Pe a iai sau uō e te viiviia ma faaaloalo i ai, e te taumafai ia avea oe pei o ia. Ua faapea mai le Tusi Paia, “O Ieova e agalelei ma amiotonu ia.” (Salamo 25:8) Ina ia avea ma uō a le Atua, e ao ona tatou amio lelei ma amiotonu. Ua fai mai le Tusi Paia: “Ia faaaʻoaʻo outou i le Atua, faapei o le fanau pele; ma ia savavali i le alofa.” (Efeso 5:1, 2) O nisi nei o auala e faia ai lena mea:

Ia loto fesoasoani atu i isi. “Ia tatou agalelei . . . i tagata uma lava.”​—Kalatia 6:10.

Ia galue mamafa. “O lē gaoi aua neʻi toe gaoi, a e lelei ina faamalosi o ia i galuega a ona lima i mea aoga.”​—Efeso 4:28.

Ia tausia le mamā faaletino ma le mamā tauamio. “Ia tatou faamamā ia te i tatou i mea uma e leaga ai le tino atoa ma le agaga, ia faaatoatoaina lo [tatou] faapaiaina i le mataʻu i le Atua.”​—2 Korinito 7:1.

 Ia feagai ma tagata o lou aiga i le alofa ma le faaaloalo. “Ia taitasi outou ma alofa i lana lava avā faapei o ia lava ia te ia; o le fafine foi ia ava o ia i lana tane. O outou le fanau, ia outou faalogo i o outou mātua.”​—Efeso 5:33–6:1.

Ia faaali atu le alofa i isi. “Ia tatou fealofani; auā mai le Atua le alofa.”​—1 Ioane 4:7.

Ia usiusitai i tulafono o le atunuu. “Ia usiusitai tagata uma i [pulega faalemalo] . . . ia avatu i tagata uma lava a latou mea; o le lafoga i e ua tatau i ai le lafoga.”​—Roma 13:1, 7, LF.