E faavae la matou vaaiga i aʻoaʻoga i mataupu silisili o le Tusi Paia. E faaaogā e se Molimau a Ieova lona lotofuatiaifo ua uma ona toleniina i le Tusi Paia, e iloilo ai pe faapefea ona faatatau mataupu silisili mai i le Atua e pei o nei. a

•  E tāua aʻoaʻoga

•  Ia iai se vaaiga paleni e faatatau i aʻoaʻoga

•  O aʻoaʻoga maualuluga e mafai ona iʻu atu ai i lamatiaga tauamio ma le faaleagaga

•  Pe e fai ni aʻoga Aso Sa a Molimau a Ieova?

 E fesoasoani aʻoaʻoga i se tasi ina ia maua ai le “atamai aogā ma le mafaufau lelei,” o ni uiga o loo matuā faatāua i le Tusi Paia. (Faataoto 2:​10, 11; 3:​21, 22) E lē gata i lea, na faatonuina e Iesu ona soo ina ia aʻoaʻo isi i mea na ia faatonuina atu. (Mataio 28:19, 20) O lea, e matou te faalaeiau ma fesoasoani i tagata i a matou faapotopotoga ina ia maua ni tomai mai i aʻoaʻoga, e aofia ai le iloa faitau, tusitusi, auala e fesootaʻi ai, b faapea le tomai e malamalama ai i isi tapuaʻiga ma aganuu.​—1 Korinito 9:​20-​22; 1 Timoteo 4:​13.

 E iloa foʻi e faigāmalo le tāua o aʻoaʻoga, ma e masani ona latou faamautinoa ua maua e fanau le avanoa e aʻoʻoga ai i aʻoga tulagalua ma kolisi. E matou te usitaʻia na tulafono ona e ōgatusa ma le faatonuga lenei: “Ia gauaʻi tagata uma i faipule silisili,” po o faigāmalo. (Roma 13:1) E matou te faalaeiauina foʻi a matou fanau ina ia toʻaʻaga ma fai le mea sili e latou te mafaia i le aʻoga, nai lo o le tau ina auai i le aʻoga. c Ua faapea mai le Afioga a le Atua: “O so o se mea e tou te faia, ia galue i ai ma le lotoatoa, e pei o loo outou galulue mo le Alii ae e lē mo tagata.”​—Kolose 3:​23, Good News Translation.

 E fesoasoani aʻoaʻoga e matou te saunia ai le tausiga mo o matou aiga. E tusa ai ma le Tusi Paia, “afai e lē tausi e se tasi i ē e tatau ona ia tausia, aemaise lava tagata o lona aiga, ua faafitia e ia le faatuatua, ma e sili lona leaga i lo le tagata e lē faatuatua.” (1 Timoteo 5:8) E fesoasoani aʻoaʻoga e mafai ai ona matou faataunuuina lenei tiute tauave paia o le tausiga o aiga. E pei ona taʻua i le The World Book Encyclopedia, o se fuafuaga autū o aʻoaʻoga, ina ia “avea ai tagata o ni ē e tomai i le faia o galuega . . . o ni ē e galulue mo le tamaoaiga.” O se tagata tomai e lelei ana aʻoaʻoga, e mafai ona sili atu ona lelei ma maufaatuatuaina i le tausiga o lona aiga, nai lo o se isi e leai ni tomai ma e leʻi aʻoga.​—Faataoto 22:29.

 E saunia foʻi e mātua le tausiga mo a latou fanau e ala i le sauniunia o i latou i le avea ai ma tagata matutua, ma o le ave o fanau i aʻoaʻoga o se vala tāua e faia ai faapea. (2 Korinito 12:14) E matou te faalaeiauina mātua e ave a latou fanau i le aʻoga e tusa pe e totogi aʻoaʻoga i nofoaga o loo latou nonofo ai, pe faigatā ona maua, pe e lē o se mea masani foʻi i a latou aganuu le ō i le aʻoga. d E matou te saunia foʻi fautuaga aogā i le auala e fesoasoani ai mātua i aʻoga a le fanau. e

 E matou te iloilo ma le faaeteete aʻoaʻoga e matou te filifilia. Ua faapea mai le Tusi Paia: “E faatuatua le tagata ua leai se poto masani i upu uma, a o le tagata e iai le utaga mamao, e na te iloilo lelei ona laasaga.” (Faataoto 14:15) E matou te faatatauina lenei mataupu silisili e ala i le iloilo lelei o isi aʻoaʻoga faaopoopo pe a uma le kolisi, lea e aofia ai le tau ma le tāua o le toleniga e maua mai ai. O se faataʻitaʻiga, o le aʻoaʻoina o se tomai faapitoa e masani lava e sili atu aogā e maua mai ai, ae puupuu le taimi e alu ai.

