1-3. (a) Faamatala mea na vaai ma faalogo i ai Esekielu. (Tagaʻi i le ata i luga aʻe o le matua.) (e) O le ā le mana na faapogaia mea na vaai ma faalogo i ai Esekielu, ma na faapefea ona aafia ai o ia?

 O LOO vaavaai mamao atu Esekielu mai i se nofoaga taalaelae. Na ia faataupupula atu, ona tētēvale lea o ona mata ona ua matuā faateʻia o ia i mea ua ia vaai atu i ai. A o tepa aʻe i luga, na ia vaaia ai se matagi malosi, ae e lē o se matagi e masani ai. O le malosi tele o le matagi mai i mātū, ua saviligia ai lona lauulu ma ona ofu, ma ua ia vaaia ai se ao telē o faamalumalu ifo. O lenei ao o loo mumū mai ai i totonu se afi, ma o loo emoemo mai e pei o se mea o loo fefiloi ai le auro ma le siliva. A o agaʻi vave atu le ao iā Esekielu, na faasolo ina leotele e tai pei o se ʻautau o loo pisapisaō a o agaʻi mai.—Eseki. 1:4, 24.

² E pe tusa o le 30 tausaga o lenei alii talavou, na ia maua ai le uluaʻi faaaliga o se faasologa o mea e tutupu e lē mafaagaloina. Na ia lagona “le aao o Ieova” i luga aʻe o ia, o le mana malosi o le agaga paia o Ieova. O mea o le a faapogaia o ia e le agaga e vaai ma faalogo i ai, o le a sili atu lona maoaʻe ma lona ofoofogia nai lo o se ata tifaga mataʻina i aso nei. O le faaaliga  na vaaia e Esekielu, na matuā faateʻia ai o ia ma faapaʻū faō ai.—Eseki. 1:3, 28.

³ Peitaʻi, e iai se mea e sili atu na finagalo i ai Ieova nai lo o le tau ina faaofo o Esekielu. O le uluaʻi faaaliga na vaaia e Esekielu, e pei lava o isi faaaliga o loo i lenā tusi faavaloaga, e telē lona aogā e lē gata mo ia ae faapea isi auauna faamaoni a Ieova i aso nei. Seʻi o tatou iloiloina la mea na vaai ma faalogo i ai Esekielu.

4, 5. O le ā le siʻomaga o le faaaliga a Esekielu?

⁴ Faitau le Esekielu 1:1-3. Seʻi o tatou talanoaina muamua le siʻomaga. O le tausaga lea o le 613 T.L.M. E pei ona tatou aʻoaʻoina i le mataupu ua mavae, na iai Esekielu i Papelonia ma na nonofo faatasi ma tagata na ave faapagota i se vaipanoa e latalata i le vaitafe o Kepara. O lenā vaitafe, e foliga mai o se alāvai na faatafe ese e tagata mai i le vaitafe o Eufirate, ma e toe tau atu i le Eufirate. Na mafai foʻi ona feoaʻi vaa i lenā alāvai.

⁵ E pe ā ma le 800 kilomita (500 maila) le mamao * o Ierusalema, le nuu o tagata na ave faapagota. O le malumalu lea na auauna ai le tamā o Esekielu o se ositaulaga, ua faaleagaina e faiga faapiʻopiʻo ma ifoga tupua. Ua faalumaina le nofoālii i Ierusalema, lea na iai le pulega mamalu a Tavita ma Solomona. O loo iai faatasi le tupu lē faamaoni o Ioakina ma tagata na ave faapagota i Papelonia. O Setekaia na suitulaga iā te ia i le nofoālii. O ia o se tagata amioleaga ma e taaʻinagofie e isi.—2 Tu. 24:8-12, 17, 19.

6, 7. Aiseā na manatu ai Esekielu na ia ola i se vaitaimi e sili ona faigatā?

