E faaaluina se taumafaiga ina ia faia ai se uō; e faaaluina foʻi se taumafaiga ina ia faaauau ona avea pea se tasi ma au uō. O au taumafaiga ina ia avea ma tumau ai i le avea o se uō a le Atua o le a matuā faamanuiaina lava. Na fetalai Iesu ia i latou o ē sa talitonu ia te ia e faapea: “E tuu saʻoloto foi outou e le upu moni.” (Ioane 8:32) O le ā le uiga o lena mea?

E mafai ona e mauaina le saʻolotoga i le taimi nei. E mafai ona tuusaʻoloto oe mai aʻoaʻoga sesē ma pepelo ua faasalalauina e Satani. E mafai ona faasaʻolotoina oe mai le leai o se faamoemoe o faapea ona faatumulia ai olaga o le faitau miliona o tagata latou te lē o iloa Ieova. (Roma 8:22) O uō a le Atua ua oo foʻi lava ina tuusaʻoloto i latou mai le “mataʻu i le oti.”​—Eperu 2:14, 15.

E mafai ona e mauaina le saʻolotoga i le lalolagi fou a le Atua. Maʻeu se saʻolotoga ofoofogia e mafai ona e olioli ai i le lumanaʻi! I le lalolagi Parataiso, o le a iai le saʻolotoga mai taua, faamaʻi, ma solitulafono. Saʻolotoga mai le mativa ma le fia ʻai. Saʻolotoga mai le tino matua ma le oti. Saʻolotoga mai le mataʻu, pulega sauā, ma le lē faamasinotonu. Ua faapea mai le Tusi Paia e faatatau i le Atua: “O loo e faamafola lou aao, ma faamaoona le manao o mea ola uma lava.”​—Salamo 145:16.

O uō a le Atua o le a ola e faavavau. O le ola e faavavau o se meaalofa sili ona tautele o le a tuuina atu e le Atua ia i latou uma o ē e sailia lana faauōga. (Roma 6:23) Seʻi mafaufau i le mea e uiga i ai le ola e lē uma mo oe!

O le a e maua le taimi e faia ai le tele o mea. Atonu o le a e manaʻo e aʻoaʻoina le tāina o se meafaifaaili. Pe atonu e te manaʻo e aʻoaʻo ia iloa vali ata pe avea o se kamuta. Atonu e te manaʻo e aʻoaʻo ia iloa ni mea e faatatau i meaola po o laau. Pe e te ono manaʻo foʻi e malaga atu e matamata i isi atunuu ma tagata eseese. O le mauaina o le ola e faavavau o le a mafai ai ona faia nei mea uma!

O le a e maua le taimi e faauō ai i le toʻatele. O le ola e faavavau o le a mafai ai ona faamasani atu i le toʻatele o isi o ē ua avea ma uō a le Atua. O le a oo ina e iloa ai a latou tomai ma uiga lelei, ma o le a avea foʻi i latou ma au uō. O le a e alofa ia i latou ma o le a latou alolofa atu foʻi ia te oe. (1 Korinito 13:8) O le mauaina o le ola e lē uma o le a avatu ai ia te oe le taimi e faauō atu ai i tagata uma o i le lalolagi! Ae o le sili o na mea uma, o le a atili malosi ai ona faatupulaʻia le lua faauōga ma Ieova a o mavae atu le tele o senituri. Talosia ia avea oe ma uō a le Atua e faavavau!