1, 2. O ai nisi sa avea ma uō a Ieova?

O AI e te manaʻo e avea ma au uō? E mautinoa e te manaʻo e faauō i se tasi e te fiafia i ai. O se tasi e lelei le lua va feagai ai, e iai ni ona uiga agalelei ma uiga e te fiafia i ai.

² E iai i latou e filifilia e Ieova e avea ma ana uō. O se faataʻitaʻiga, o se tasi sa avea ma uō a Ieova o Aperaamo. (Isaia 41:8; Iakopo 2:23) Na fiafia foʻi Ieova iā Tavita auā na ia fetalai, o ia ʻo se tagata ua malie i ai lona loto.’ (Galuega 13:22) Sa matuā ʻpele’ foʻi le perofeta o Tanielu iā Ieova.—Tanielu 9:23.

3. Na faapefea ona avea Aperaamo, Tavita ma Tanielu ma uō a Ieova?

³ Na faapefea ona avea Aperaamo, Tavita ma Tanielu ma uō a Ieova? Na fetalai Ieova iā Aperaamo: “Ua e faalogo i loʻu leo.” (Kenese 22:18) E avea Ieova ma uō a i latou e usiusitaʻi ma le lotomaulalo iā te ia. E mafai foʻi ona avea se nuu atoa ma ana uō. Na fetalai Ieova i le nuu o Isaraelu: “Ia outou faalogo mai i loʻu leo, ona avea ai lea o aʻu ma o outou Atua, ma avea foʻi outou ma oʻu nuu.” (Ieremia 7:23) O lea, pe a e manaʻo moni lava e avea oe ma uō a Ieova, e manaʻomia foʻi ona e usiusitaʻi iā te ia.

4, 5. E faapefea ona puipuia e Ieova ana uō?

⁴ Ua taʻua i le Tusi Paia o loo saʻili e Ieova auala “ina ia faaali atu [ai] lona malosi iā i latou e atoatoa o latou loto iā te ia.” (2 Nofoaiga a Tupu 16:9) I le Salamo 32:8, ua folafola atu ai e Ieova i ana uō: “Ou te foaʻi atu iā te oe le tofā mamao, ma faatonu oe i le ala e ao ona e savali ai. Ou te fautua atu foʻi ma ou vaai iā te oe.”

⁵ E iai se fili malosi o loo manaʻo e taofia i tatou mai i le avea ma uō a le Atua. Peitaʻi, e finagalo Ieova e puipuia i tatou. (Faitau le Salamo 55:22.) I le avea ai ma uō a Ieova, e tatou te auauna iā te ia ma o tatou lotoatoa. E tatou te faamaoni iā te ia e ui lava i tulaga faigatā. E iai foʻi iā i tatou le uiga mautinoa e pei o le faisalamo, o lē na tusi e faatatau iā Ieova e faapea: “Ou te lē tautevateva foʻi auā o loo iai o ia i loʻu itu taumatau.” (Salamo 16:8; 63:8) E faapefea ona taumafai Satani e taofia i tatou mai i le avea ma uō a le Atua?

6. O ā tuuaʻiga a Satani e faatatau i tagata?

⁶ Na tatou aʻoaʻoina i le Mataupu 11, na luʻia e Satani Ieova ma tuuaʻia o ia i le talapepelo ma faiga lē tonu, e ala i le lē tuuina atu o le avanoa iā Atamu ma Eva, e filifili ai e i laʻua lava po o le ā le mea saʻo ma le mea sesē. Ua faailoa mai i le tusi o Iopu, e tuuaʻia foʻi e Satani tagata o ē mananaʻo e avea ma uō a le Atua. Ua faapea mai Satani e  māfua ona latou auauna i le Atua, ona o mea o loo Ia foaʻi mai mo i latou ae e lē ona o lo latou alofa mo Ia. Ua faapea mai foʻi Satani e mafai ona ia faaliliueseina so o se tasi mai i le Atua. Seʻi o tatou iloilo po o le ā e tatou te aʻoaʻoina mai iā Iopu, ma le auala na puipuia ai o ia e Ieova.

7, 8. (a) O ā faalogona o Ieova e faatatau iā Iopu? (e) O le ā le faamatalaga a Satani e faatatau iā Iopu?