 ⁶ E foliga mai o se vaitaimi sili lea ona faigatā mo se tagata faatuatua e pei o Esekielu. Atonu na taumānatu nisi na ave faapagota: ʻPo ua tuulafoaʻia e faavavau i tatou e Ieova? Po o le a tafiesea e lenei pulega leaga a Papelonia ma le tele o ona atua sesē le tapuaʻiga mamā iā Ieova ma lana pulega mai i le lalolagi?’

⁷ A o e mafaufau i na faamatalaga, aiseā e lē amata ai ona e suʻesuʻeina lenei mataupu, e ala i le faitau o faamatalaga a Esekielu i le uluaʻi faaaliga na ia vaaia? (Eseki. 1:4-28) A o e faia faapea, ia taumafai e faaata oe i le tulaga o Esekielu, o loo e vaai i mea na ia vaaia ma faalogo i mea na ia faalogoina.

8. O le ā na vaaia e Esekielu i le faaaliga, ma o le ā ua faaata mai ai?

⁸ O le ā na vaaia e Esekielu? E foliga mai o se kariota e telē ma ofoofogia e iai ni uili tetele se fā, faatasi ma ni foafoaga agaga uigaese se toʻafā, lea na mulimuli ane iloa o kerupi. (Eseki. 10:1) I luga aʻe o nei mea, o loo iai se fola telē e pei o se aisa, ma i luga aʻe o lenei fola o loo tiʻetiʻe ai le nofoālii mamalu o le Atua, ma o loo afio ai Ieova lava ia! O le ā la le uiga o lenei kariota? E tasi lava le faaataga talafeagai o le faaaliga na vaaia e Esekielu,  o le vaega faalelagi lea o le faalapotopotoga mamalu a Ieova i le aoao o mea. Aiseā ua tatou manatu ai faapea? Seʻi o tatou iloiloina ni vala se tolu.

9. Aiseā ua talafeagai ai ona faatusa le faiā a Ieova ma ana foafoaga i le lagi i se kariota?

⁹ Le faiā a Ieova ma ana foafoaga i le lagi. Seʻi mātau i lenei faaaliga, o loo iai le nofoālii o Ieova i luga aʻe o kerupi. I isi vaega o le Tusi Paia, o loo faapena ona faamatala pe faaata mai ai Ieova o loo afio i luga aʻe po o le vā foʻi o kerupi. (Faitau le 2 Tupu 19:15; Eso. 25:22; Sala. 80:1) E lē o afio moni Ieova i luga aʻe o nei kerupi, e peiseaʻī e faalagolago o ia i nei foafoaga agaga malolosi e tauave o ia. E lē manaʻomia foʻi ona afio o ia i se kariota moni. Peitaʻi, e lagolagoina e kerupi lana pule silisili ese, ma e mafai ona ia auina atu i latou i so o se mea ina ia faataunuu ai lona finagalo. E pei i latou o isi ʻauagelu paia uma a le Atua, e latou te faataunuu faaiʻuga a Ieova i le avea ai ma ana auauna, po o ona sui. (Sala. 104:4) O le “afio” o Ieova i luga aʻe o i latou uma, e uiga atu i le taʻitaʻia o i latou i lana pule silisili ese, e tai pei o loo latou iai faatasi i se kariota telē.

10. Aiseā e faapea atu ai e tele mea e aofia ai i le kariota faalelagi nai lo o ni kerupi se fā?

¹⁰ E iai isi mea o loo faaata mai e le kariota e ese mai i kerupi. E fā kerupi na vaaia e Esekielu. E masani ona faaaogā lenā fuainumera i le Tusi Paia e faasino atu i se mea e atoatoa, ma e  aofia ai mea uma lava. O lea, o le iai o kerupi e fā ua talafeagai ona faaata mai ai atalii agaga faamaoni uma o Ieova. Ia mātau foʻi o uili ma kerupi ua soo uma i mata, e faaalia ai le matuā mataala o nei foafoaga agaga uma, ae e lē na o ni foafoaga agaga se toʻafā. O faamatalaga a Esekielu ua faaalia ai le telē o lenei kariota, ma ua foliga lāiti ai nei kerupi malolosi. (Eseki. 1:18, 22; 10:12) E faapena foʻi le telē o le vaega faalelagi o le faalapotopotoga a Ieova, e tele atu mea e aofia ai nai lo o ni kerupi se fā.

