VAAI i le mea lena ua tanu e lena tamaloa i lona fale ie! O se ofu manaia, ma se uamea auro ma fasi ario. Na ia aumaia mai le aai o Ieriko. Ae o le ā le mea sa tatau ona fai i mea o i Ieriko? Pe e te manatua?

Sa tatau ona faaumatia, ma o le auro ma ario sa tatau ona ave i le mea o i ai le oa i le fale fetafai o Ieova. O lea la o nei tagata sa le usiusitai i latou i le Atua. Ua latou gaoia ni mea a Ieova. O le igoa o le tamaloa o Akana. Ma o e o faatasi ma ia o lona au aiga. Sei tatou vaai le mea ua tupu.

Ina ua uma ona gaoia e Akana ia mea, sa aauina atu e Iosua ni tagata e tau ma tagata o le nuu o Ai. Ae sa fasia i latou i le taua. Sa fasiotia ni isi a o isi ua sosola. Ua faanoanoa ai tele Iosua. Sa ia faō i le eleele ma tatalo i a Ieova: ‘Aiseā ua e faataga ai lenei mea e oo i a i matou?’

Ona tali mai lea o Ieova: ‘Tu i luga! Ua agasala Isaraelu. Ua latou aveina mea sa tatau ona faaleaga po o ave foi i le fale fetafai. Ua latou gaoia se ofu manaia ma nana. O le a ou le faamanuia iā te oe sei vagana ua e faaleagaina na mea ma lē na ia aveina.’ Na tulei atu Ieova o le a ia faaali atu i a Iosua lenei tagata leaga.

O lea sa faapotopoto loa e Iosua tagata uma, ma aumaia loa e Ieova le tagata leaga o Akana. Sa faapea mai Akana: ‘Ua ou agasala. Sa ou vaai i se ofu manaia, ma uamea auro ma fasi ario. Sa ou manao tele i ai sa iu ina ou aveina ai. O le a tou mauaina o loo tanumia i totonu o loʻu fale ie.’

Ina ua aumaia nei mea i a Iosua, sa ia fai atu loa i a Akana: ‘Aiseā ua e aumaia ai faalavelave i a i matou? O le a aumaia nei e Ieova se faalavelave i luga iā te oe!’ Ma sa fetogia loa i maa e tagata uma lava Akana ma lona aiga ia oti. Pe e le faaalia ai ea i lenei mea e le tatau ona tatou tago vale?

Mulimuli ane ona tau ai lea o Isaraelu ma Ai. Ma sa fesoasoani ai loa Ieova i ona tagata, ma manumalo ai i latou i le taua.