⁷ O ai Iopu? O Iopu o se tagata amiolelei sa soifua i le pe ā ma le 3,600 tausaga ua mavae. Na fetalai Ieova e leʻi iai lava se tasi e pei o ia i le lalolagi i lenā taimi. Sa faaalia e Iopu le faaaloalo loloto mo le Atua, ma na ʻinoʻino o ia i mea leaga. (Iopu 1:8) Ioe, sa silasila mai Ieova iā Iopu o ia o se uō moni.

⁸ Na faapea mai Satani sa auauna Iopu i le Atua ona o māfuaaga manatu faapito. Na fai atu Satani iā Ieova: “Po ua e lē siʻosiʻomia ea o ia i le pā, ma lona fale, atoa ma ana mea uma? Ua e faamanuia foʻi galuega a ona lima, ma ua faateleina ana manu i le laueleele. Ae peitaʻi, ia aapa atu lou aao faamolemole, ma tago i mea uma ua iā te ia, pe e lē faifai ai o ia i ou lava luma.”—Iopu 1:10, 11.

9. O le ā le avanoa na tuu atu e Ieova iā Satani?

⁹ Na tuuaʻia e Satani Iopu e pau lava le māfuaaga na ia auauna ai iā Ieova, ona o mea o loo ia maua mai i le Atua. Na faapea mai foʻi Satani e mafai ona ia faaliliueseina Iopu mai i le auauna iā Ieova. E leʻi fiafia Ieova i manatu o Satani. Peitaʻi,  sa ia tuu atu pea iā Satani le avanoa e tofotofoina ai Iopu, pe e moni na avea o ia ma uō a Ieova ona o lona alofa.

10. Na faapefea ona osofaʻia Iopu e Satani, ma o le ā le auala na ia tali atu ai?

¹⁰ Muamua, na aveesea pe faatamaʻia e Satani lafumanu uma a Iopu. Ona sosoo ai lea ma lona fasiotia toetoe o auauna uma a Iopu. Ioe, ua aveese uma mea mai iā Iopu. O le osofaʻiga mulimuli a Satani, na ia fasiotia ai le fanau e toʻasefulu a Iopu e ala i se matagi. E ui i lea, na faamaoni pea Iopu iā Ieova. “E leʻi agasala Iopu i nei mea uma pe taʻuleagaina foʻi le Atua i se mea.”—Iopu 1:12-19, 22.

11. (a) O le ā se isi mea na faia e Satani iā Iopu? (e) O le ā le auala na tali atu ai Iopu?

¹¹ E leʻi fiu Satani i ana taumafaiga. Na ia luʻia le Atua e ala i le faapea atu: “Tago atu i ona ivi ma lona tino, pe e lē faifai ai o ia i ou lava luma.” O lea, na taia ai Iopu e Satani i se faamaʻi e sili ona mataʻutia. (Iopu 2:5, 7) Ae sa faamaoni pea Iopu iā Ieova. Na faapea atu o ia: “Seʻia oo lava i loʻu oti, ou te lē aveesea [lafoaʻia] loʻu faamaoni!”—Iopu 27:5.

12. Na faapefea ona faamaonia e Iopu e pepelo Satani?

¹² E leʻi iloa e Iopu se mea e faatatau i tuuaʻiga a Satani, po o le māfuaaga foʻi na feagai ai o ia ma mafatiaga ogaoga. Na manatu o ia o Ieova ua  māfua ai ona mafatiaga. (Iopu 6:4; 16:11-14) Ae ui i nei mea, sa tumau pea ona faamaoni Iopu iā Ieova. O lea la ua manino mai le māfuaaga na avea ai o ia ma uō a le Atua. Sa avea o ia ma uō a le Atua talu ai sa alofa o ia i le Atua, ma e leʻi manatu faapito o ia. E pepelo uma tuuaʻiga a Satani.

13. O le ā le iʻuga na oo i ai ona o le faamaoni o Iopu?

¹³ E ui lava e leʻi iloa e Iopu le mea na tupu i le lagi, ae sa ia faamaoni pea i le Atua ma faamaonia ai e leaga Satani. Na tauia Iopu e Ieova ona o lona faamaoni i le la faauōga.—Iopu 42:12-17.

14, 15. O le ā le tuuaʻiga a Satani i tane ma fafine uma?