11. O le ā se faaaliga taitutusa na vaaia e Tanielu, ma o le ā ua tatou aʻoaʻoina mai ai?

¹¹ Se faaaliga taitutusa o le lagi na vaaia e Tanielu. Na soifua le perofeta o Tanielu mo le tele o tausaga a o faaaunuua i le aai o Papelonia. Na ia vaaia foʻi se faaaliga o le lagi. O le mea e mataʻina ai, na mātauina foʻi i lenā faaaliga e iai uili o le nofoālii o Ieova. Na taulaʻi atu le faaaliga na vaaia e Tanielu i le matuā toʻatele o le aiga agaga o Ieova i le lagi. Na vaaia e Tanielu “le faitau afe, ma . . . le faitau miliona” o atalii agaga o le Atua o loo laulaututū i luma o Ieova. Ua latou nonofo e pei ona nofoia o se Faamasinoga i le lagi, e tusa ai ma le nofoaga ua tofia ai i latou taʻitoʻatasi. (Tani. 7:9, 10, 13-18) Pe e lē talafeagai foʻi la ona faapea atu o le faaaliga na vaaia e Esekielu, o loo faaata mai ai foʻi lenā potopotoga o agaga mamalu?

12. Aiseā o se puipuiga ai mo i tatou le suʻesuʻeina o faamatalaga e pei o le faaaliga a Esekielu i le kariota faalelagi?

¹² E silafia e Ieova o se puipuiga mo i tatou le taulaʻi o o tatou mafaufau i mea moni faalelagi, po o “mea e lē vaaia” e pei ona taʻua e le aposetolo o Paulo. Aiseā? Talu ai o i tatou o foafoaga e iai tino ma aano, e tele ina tatou taulaʻi atu i “mea e vaaia,” po o o tatou popolega faaletino lea e lē tumau. (Faitau le 2 Korinito 4:18.) E masani ona faaaogā e Satani lenā faanaunauga ma uunaʻia ai i tatou ia avea ma tagata e mafaufau faaletino. Ina ia fesoasoani iā i tatou e teena na faaosoosoga, ua saunia ma le alofa e Ieova faamatalaga e pei o le valoaga a Esekielu, e faamanatu mai ai iā i tatou le malualii o le aiga faalelagi o Ieova!

13, 14. (a) Na faapefea ona faamatala e Esekielu uili na ia vaaia? (e) Aiseā e talafeagai ai ona faapea atu e iai uili o le nofoālii o Ieova?

¹³ Sa muamua ona uaʻi atu Esekielu i kerupi e fā, ma o le a tatou tilofaʻia i le Mataupu e 4 o lenei lomiga, po o le ā e tatou te aʻoaʻoina e faatatau iā Ieova mai i nei foafoaga ma o latou foliga ofoofogia. Peitaʻi, na vaaia e Esekielu ni uili se fā i tala ane o kerupi, ma e foliga mai o loo latou iai i tulimanu e fā o se fausaga faatafafā. (Faitau le Esekielu 1:16-18.) O nei uili e foliga mai e faia aʻe i le tasesa, o se maa tāua e mafai ona ati ai le vaai ma e lanu samasama pe samasama meamata foʻi. E pupula foliga o lenei maa matagofie.

 ¹⁴ Na matuā faamatilatila i le faaaliga a Esekielu uili o le kariota. E uigaese lenei fausaga, ona o loo faatatau atu i se nofoālii e iai ni uili! E masani ona tatou mafaufau i se nofoālii e tasi lava le mea e tū ai, ma e talafeagai lenā manatu, auā o pulega tautupu i le lalolagi e iai le mea e gata mai ai la latou pule. Peitaʻi, e matuā ese lava le pule silisili ese a Ieova mai i pulega faaletagata. E pei o le a aʻoaʻoina e Esekielu, e leai se mea e gata mai ai le pule silisili ese a Ieova. (Nee. 9:6) O le mea moni, e mafai e lenei Pule Silisili Ese ona faaoo atu lana pule i so o se mea lava!

