O TAMALOLOA nei o loo latou faamalosia tagata ia fai galuega. Sei vaai i le tamaloa lena na te sasaina le isi tagata galue i le sasa! O le au faigaluega o tagata o le aiga o Iakopo, ma ua igoa o Isaraelu. Sa faamalosia i latou ia fai galuega e tagata Aikupito ma avea ma a latou pologa. Na faapefea ona tupu lenei mea?

Mo le tele o tausaga sa ola fifilemu pea le aiga toatele o Iakopo i Aikupito. O Iosefa, o le tagata tāua e sosoo atu i a Farao sa na tausia lelei i latou. Ae mulimuli ane ua oti Iosefa. Ma o le Farao fou sa le fiafia i tagata Isaraelu ma ua avea nei o ia ma tupu i Aikupito.

O lenei Farao leaga ua na faia tagata Isaraelu ma pologa. Ma sa ia tofia ni tagata sauā ma le lē alolofa latou te vaaia i latou ma faamalosia ia galulue tigaina i le fausia o le aai mo Farao. Peitai sa faaauau pea ona tuputupu tagata Isaraelu. Ina ua mavae sina taimi sa fefefe tagata Aikupito ina neʻi toatele ma malolosi tele tagata Isaraelu.

Pe e te iloa le mea sa fai e Farao? Sa ia fai atu i fafine na fesoasoani i tinā Isaraelu ma faapea atu: ‘E tatau ona outou fasiotia uma pepe tama o le a fananau mai.’ Peitai o ni fafine lelei i latou ma e le mafai ona latou fasiotia pepe.

Ona poloai lea o Farao i tagata uma: ‘Ia outou fasiotia uma pepe tama a Isaraelu. Ae faaola na o pepe teine.’ Pe e lē o se faatonuga leaga ea lena? Sei o tatou vaai pe na faapefea ona faasaoina le tasi o pepe tama.