¹⁴ E mafai ona e aʻoaʻoina ni lesona tāua mai i le mea na tupu iā Iopu. I aso nei, o loo tuuaʻia i tatou e Satani e faapea e māfua ona tatou auauna iā Ieova, ona o mea o loo tatou maua mai iā te Ia. O loo taʻua i le Iopu 2:4 le faamatalaga a Satani e faapea: “O mea uma foʻi ua iai i le tagata e avatu e ia e sui ai lona ola.” O lea, e lē na o Iopu na tuuaʻia e Satani i le manatu faapito. O loo ia tuuaʻia foʻi tane ma fafine uma. I le faitau selau tausaga mulimuli ane talu ona maliu Iopu, o loo taufaifai pea Satani iā Ieova ma tuuaʻia ana auauna. O se faaaʻoaʻoga, o loo taʻua i le Faataoto 27:11: “Loʻu atalii e, ia atamai oe ma faafiafia ai loʻu loto, ona ou mautali ai lea i lē o loo taufaifai [pe taufaaleaga] mai.”

¹⁵ E mafai ona e filifili e usitaʻi iā Ieova ma avea  ma ana uō faamaoni, e faamaonia atu ai e pepelo Satani. O le avea ma uō a le Atua, o le filifiliga sili lea ona lelei ma tāua e mafai ona e faia, e ui lava atonu e manaʻomia ona e faia ai ni suiga tetele i lou olaga. E faapea mai Satani e lē mafai ona e faamaoni i le Atua pe a e feagai ma faafitauli. E taumafai o ia e faasesē i tatou ina ia lē faamaoni ai i le Atua. E faapefea ona ia faia lenei mea?

16. (a) O ā auala e faaaogā e Satani e taumafai ai e taofia tagata mai i le auauna iā Ieova? (e) O le ā se isi auala e ono taofia ai oe e le Tiapolo mai i le auauna iā Ieova?

¹⁶ E faaaogā e Satani auala eseese, e taumafai ai e taofia i tatou mai i le avea ma uō a le Atua. O osofaʻiga a Satani “e pei o se leona o loo tagi leotele, e saʻili se tasi e na te ʻaina.” (1 Peteru 5:8) Aua neʻi faateʻia oe pe a taumafai au uō, tagata o lou aiga, po o isi e taofia oe mai i le suʻesuʻeina o le Tusi Paia ma le faia o le mea saʻo. Atonu e oo iā te oe lagona e pei ua osofaʻia oe. * (Ioane 15:19, 20) Ua liua foʻi e Satani o ia lava “e avea ma agelu o le malamalama.” Atonu la o loo taumafai o ia e faasesē i tatou ina ia lē usiusitaʻi ai iā Ieova. (2 Korinito 11:14) O le isi auala e faaaogā e Satani, o le faasesēina lea o i tatou ina ia manatu, e lē mafai ona tatou  ausia agavaa ina ia avea ai ma auauna a le Atua.—Faataoto 24:10.

17. Aiseā e tatou te usiusitaʻi ai iā Ieova?

¹⁷ Pe a tatou usiusitaʻi iā Ieova, e tatou te faamaonia atu ai o Satani o lē e pepelo. O le ā o le a fesoasoani iā i tatou ina ia usiusitaʻi ai? Ua taʻua i le Tusi Paia: “Ia e alofa atu foʻi iā Ieova lou Atua ma lou lotoatoa, ma lou ola atoa, ma lou malosi atoa.” (Teuteronome 6:5) E tatou te usiusitaʻi iā Ieova ona e tatou te alolofa iā te ia. A o tuputupu aʻe lo tatou alofa mo Ieova, o le a tatou mananaʻo foʻi e faia mea uma e finagalo i ai o ia. Na tusi le aposetolo o Ioane: “O le alofa lenei i le Atua, ia  tatou tausi i ana poloaʻiga; ma e lē mamafa ana poloaʻiga.”—1 Ioane 5:3.

18, 19. (a) O ā nisi o mea ua faailoa mai e Ieova e leaga? (e) E faapefea ona tatou iloa e lē o talosaga mai Ieova e tatou te faia se mea e lē mafai ona tatou faia?