15. O le ā na mātauina e Esekielu e faatatau i le fausaga ma le tetelē o uili?

¹⁵ Na matuā maofa Esekielu i le tetelē o uili. Na ia tusi: “E maualuluga uili ma e faapogaia ai le mataʻu.” Seʻi faaata le tepa aʻe o Esekielu agaʻi i le lagi ma vaai atu i le tetelē o nei uili pupula. Ona ia taʻua lea o se faamatalaga faaoso naunau e faapea: “Ua soo foʻi le pito i fafo o uili e fā i mata ua liʻo uma ai.” Peitaʻi, o le mea e sili ona mataʻina o le fausaga uigaese o nei uili. Ua ia faapea mai: “O foliga o uili ma o latou fausaga, e pei ua faalava le isi uili i totonu o le isi uili.” O le ā e uiga i ai?

16, 17. (a) O le ā e faailoa mai i uili taʻitasi o le kariota lea e faalava le isi uili i totonu o le isi uili? (e) O le ā e faailoa mai i le faigofie ona sui o le itulagi e agaʻi i ai le kariota a Ieova?

¹⁶ E foliga mai o uili taʻitasi na vaaia e Esekielu, e lua uili o loo tuufaatasi, ma e faalava le isi uili i totonu o le isi uili. E talafeagai lenā manatu pe a fua i le faamatalaina e Esekielu o le auala e taavavale ai nei uili: “Pe a taavavale uili, e mafai ona taavavale atu i itu uma e fā. E lē liliu i se isi itu pe a taavavale atu.” O le ā ua faailoa mai e nei uili e faatatau i le kariota faalelagi lea na vaaia e Esekielu?

¹⁷ O le maualuluga o nei uili e mafai ona oo atu ai i se mea mamao, e tusa pe e na o le faatasi ona taavili. O le mea moni, na taʻua i le faaaliga o le saoasaoa o le kariota e pei o le emo o le uila. (Eseki. 1:14) E lē gata i lea, o nei uili uigaese e mafai ona agaʻi i so o se itulagi, o se mea e maofa ai tagata inisinia ae e lē mafai ona latou faia. E mafai ona sui faafuaseʻi le itulagi e agaʻi i ai lenei kariota, e aunoa ma le tau faalemū pe tau liliu foʻi. Peitaʻi, e lē faapea ai o loo alu pogisa lenei kariota. Talu ai o loo soo nei uili i mata, e faailoa mai ai o loo iloa lelei e le kariota mea uma o loo agaʻi i ai i so o se itulagi.

18. O le ā e tatou te aʻoaʻoina mai i le tetelē o uili ma le tele o mata ua soo ai?

¹⁸ O lea la, o le ā na aʻoaʻo atu e Ieova iā Esekielu ma tagata faamaoni uma e faatatau i le vaega faalelagi o Lana faalapotopotoga? Seʻi o tatou toe tilofaʻia mea ua tatou aʻoaʻoina. E mamalu ma ofoofogia, e pei ona faailoa mai i le pupula o uili ma lo latou tetelē. E mafai ona iloaina mea uma, e pei ona faailoa mai i le tele o mata ua soo ai uili. E silafia e fofoga o Ieova mea uma lava. (Faata. 15:3; Iere. 23:24) E lē gata i lea, e faitau miliona  ana agelu e na te auina atu i so o se vaipanoa, ma e latou te mataʻituina mea o loo tutupu, ma toe faailoa atu i lo latou Pule Silisili Ese.—Faitau le Eperu 1:13, 14.

19. O le ā e tatou te aʻoaʻoina e faatatau iā Ieova ma le vaega faalelagi o lana faalapotopotoga mai i le saoasaoa o le kariota ma le faigofie ona sui o le itulagi e agaʻi i ai?

