NA ALU mamao lava Mose i le mauga o Horepa e sue mai ai ni vao mo ana mamoe. O i ina na ia iloa ai se laau o mu, ae e le o liu efuefu!

Na manatu Mose, ‘O se mea uiga ese lenei. O le a ou faalatalata atu sei ou vaai lelei i ai.’ Ona sau ai lea o le leo mai le laau, ua faapea mai: ‘Aua e te sōsō mai. Ave ese ou seevae, auā o loo e tu i le eleele paia.’ O le Atua sa fetalai e ala mai i se agelu, ona ufiufi lea e Mose ona mata.

Ona faapea mai lea o le Atua: ‘Ua ou iloa le puapuaga o oʻu tagata i Aikupito. O le a ou faasaolotoina i latou, ma ou te auina atu oe e taʻitaʻiina mai ou tagata mai Aikupito.’ O le a aumaia e Ieova ona tagata i le atunuu matagofie o Kanana.

Peitai sa fai atu Mose: ‘E faapefea ona ou faia lenei mea? Afai ou te alu, o le a fai mai Isaraelu: “O ai na auina mai oe?” Po o le a saʻu tali?’

Sa tali mai le Atua, ‘Ia e taʻu atu faapea, “Ua auina mai aʻu i a te outou e IEOVA le Atua o Aperaamo, le Atua o Isaako ma le Atua o Iakopo.”’ Ona toe faaopoopo lea o Ieova: ‘O loʻu igoa lea e faavavau.

‘Ae faapefea pe a latou le talitonu sa e auina atu au,’ o le tali lea a Mose.

‘O le ā o i lou lima?’ o le fesili lea a le Atua.

Sa tali atu Mose: ‘O le laau.’

‘Togi i le eleele,’ o le upu lea a le Atua. Ina ua faia e Mose, ona liu gata lea o le laau. Sa ia toe faapea atu: ‘Tuu lou lima i totonu o lou ofu.’ Sa faia e Mose, ma ina ua toe tuu mai i fafo sa paepae e pei o le kiona! Ua maua le lima i le maʻi leaga o le lepela. O le isi mea na sosoo ai sa tuuina atu e Ieova i a Mose le mana na te faia ai le vavega lona tolu. Mulimuli ane sa ia faapea atu: ‘Afai e te faia na vavega o le a talitonu ai Isaraelu na ou auina atu oe.

Ona foi atu lea o Mose i a Ietero ma fai atu: ‘Faamolemole tuu mai aʻu ou te toe foi e asiasi i ou aiga i Aikupito ma vaai pe o a mai i latou.’ Ona faamavae ai lea o Ietero i a Mose, ma alu atu loa Mose i Aikupito.