Ua atoa nei le tausaga o faagasolo le faamasinoga o Arkadya Akopyan, o se tagata suʻisuʻi litaea ua 70 tausaga le matua, ma o ia foʻi o se Molimau a Ieova, i moliaga o le faia o gaoioiga faatupu vevesi. Afai e faamaonia, o le a faasala loa o ia i se faasalaga mamafa tau tupe po o le oo atu i le fā tausaga e faafalepuipui ai.

O loo tuuaʻia e lōia a le Malo ia Akopyan i le “faatupuina o le feitagaʻi i le va o tapuaʻiga,” lea e faavae i sana lauga faale-Tusi Paia na faia i le Maota mo Sauniga i le vaipanoa lea ua tele tausaga o auai ai. A o faia le faamasinoga, na faalagolago lōia a le Malo i molimau lē saʻo a ni tagata se toʻaono e lē o ni Molimau a Ieova. Na latou faapea mai na faia e Akopyan ni faamatalaga faalumaluma i lana lauga, ma na ia tuuina atu iā i latou ni lomiga “faatupu vevesi” ina ia tufa atu i isi.

Na teena e Akopyan ma isi e iloa lelei o ia na tuuaʻiga. Sa tuuina atu foʻi e le lōia a Akopyan i le faamasinoga, faamaoniga o le leai ma se isi o le toʻaono lea na faia tuuaʻiga na latalata atu i le Maota, lea na latou faapea mai na fai ai le lauga a Akopyan. E faaopoopo atu i lenā, e lē soona tuuina atu e Molimau a Ieova ni lomiga i nisi e lē o ni Molimau mo le tufatufaina atu. Ina ua fesiligia e le faamasinoga le avā a Akopyan o Sonya e lē o se Molimau a Ieova, na ia taʻua ai ua 40 tausaga talu ona faaipoipo ma lona toʻalua, ma e na te leʻi faamalosia lava se tasi o ona tauaiga e avea ma Molimau a Ieova.

Na faatonuina e le faamasino o Oleg Golovashko se suʻesuʻega māeʻaeʻa e iloilo ai faamatalaga na faia e Akopyan i lana lauga, ina ia iloa ai pe na ia ʻfaatupuina se feitagaʻi i le va o tapuaʻiga.’ I le toe valaauina talu ai nei o le mataupu a Akopyan iā Me 15, 2018, na faailoa mai ai e le faamasino e tatau ona uma le suʻesuʻega māeʻaeʻa iā Setema 2018, ae mo le taimi nei o le a faaauau pea le faamasinoga. O le isi toe valaauina o lenei mataupu o le a faia iā Iuni 5, ma o le a fesiligia ai Akopyan. E ui e lē o taofia Akopyan e faatali ai lona faamasinoga, ae o loo faasāina ona toe faimalaga talu mai lona faamasinoga iā Me 2017 i le Faamasinoga Faaitumalo a Prokhladny.

Na faapea mai Gregory Allen o se Faufautua Lagolago ma se Lōia mo Molimau a Ieova: “O Akopyan o se tasi o ē na aafia i le soona faaaogāina ma le lē tatau e Rusia o ana tulafono e faatatau i faiga faatupu vevesi faasaga i Molimau a Ieova. O ia ua na o se tagata lē sala ma o se tagatānuu tausi tulafono, e na o le pau le mea e manaʻo ai o le tapuaʻi filemu i le Atua. O le avea o Molimau a Ieova ma taulaʻiga lē tonu a le Malo, ua faamataʻuina ai Molimau ma aveesea ai le autasi i le va fealoa‘i i totonu o le atunuu.”

O Akopyan o le Molimau lona lua lea i Rusia ua faasalaina ma le lē tonu ona o “gaoioiga faatupu vevesi.” Na amataina iā Fepuari 2018 le faamasinoga faasolitulafono o Dennis Christensen, o se Molimau i Oryol. E pe ā nei o le tausaga talu ona taofia o ia e faatali ai lona faamasinoga, ma e ono oo atu i le sefulu tausaga i le falepuipui pe a faamaonia. * E toʻafitu isi Molimau o loo taofia e faatali ai o latou faamasinoga i nisi o vaipanoa o Rusia, peitaʻi e leʻi faia i ai ni moliaga aloaʻia.