¹⁹ Ua tatou aʻoaʻoina foʻi e matuā saoasaoa le kariota ma e faigofie ona sui le itulagi e agaʻi i ai. E telē le eseesega o le vaega faalelagi o le faalapotopotoga a Ieova ma faigāmalo ma faalapotopotoga faaletagata! E latou te mulimuli ma le pogisa i isi, ma faigatā ona fetuunaʻi i suiga e tulaʻi mai seʻia oo atu lava i le tulaga malaia ma lē toe aogā. Peitaʻi, ua atoatoa ona faaatagia mai e le kariota a Ieova le fetuutuunaʻi ma le magafagafa o le Atua o loo faatonutonuina lenei kariota. E pei ona faaalia mai i lona suafa, e mafai ona avea o ia ma so o se mea e manaʻomia ina ia faataunuu ai lona finagalo. (Eso. 3:13, 14) O se faaaʻoaʻoga, e mafai ona avea vave o ia ma Toa malosi e tau mo ona tagata. Peitaʻi, e mafai foʻi ona vave suia o ia e avea ma sē e alofa mutimutivale e faamagaloina agasala, e tausia ma toe faafoʻisia tagata agasala lotonutimomoia ua faaalia le salamō.—Sala. 30:5; Isa. 66:13.

20. Aiseā e tatou te maofa ai i le kariota a Ieova?

²⁰ I lenei vaega o le faaaliga a Esekielu, e uunaʻia ai i tatou e fesili ifo, ʻPo ou te lē maofa ea i le kariota a Ieova?’ Ia tatou manatua, o loo faaatagia mai e le kariota se mea moni o loo tupu i lenei taimi. E lē tatau ona tatou mafaufau e lē o iloa mai e Ieova, lona Alo, ma agelu uma faafitauli o loo tatou lotovaivai ai. Ia aua foʻi neʻi o tatou popole e faapea e tuai ona tali mai le Atua i o tatou manaʻoga, pe e lē fetuutuunaʻi lana faalapotopotoga i luʻi fou e tulaʻi mai i lenei lalolagi femoumouaʻi. E lelei ona tatou manatua, o loo gaoioi ma agaʻigaʻi i luma le faalapotopotoga a Ieova. O le mea moni, na faalogoina e Esekielu se alaga mai le lagi e faapea: “Uili e!” E foliga mai o se faatonuga mo uili ina ia sauniuni e gaoioi. (Eseki. 10:13) Pe e lē o se mea mataʻina ea le manatunatu i le auala o loo faagaoioi ai e Ieova lana faalapotopotoga? Peitaʻi, o le itu e sili ona tatou maofa ai, o Ieova lava ia!

21, 22. O le ā o loo tuufaatasia vaega uma o le kariota?

²¹ A o vaai atu Esekielu i luga aʻe o nei uili maualuluga, na ia iloa ai “se mea e pei o se fola e feʻilafi e pei o se aisa matagofie ma mataʻina.” (Eseki. 1:22) I luga aʻe o ulu o kerupi, o loo taatia ai se fola e feʻilafi lona pupula ma e ati ai le vaai. I lenei vaega o le faaaliga, atonu e tele ni fesili a se tagata faitau e faatatau i le kariota. O se faaaʻoaʻoga, atonu e taumānatu nisi: ʻO le ā o loo taofia ai le fola i luga aʻe o uili? E faapefea ona taavavale uili e aunoa ma ni sooga e pipii faatasi ai?’ Ia manatua, e ese le auala  e gaoioi ai lenei kariota mai i se kariota faaletino, auā e faafaatusa ma e faaata mai ai le tulaga moni o mea i le lagi. Ia mātau foʻi faamatalaga tāua nei: “O le agaga lea o loo uunaʻia ai foafoaga agaga, ua iai foʻi i uili.” (Eseki. 1:20, 21) O le ā le agaga o loo uunaʻia ai nei kerupi ma uili?