¹⁸ Ae o ā nisi o mea ua faailoa mai e Ieova iā i tatou e leaga? O loo iai ni faaaʻoaʻoga i le pusa “ʻ Inoʻino i Mea e Inosia e Ieova.” Atonu i le taimi muamua e te manatu e lē leaga le tele o nisi o nei mea. Ae pe a e faitau i le Tusi Paia ma manatunatu loloto i ai, o le a e malamalama ai i le atamai o le usitaʻia o tulafono a Ieova. Atonu o le a uunaʻia ai foʻi oe e faia ni suiga i lou olaga. E iai taimi atonu e faigatā ai ona e faia na suiga. Peitaʻi, pe a e faia faapea, o le a e maua le filemu ma le fiafia i le  avea ai o se uō faamaoni a le Atua. (Isaia 48:17, 18) E faapefea ona tatou mautinoa e mafai ona tatou faia nei suiga?

¹⁹ E lē taitai talosaga mai Ieova e tatou te faia se mea e lē mafai ona tatou faia. (Teuteronome 30:11-14) I le avea ai o ia o se Uō moni, e sili atu lona silafia o i tatou nai lo o i tatou lava. E na te silafia itu e tatou te lelei ai faapea o tatou vaivaiga. (Salamo 103:14) Ua faalaeiauina i tatou e le aposetolo o Paulo e faapea: “E faamaoni le Atua, ma e na te lē tuua outou i se faaosoosoga e sili atu nai lo o le mea tou te lavātia, ae pe a oo mai le faaosoosoga, e saunia e ia se auala e sao ai outou, ina ia outou tumau ai.” (1 Korinito 10:13) E tatou te mautinoa e foaʻi mai lava e Ieova le malosi e tatou te faia ai le mea saʻo. O le a ia foaʻi atu iā te oe “le mana lea e sili atu i le malosi o tagata,” ina ia mafai ai ona e onosaia tulaga faigatā. (2 Korinito 4:7) Ina ua uma ona fesoasoani Ieova iā Paulo i tulaga faigatā, na mafai e Paulo ona faapea atu: “O mea uma lava, ua ou maua le malosi mai iā te ia o lē na foaʻi maia iā te aʻu le mana.”—Filipi 4:13.

20. O ā uiga e tatau ona e faataʻitaʻi i ai, ma aiseā?

²⁰ Pe a fia avea i tatou ma uō a Ieova, e lē tatau ona tatou faia mea e lē fiafia i ai lona finagalo. Peitaʻi, e iai se isi mea e sili atu e tatau ona tatou faia. (Roma 12:9) E fiafia uō a Ieova i mea e fiafia i  ai Ieova. Ua faamatalaina na mea i le Salamo 15:1-5. (Faitau.) E faataʻitaʻi uō a Ieova i ona uiga, ma faaalia “le alofa, o le olioli, o le filemu, o le faapalepale, o le agalelei, o le mataalofa, o le faatuatua, o le agamalu, ma le amio pulea.”—Kalatia 5:22, 23.

21. O le ā e fesoasoani iā te oe ina ia iloa ai auala e faaalia ai uiga e fiafia i ai le Atua?

²¹ O le ā e fesoasoani iā te oe ina ia iloa ai auala e faaalia ai na uiga matagofie? E manaʻomia ona e aʻoaʻoina po o ā mea e fiafia i ai Ieova, e ala i le faitau ma suʻesuʻe e lē aunoa i le Tusi Paia. (Isaia 30:20, 21) Pe a e faia faapea, o le a tuputupu aʻe lou alofa mo Ieova. A o tuputupu aʻe lou alofa mo ia, o le a e manaʻo e usiusitaʻi iā te ia.

22. O le ā le iʻuga o lou usiusitaʻi iā Ieova?

²² O suiga e te ono faia i lou olaga, e mafai ona faatusa atu i le aveese o ni ofu tuai ae ofu ni ofu fou. Ua taʻua i le Tusi Paia, e manaʻomia ona e “toese le tagata tuai” ae ofu i le “tagata fou.” (Kolose 3:9, 10) Atonu e lē faigofie ona faia lenei mea. Peitaʻi, pe a tatou faia nei suiga ma usiusitaʻi iā Ieova, ua ia folafola mai o le a ia tauia i tatou i ʻse taui tele.’ (Salamo 19:11) Tau ina ia e filifili e usiusitaʻi iā Ieova ma faamaonia ai o Satani o lē e pepelo. Ia auauna iā Ieova ona o le alofa lē manatu faapito, ae e lē ina ia maua ai se taui i le lumanaʻi. O le faia faapea, o le a avea ai oe ma uō moni a le Atua.