SEI vaai i fugalaau ma sekati matutua o loo ola mai i lenei tootoo, po o le laau. O le tootoo o Arona sa ola aʻe ai fugalaau ma sekati matutua i le po e tasi. Sei o tatou vaai pe ai se ā?

Ua faataamilo nei Isaraelu i le vaomatua mo sina vaitaimi. Ua manatu isi e le tatau ona toe avea Mose ma o latou taʻitaʻi, po o Arona foi e avea ma faitaulaga sili. O Koru, Tatano, Apiramo ma le 250 o tagata taʻitaʻi sa latou manatu faapena. Sa latou o atu i a Mose ma faapea atu: ‘Aiseā ua e faasilia ai oe e oe lava i luga aʻe o i matou uma nei?’

Sa fai atu Mose i a Koru ma ona tagata: ‘O a taeao ia ave mea e tuu ai afi ma tuu i ai mea manogi. Ona outou o mai lea i le fale fetafai. Tatou te iloa ai po o ai e filifilia e Ieova.’

O le isi aso na sosoo ai na o atu ai Koru ma ona tagata e 250 i le fale fetafai. E toatele isi na o mai e lagolago na tagata. Ua ita tele Ieova. ‘Ia outou o ese mai fale ie o na tagata leaga,’ o le tala lea a Mose. ‘Aua tou te papaʻi atu i sa latou mea.’ Na faalogo tagata, ma o ese mai fale ie o Koru, Tatano ma Apiramo.

Sa fai atu Mose: ‘O le auala lenei tou te iloa ai le ua filifilia e Ieova. O le a mavaevae le eleele ma foloina nei tagata leaga.’

Na uma loa ona tautala Mose, matala loa le laueleele. O le fale ie o Koru ma ana mea ma Tatano ma Apiramo ma e sa latou faatasi na gogoto i lalo, ma ufitia ai e le laueleele. Ina ua faalogo tagata i le tagi a e na pauu i le eleele, sa latou alalaga: ‘Tamomoʻe! Atonu e foloina foi tatou e le eleele!’

Sa i ai pea Koru ma ona tagata e 250 i tafatafa o le fale fetafai. Ona auina mai lea e Ieova le afi, ma mu uma ai i latou. Ona fai atu lea o Ieova i le atalii o Arona o Eleasaro ia ave mea e tuu ai afi a na tagata oti ma fai ai se ufiufi manifinifi o le fata faitaulaga. O lenei ufiufi e fai ma lapataiga i tagata Isaraelu e leai se tasi e ese mai i a Arona ma ona atalii e fai ma ositaulaga mo Ieova.

Peitai sa manao Ieova e faamanino atu o Arona ma ona atalii e fai ma ositaulaga. Ona ia faapea lea i a Mose: ‘Ia tofu taʻitaʻi o ituaiga taitasi o Isaraelu ma le tootoo. Ae o le ituaiga o Levi, ia tuu i a Arona e sau ma lona tootoo. Ona tuu lea o tootoo taitasi i totonu o le fale fetafai i luma o le atolaau o le feagaiga. O le tootoo o lē ou te filifilia o le a ola ai ni fugalaau.’

Ina ua alu Mose e vaai i le isi taeao, o le tootoo o Arona ua ola ai fugalaau ma sekati matutua. Pe ua e iloa nei le mafuaaga na faatupu ai e Ieova fugalaau i le tootoo o Arona?