²² E mautinoa o le agaga paia o Ieova, o le mana e sili ona malosi i le aoao o mea. O lenā mana galue o loo tuufaatasia, faagaoioia, ma faatonutonuina i se auala lelei atoatoa le kariota. O lea, seʻi o tatou tulimataʻia Esekielu a o ia tepa aʻe i Lē o loo faatonutonuina le kariota.

23. O ā faaupuga na faaaogā e Esekielu e taumafai e faamatala ai Ieova, ma aiseā?

²³ Faitau le Esekielu 1:26-28. A o faamatalaina lenei faaaliga, e masani ona faaaogā e Esekielu faaupuga nei: “e foliga e pei,” “e foliga mai,” “e pei,” ma “se mea e pei.” Peitaʻi i fuaiupu nei, na tele atu taimi na faaaogā ai e Esekielu nei faaupuga. E foliga mai o loo ia taumafai e saʻilia ni upu e faamatala ai vaaiga e toetoe lava ina lē mafaamatalaina. Na ia vaaia “se mea e foliga mai e pei o se maa safaira, lea e pei o se nofoālii.” Pe e mafai ona e faaata se nofoālii e vaneina mai i se safaira lanu moana  telē? O luga o lenā nofoālii o loo afio ai se tasi “e foliga e pei o se tagata.”

24, 25. (a) O le ā ua faamanatu mai iā i tatou e le nuanua o loo siʻomia ai le nofoālii o Ieova? (e) Na faapefea ona aafia nisi o tane faatuatua i faaaliga faapena?

²⁴ E leʻi iloa lelei atu ona foliga mamalu, auā ua pei le pupula o Ieova o se afi ua mumū mai i ona puimanava e agaʻi i luga, ma mai i ona puimanava e agaʻi i lalo. Seʻi o tatou faaata le perofeta a o ia taumafai e pulapula atu ma pupuni ona mata ina ia iloa atu lenei vaaiga mamalu. Na sosoo ma le vaaia e Esekielu o se isi vaaiga ofoofogia: “Ua iai le pupula ua siʻomia ai o ia e pei o se nuanua i se ao i le aso timuga.” Pe e lē faagaeetia oe i le taimi e te vaai ai i se nuanua? Maʻeu se faamanatuga mataʻina o le mamalu o Lē na foafoaina i tatou! O lenā vaaiga felanulanuaʻi ma toʻafilemu i le lagi, ua faamanatu mai ai le feagaiga o le filemu a Ieova ina ua mavae le Lolo. (Kene. 9:11-16) E ui i le mana o Ieova le Atua e ona le malosi uma lava, ae o ia o le Atua o le filemu. (Epe. 13:20) O le filemu o se tasi o ona uiga, ma e na te foaʻi atu le filemu i ē uma e tapuaʻi iā te ia ma le faamaoni.

²⁵ O le ā se aafiaga o le vaaia o le faaataga o le mamalu o Ieova le Atua? Na faamatala e Esekielu le mea na tupu: “Ina ua ou vaai i ai, ona ou faapaʻū faō lea.” Na faapaʻū i lalo Esekielu ona o lona maofa ma le mataʻu i le Atua. E faapena foʻi aafiaga na oo i isi perofeta na mauaina faaaliga mai iā Ieova; na latou lagona le faatauvaa po o le atuatuvale foʻi. (Isa. 6:1-5; Tani. 10:8, 9; Faaa. 1:12-17) E ui i lea, a o faagasolo taimi, na matuā faamalosia nei tane i mea na faaali atu e Ieova iā i latou, ma e mautinoa e faapena foʻi Esekielu. O ā aafiaga e oo iā i tatou pe a faitau i tala faale-Tusi Paia e pei o nei tala?