 E tāua atu aʻoaʻoga faaleagaga nai lo o le aʻoaʻoina o le poto salalau. E ese mai i le aʻoaʻoina o le poto salalau, o aʻoaʻoga faaleagaga e faavae mai i le Tusi Paia, e maua ai le poto e uiga i le Atua lea e faasaoina ai le ola. (Ioane 17:3) E aʻoaʻoina ai foʻi tapulaa mamā tauamio, e pei o le “amiotonu, o le faamasinotonu ma le amio saʻo, o ala lelei uma ia.” (Faataoto 2:9) Na oo le maualuluga o aʻoaʻoga a Paulo i aʻoga e pei o iunivesite i aso nei, ae na ia taʻutino mai “le silisili ese o le poto o Keriso Iesu.” (Filipi 3:8; Galuega 22:3) E faapena foʻi aso nei, e toʻatele Molimau a Ieova na ausia aʻoaʻoga maualuluga, ae ua latou talitonu e sili atu ona tāua aʻoaʻoga faaleagaga. f

 Ua faapea mai se faataoto i le Tusi Paia: “O lē ua iai le utaga mamao e na te iloa atu le mala ma lafi ai.” (Faataoto 22:3) E manatu Molimau a Ieova o le siʻomaga i nisi o iunivesite po o isi aʻoaʻoga maualuluga faapena, e iai ona lamatiaga tauamio ma le itu faaleagaga. O le māfuaaga lea, e filifili ai le toʻatele o Molimau a Ieova e ʻalofia le iai po o le iai foʻi o a latou fanau i na ituaiga siʻomaga. E latou te manatu, e tele ina faaauiluma i na aʻoaʻoga maualuluga nisi o manatu sesē, e pei o manatu o loo mulimuli mai:

•   Manatu sesē: O tupe e maua ai le fiafia ma le saogalemu

   E masani ona faaauilumaina le manatu e faapea, o le maualuluga o aʻoaʻoga, o le mautinoa foʻi lenā e maua se galuega e telē le totogi. O lea, ua faateleina ai le aofaʻi o tamaiti e ō i le iunivesite ma le sini autū, ia maua le tele o tupe. E faamoemoe nisi o tupe o le a maua ai le fiafia ma le saogalemu, ae o loo faailoa mai i le Tusi Paia le faatauvaa o lenā manatu. (Failauga 5:​10) Ae o le vala e sili ona tāua, ua aʻoaʻoina i le Tusi Paia o “le manaʻo tele i tupe o le pogai lea o mea leaga eseese uma,” ma e masani lava ona iʻu ai i le mou atu o le faatuatua. (1 Timoteo 6:​10) E faia e Molimau a Ieova taumafaiga uma ina ia ʻalofia le maileia i le “malosi taufaasesē o le ʻoa.”​—Mataio 13:22.

•   Manatu sesē: E tatau i se tagata ona saʻilia se tulaga aloaʻia lea e maua mai i aʻoaʻoga maualuluga

   O se faataʻitaʻiga, na tusi Nika Gilauri, o lē sa avea ma palemia o Georgia e faatatau i se manatu taatele i lona atunuu: “I Georgia, e manatu i se tikerī mai i se iunivesite o se mea e tatau lava ona maua. . . . [I le taimi ua teʻa,] pe a leai se faailoga tikerī o se talavou, o se luma lea i lona aiga.” g I se faaeseesega, ua lapataʻi mai le Tusi Paia faasaga i le saʻilia o ni tulaga aloaʻia i lenei lalolagi. Na fetalai atu Iesu i taʻitaʻi lotu i ona aso o ē na saʻilia tulaga mamalu: “E faapefea ona outou talitonu, pe afai tou te talia le viiga mai i tagata?” (Ioane 5:​44) O le siʻomaga i iunivesite, e faaosofia ai le uiga o le faamaualuga lea e inosia e le Atua.​—Faataoto 6:​16, 17; 1 Peteru 5:5.

•   Manatu sesē: E faatulaga e le tagata lava ia ana tapulaa i le mea e saʻo ma sesē

   E talia e Molimau a Ieova tapulaa a le Atua e faatatau i le mea saʻo ma le mea e sesē. (Isaia 5:​20) Peitaʻi, e tusa ai ma se mataupu na lomia i le Journal of Alcohol and Drug Education, o omiga mai i aumea i totonu o iunivesite, ua iʻu ai ina fai e le toʻatele o tamaiti aʻoga ni “filifiliga e feteenaʻi ma mea ua latou iloa lelei e saʻo ma sesē.” h E ōgatusa lenei manatu ma le mataupu silisili i le Tusi Paia: “O aumea leaga e faaleagaina ai mea lelei ua masani ai tagata.” (1 Korinito 15:33) O le siʻomaga i iunivesite, e taatele ma faaauiluma ai amioga e taʻusalaina e le Atua e pei o le onā, faaaogāina o fualaau faasāina, ma le faia o feusuaʻiga a o leʻi faaipoipo.​—1 Korinito 6:​9, 10; 2 Korinito 7:1.

•   Manatu sesē: O le maualuluga o aʻoaʻoga, o le auala sili lea e faaleleia ai le tulaga o le lalolagi

   Ua mātauina, e toʻatele ua auai i aʻoaʻoga maualuluga e lē ina ia maua ai le tele o le tamaoaiga, tulaga taʻutaʻua, pe faamalieina ai tuʻinanauga, ae ina ia faaleleia ai o latou tulaga ma le tulaga o le lalolagi. O na faanaunauga e lelei, ae e filifilia e Molimau a Ieova se isi auala. I le pei o Iesu, e matou te taulaʻi atu i le Malo o le Atua e na o le pau lea o le faamoemoe mo se lalolagi e sili ona lelei. (Mataio 6:​9, 10) Peitaʻi, e lē na ona matou te faatalitali i le Malo o le Atua e foʻia faafitauli o le lalolagi. Nai lo o lea, e matou faalauiloaina atu “lenei tala lelei o le malo” i le lalolagi aoao, ma fesoasoani i le faitau selau afe o tagata i tausaga taʻitasi, ina ia faia ni suiga lelei i o latou olaga. i​—Mataio 24:14.