VAAI i a Samuelu lea e liligi le suāuu i le ulu o le tamaloa. E faaalia ai ua filifilia o ia e fai ma tupu. Sa fetalai Ieova i a Samuelu ia liligi le suāuu i le ulu o Saulo. O se suāuu faapitoa lava e manogi manaia tele.

Sa manatu Saulo e le lava lona lelei e fai ma tupu. ‘O aʻu e tupuga mai i a Peniamina, o le aupito itiiti i Isaraelu,’ o ana upu ia i a Samuelu. ‘Aiseā ua e fai mai ai o le a fai aʻu ma tupu?’ E fiafia Ieova i a Saulo ona e le manatu o ia ia maualuga ma tāua. O le mafuaaga lena sa Ia filifilia ai o ia.

Ae o Saulo e le o se tagata mativa pe puupuu. E sau o ia mai se aiga mauoa, ma o se tagata aulelei tele toe umī. E tusa o le futu e umi atu ai o ia i soo se tagata lava o Isaraelu! O Saulo foi o se tagata e saosaoa tele ma le malosi. Ua fiafia nei tagata ina ua filifilia e Ieova Saulo e fai ma tupu. Ona amata lea ona latou alalaga: ‘Ia soifua le tupu!’

Ua sili nei ona malolosi fili o Isaraelu. Ua faaauau pea ona latou faatupuina faalavelave e tele i a Isaraelu. Ina ua faatoa avea Saulo ma tupu, sa tau faasaga Amoni i a i latou. Ae sa faapotopotoina e Saulo se vaega tau tele lava, ma sa ia manumalo ai i a sa Amoni. Sa fiafia tagata ona ua fai Saulo ma tupu.

A o faagasolo pea tausaga, sa taʻitaʻiina e Saulo Isaraelu i ni manumalo se tele i luga o o latou fili. Sa i a Saulo foi se atalii loto tele o Ionatana. Ma sa fesoasoani Ionatana i a Isaraelu ia manumalo i le tele taua. Sa avea pea Filisitia ma fili sili o Isaraelu. O le tasi aso na o mai ai le afe ma afe o Filisitia e tau faasaga i a Isaraelu.

Sa fai atu Samuelu i a Saulo e faatali seia sau o ia ona fai lea o se taulaga i a Ieova. Ae na tuai mai Samuelu. Sa fefe Saulo ina neʻi amata ona sii tau mai Filisitia, o lea sa ia alu atu loa ma fai e ia le taulaga. Ina ua oo mai Samuelu, sa ia fai atu i a Saulo ua le usiusitai o ia. ‘O le a filifilia e Ieova se tasi tagata e fai ma tupu i luga o Isaraelu,’ o upu ia a Samuelu.

Mulimuli ane sa le toe usitai foi Saulo. O lea sa fai atu Samuelu iā te ia: ‘E sili le usitai i a Ieova na i lo le faia o taulaga i mamoe lelei. Talu ai ua e le usiusitai i a Ieova, o le a le faatumauina oe e Ieova e fai ma tupu o Isaraelu.’

E mafai ona tatou aʻoaʻoina se lesona lelei i inei. Ua faaalia ai le tāua o le usiusitai pea i a Ieova. Ua faaalia ai foi o se tagata lelei, e pei ona sa i ai Saulo, e mafai ona suia ma avea ma tagata leaga. Tatou te le fia faapena a ea?