26. Na faapefea ona faamalosia Esekielu i le faaaliga na ia vaaia?

²⁶ Pe afai na tau masalosalo pe tau faaluafesasi Esekielu ona o le tulaga o tagata o le Atua i Papelonia, e mautinoa na faamalosia o ia i lenā faaaliga. E manino mai e tusa po o fea e iai tagata faamaoni o le Atua, po o Ierusalema, Papelonia, po o se isi mea, ae e mafai lava ona oo i ai le kariota ofoofogia a Ieova! E matuā lē mafai lava e le malosi o Satani ona tetee atu i le Atua, o lē o loo faatonutonuina lenei faalapotopotoga mamalu faalelagi. (Faitau le Salamo 118:6.) Na vaaia foʻi e Esekielu, e lē o mamao lenei kariota mai i tagata talu ai e oo mai ona uili i le lalolagi. (Eseki. 1:19) O lea, na matuā naunau Ieova i ona tagata faamaoni na ave faapagota. Na oo atu iā i latou i taimi uma le tausiga alofa a lo latou Tamā!

27. O le ā le uiga o le faaaliga a Esekielu mo i tatou i aso nei?

²⁷ Pe e iai se uiga o le faaaliga a Esekielu mo i tatou i aso nei? E mautinoa e iai! Ia manatua, ua matuā faateteleina osofaʻiga a Satani i le tapuaʻiga mamā iā Ieova. E naunau o ia e faatalitonu  i tatou ua tuua ma faaesea i tatou, ma e lē mafai ona oo mai iā i tatou le fesoasoani a lo tatou Tamā i le lagi ma lana faalapotopotoga. Ia aua lava neʻi aafia o tatou loto ma mafaufau i na pepelo! (Sala. 139:7-12) Atonu e tatou te lē faapaʻuʻū faō e pei ona faia e Esekielu, ae e tele māfuaaga e tatou te maofa ai. Pe e tatou te lē matuā maofa ea i le malosi, saoasaoa, fetuutuunaʻi, faigofie ona fesuiaʻi itulagi e agaʻi i ai, ma le matuā mamalu o le vaega faalelagi o le faalapotopotoga a Ieova i le aoao o mea?

28, 29. E faapefea ona iloa le agaʻi i luma o le kariota a Ieova i le 100 tausaga ua mavae?

²⁸ Ia manatua foʻi, e iai le vaega faalelalolagi o le faalapotopotoga a Ieova, ma e faia aʻe i tagata lē lelei atoatoa. Ae seʻi mafaufau i mea ua faataunuuina e Ieova i le lalolagi. Ua uunaʻia e Ieova tagata faatauvaa i le lalolagi aoao e faia mea e lē mafai ona faia i so latou lava malosi. (Ioa. 14:12) Pe a tilofaʻia le tusi Ua Pule le Malo o le Atua!, e faamanatu mai ai iā i tatou le maoaʻe ua oo atu ai le galuega talaʻi i le 100 tausaga ua mavae. E faamanatu mai ai foʻi iā i tatou taumafaiga a le faalapotopotoga a Ieova i le aʻoaʻoina o Kerisiano moni, manumalo i faamasinoga, ma e oo lava i le faaaogāina o tomai faaonapōnei e faataunuu ai le finagalo o le Atua!

²⁹ O lo tatou iloiloina o mea uma na faia ina ia toe faafoʻisia ai le tapuaʻiga mamā i aso e gata ai o lenei faiga leaga o mea, e matuā manino mai ai o loo agaʻi i luma le kariota a Ieova. O se faaeaga tautele le auaufaatasi ma lenei faalapotopotoga ma auauna i le Pule Silisili Ese!—Sala. 84:10.

30. O le ā o le a tatou talanoaina i le mataupu o loo sosoo mai?

³⁰ E tele isi mea e tatou te aʻoaʻoina mai i le faaaliga a Esekielu. I le mataupu o loo sosoo mai, o le a tatou talanoaina ai “foafoaga agaga” ofoofogia e toʻafā, po o kerupi. O le ā e tatou te aʻoaʻoina mai iā i latou e faatatau i lo tatou Pule Silisili Ese mamalu, o Ieova le Atua?