O le avea ma uō a le Atua o le mea aupito sili ona lelei lea e oo ia te oe. O le a aʻoaʻoina oe e le Atua i le auala e mafai ai ona e fiafia ma saogalemu; o le a ia faasa‘olotoina oe mai le tele o talitonuga sesē ma faiga e faaleagaina ai. O le a faafofoga mai o ia i au tatalo. O le a fesoasoani o ia ia te oe ina ia e mauaina le to‘afilemu ma le mautinoa o le loto. (Salamo 71:5; 73:28) O le a lagolago le Atua ia te oe i taimi o faafitauli. (Salamo 18:18) Ma e ofo atu e le Atua ia te oe lana meaalofa o le ola e faavavau.​—Roma 6:23.

A o e mafuta vāvālalata atu i le Atua, o le a e mafuta vāvālalata atu foʻi i uō a le Atua. O le a avea foʻi i latou ma au uō. O le mea moni, o le a pei i latou o ni uso, tuafāfine ma tuagane ia te oe. O le a latou fiafia e aʻoaʻo oe e uiga i le Atua ma o le a latou fesoasoani ma faalaeiau ia te oe.

Tatou te lē tutusa ma le Atua. A o e sailia le faauōga a le Atua, e ao ona e malamalama i se mea moni tāua. O le faauōga ma le Atua e lē o se faauōga i le va o ē e tutusa. E silisili atu ona matua, atamai ma malosi le Atua na i lo tatou. Ua ono ma tatau ona fai o ia ma o tatou Pule. O lea afai e fia avea i tatou ma ana uō, e ao la ona tatou faalogologo atu ia te ia ma fai le mea e fetalai mai ai o ia tatou te faia. O le faia faapea o le a iʻu lelei mo i tatou i taimi uma.​—Isaia 48:18.