E lē o faavaivai o tatou uso ma tuafāfine i Ukraine e fesoasoani i o latou uso tapuaʻi. O loo faaauau ona latou faaalia le alofa lē manatu faapito o le tasi i le isi.

E 81 tausaga o le tuafafine o Olena. Iā Iuni 6, na pā ai se pomu i se nofoaga e lē mamao ese mai i lona fale. Na matuā faaleagaina ai le fale o lona tuaoi, ma māfua ai ona iai se pū e fitu mita (23 futu) le loloto. O le malosi o le pomu na faaleagaina ai se vaega tele o le fale o le tuafafine o Olena.

Na ia faapea mai: “A o oʻu moe, na paʻū mai le puipui toeitiiti lava maua ai loʻu ulu. Na matuā pogisa ma na iai se pefu mafiafia. Na paepae solo fasi tioata ma maa. Na ou faafetai iā Ieova ona o lea ou te ola.” I nai minute talu ona pā le pomu, ae taunuu ane loa uso ma tuafāfine i lenā vaipanoa e vaai le tuafafine o Olena, e aofia ai se uso na tele se vaega o lona fale na faaleagaina. Na faamatala atili e le tuafafine o Olena: “Ina ua taunuu uso na latou matuā lē magagana. Na matuā faalaeiauina aʻu ina ua ō mai, ma e ese le manaia o lo matou faatasitasi.”

Na taʻua e Serhii, o se toeaina e masani ona asiasi ma isi talavou o la latou faapotopotoga i le tuafafine o Olena e faapea: “Na matuā ou fefe lava ma popole ina ua ou iloa na pā se pomu e latalata i le fale o le tuafafine o Olena. Na faatoʻā ou toʻa ina ua ou vaaia e lē tugā ona manuʻaga. O le mea e mataʻina ai, na manaʻo le tuafafine o Olena e aveese muamua mai lava i lona fale lea ua faaleagaina, le lomiga faale-Tusi Paia na maua i ni nai aso talu ai.”

O se mea e faafetai ai, ona na maua e ona tauaiga se fale mo ia. O loo faaauau foʻi ona avatu e le faapotopotoga fesoasoani manaʻomia, ma e fesootaʻi toeaina ma le tuafafine o Olena i aso taʻitasi. Na avatu foʻi e uso ma tuafāfine ni mea faalogo (hearing aids) ina ia maua ai e Olena aogā mai i sauniga. Na ia faapea mai: “E iai taimi ou te lagona ai le vaivai, ae o le sauniga e toe maua ai loʻu malosi. E masani a ona vili mai uso, ma o se mea ou te matuā lotofaafetai ai.”

Na faamatala e se ulugalii na iai faatasi ma isi tagata talaʻi e toʻa 200 sa nonofo i le potu pito i lalo o se Maota mo Sauniga. Na tusi le tuafafine: “Na matuā ou talisapaia lava le tausiga na saunia e toeaina alolofa. E faamanatu mai ai iā te aʻu Tavita, na semanū e oti ina ua tau ma se leona ma se pea ina ia faasao mai ai lana mamoe. Na semanū e feoti toeaina na iai i le potu pito i lalo a o latou taumafai e ō atu e aumai ni meaʻai ma ni vai, faapea se suāuu mo a matou molī. O nei mea na mafai ai ona faia a matou sauniga ma faatasiga mo le talaʻiga. E ui lava i le matuā tele o pomu na pāpā, ae na ō atu pea nei toeaina e asiasi i uso ma tuafāfine o loo iai pea i o latou fale ma avatu meaʻai, o vai ma faalaeiau i latou. Ou te matuā faaaloalo i nei toeaina. A o leʻi tutupu nei mea, na ou vaai iā i latou o ni faiaʻoga ma o ni tagata talaʻi, a o lenei ua ou vaai iā i latou o ni leoleo mamoe maufaatuatuaina. Ou te matuā lotofaafetai i a latou faaaʻoaʻoga o le lototele, manatu mamafa, ma le maufaatuatuaina!”

Na tusi ni tagata talaʻi o se faapotopotoga i Ukraine i le lālā i Ukraine e faatatau i uso na taʻimua e avatu fesoasoani laveaʻi: “Ua faatumulia i matou i le lotofaafetai. E matou te maofa i le auala na tausia ai i matou e Ieova e ala mai i o tatou uso. Ua matou tofo i le moni o fetalaiga a Iesu: ʻO le mea lea e iloa ai e tagata uma o oʻu soo outou, pe afai ua outou alolofa o le tasi i le isi.’”—Ioane 13:35.

O vaega nei na lipotia mai i Ukraine talu mai Iuni 21, 2022. O nei faamaumauga na faavae i lipoti na tuuina mai e uso o loo i Ukraine. Atonu e sili mamao atu le faitau aofaʻi e tatau ona iai, ae ona o le faigatā o fesootaʻiga i vaipanoa uma o le atunuu.

• E toʻa 42 tagata talaʻi ua maliliu

• E toʻa 83 tagata talaʻi na manunuʻa

• E toʻa 31,185 tagata talaʻi ua leai ni fale e nonofo ai

• E 495 fale na matuā faaleagaina

• E 557 fale na tele vaega na faaleagaina

• E 1,429 fale e itiiti vaega na faaleagaina

• E 5 Maota mo Sauniga na matuā faaleagaina

• E 8 Maota mo Sauniga na tele vaega na faaleagaina

• E 34 Maota mo Sauniga e itiiti vaega na faaleagaina

• E 27 Komiti mo Fesoasoani Laveaʻi o loo faia galuega fesoasoani i Ukraine

• E toʻa 52,348 tagata talaʻi na fesoasoani tuusaʻo i ai le Komiti mo Fesoasoani Laveaʻi ina ia maua nofoaga saogalemu e malu i ai

• E toʻa 23,433 tagata talaʻi na sulufaʻi atu i isi atunuu ma o loo fesoasoani i ai o latou uso tapuaʻi