
MANATU FAAOPOOPO
Ia faalolotoina lou iloa o Ieova e ala i le aʻoaʻo e faatatau i ona uiga autū e fā.
Iloilo faamaoniga e iloa ai, e lē afio Ieova i mea uma.
Mātau pe aiseā ua taʻua ai i le Tusi Paia le agaga paia o le aao o le Atua.
Na faigatā ona talitonu se tamāloa tauaso e manatu mamafa mai le Atua iā te ia. Mātau le auala na suia ai ona manatu.
“Ua Ou Iloa Nei e Mafai Ona Ou Fesoasoani i Isi Tagata” (Le Olomatamata, Oketopa 1, 2015)
E te Ono Fiafia Foʻi
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
