MANILA i Filipaina—O le afā o Haiyan (po o Yolanda i le faa-Filipaina) o se tasi lea o afā e pito i sili ona malosi na faaleagaina ai vaipanoa o Filipaina iā Novema 8, 2013.

Iā Novema 13, 2013, na lipotia mai ai e le ofisa o le lālā o Molimau a Ieova i Filipaina e faapea, e toʻa 27 Molimau na faamaonia ua maliliu. E silia i le 100 fale o Molimau a Ieova ma nofoaga e lima mo tapuaʻiga na faaleagaina ai.

Ua faamaopoopo e le Vaega Pule o Molimau a Ieova i lo latou ofisa ulu i Brooklyn, i Niu Ioka, se vaega e gafa ma mataupu tau fesoasoani laveaʻi i taimi o mala faalenatura. O se tasi o vala o nei faatulagaga, na taumafai le ofisa o le lālā i Filipaina e auina atu meaʻai, vai, o mea mo togafitiga faafomaʻi, ma isi mea e manaʻomia i nofoaga na aafia. E oo ane i le Aso Sa, Novema 10, pe tusa ma le 10 veni na tumu i fesoasoani laveaʻi na auina atu i nofoaga na aafia, faatasi ai ma isi loli ua uma ona uta ua sauni e auina atu i le aso na sosoo ai.

O le taimi lea o loo mafatia pea tagata Filipaina ona o le mafuiʻe e 7.2 le malosi, lea na lūlū iā Oketopa 15, 2013, ma e 218 tagata na maliliu ai. Na lipoti mai e toʻatolu Molimau a Ieova na maliliu ai i lenei mafuiʻe malosi, o le toʻatasi na maliu ina ua solo le palapala, a o le isi toʻalua na maliliu i totonu o o la fale ina ua malepe i lalo. Na lūlū le mafuiʻe ae faatoʻā uma atu le afā malosi o Nari, lea na taia ai Filipaina iā Oketopa 12, 2013, ma e 13 i latou na maliliu ai.

E taulima e le Vaega Pule o Molimau a Ieova tupe faaalu mo galuega fesoasoani laveaʻi, e ala i le faaaogā o foaʻi na maua mai mo le galuega i le lalolagi aoao. E iloilo foʻi e le Vaega Pule le manaʻoga mo ni tagata tauofo e i ai tomai faapitoa, ma galulue faatasi ma ofisa o lālā i le lalolagi aoao ina ia maua ni tagata faigaluega agavaa e fesoasoani i galuega laveaʻi, ma felagolagomaʻi ma tagata o le malo ma isi faalapotopotoga e saunia fesoasoani laveaʻi.

Na faapea mai Dean Jacek o se sui o Molimau a Ieova i Filipaina: “E matou te matuā faanoanoa uma ona o le toʻatele o ē ua maliliu ona o nei mala mataʻutia na tutupu. E matuā manaʻomia ni faamāfanafanaga pe a manatu i le tele o mea ua faaleagaina, faapea faalogona mafatia o ē ua aafia. O le a faaauau ona matou faia le mea sili ina ia saunia pea fesoasoani laveaʻi faapea le fesoasoani faaleagaga mo a matou uō ma tuaoi.”

Media Contact(s):

International: J. R. Brown, Office of Public Information, tel. +1 718 560 5000

Philippines: Dean Jacek, tel. +63 2 411 6090