IA VAAI i le mea ua tupu nei. Ua tulia ese nei Atamu ma Eva i fafo o le faatoaga manaia. Pe e te iloa ai se ā?

Talu ai sa la faia se mea leaga tele. Ua faasalaina nei i laua e Ieova. Pe e te iloaina le mea leaga sa faia e Atamu ma Eva?

Sa laua faia se mea na fai atu ai le Atua e aua le faia. Sa fai atu le Atua e mafai ona la aai i fua o laau o le faatoaga. A e tasi lava le laau e aua le aai ai, auā o le a la feoti ai. Sa ia taofia le laau o sana mea. Ua tatou iloa e sese pe a tatou aveina se mea e lē o sa tatou mea, a ea? Ia, o le ā la sa tupu?

I se tasi aso a o i ai na o Eva i le faatoaga, sa tautala atu se gata iā te ia. Seʻi mafaufau i ai! Sa ia taʻu atu i a Eva e ai le fua mai i le laau sa fai atu i ai le Atua e aua le aia. Ina ua faia e Ieova gata sa lei faia i latou ia tautala. O lona uiga la o se tasi sa ia faatautalaina le gata. O ai la ia?

Sa le o Atamu. E tatau la ona avea ma se tasi o i latou ia ua leva ona faia e Ieova a o lei faia le lalolagi. O na peresona o ni agelu, e le mafai ona tatou vaaia i latou. O le agelu lenei e tasi sa faamaualuga tele ia. Sa amata ona ia mafaufau e pule e pei o le Atua. Sa ia manao foi ia usiusitai atu tagata iā te ia a e lē o i a Ieova. O ia lea o le agelu sa ia faatautalaina le gata.

Sa mafai ona faavalea e lenei agelu i a Eva, ina ua ia fai atu o le a avea o ia e pei o le Atua pe afai na te aiina le fua. Sa ia aia loa, faapena foi ma Atamu. Ua le usiusitai Atamu ma Eva i le Atua, ma le iloa ai loa lo la faatoaga matagofie.

Ae i se tasi aso o le a tagai i ai le Atua ua toe faia le lalolagi ia matagofie pei o Etena. O le a tatou aʻoaʻoina foi pe faapefea ona e auai i le faia faapea. Seʻi o tatou sueina po o le ā ua tupu nei i a Atamu ma Eva.