“E tele mea matagofie na ma vaaia ina ua ma asiasi i le Peteli, ma o le a lē mafai ona galo.” O le tala lenā a se ulugalii mai i Vanuatu ina ua māe‘a ona la asiasi atu i ofisa o Molimau a Ieova o loo i Amerika. O faalogona fo‘i na o tagata e silia i le 70 afe, ia e asiasi atu i na nofoaga i tausaga ta‘itasi.

Po ua e asiasi i fale o le Peteli i Amerika? Pe afai e leai, e matou te valaaulia oe ina ia faia faapea.

Ofisa Ulu, Brooklyn, Niu Ioka. I le maimoaga, o le a e mātauina ai taumafaiga malolosi o loo faia i inei ina ia faamaopoopo ma lagolagoina ai le galuega tala‘i i le lalolagi aoao. O le a e maimoa ai fo‘i i mea eseese o loo iai i se faaaliga e faamatuaina “A People for Jehovah’s Name,” lea e faamatala ai le talafaasolopito o tagata o Ieova mai i le ulua‘i senituri se‘ia oo mai i aso nei. A o le isi faaaliga e ta‘ua “The Bible and the Divine Name,” e faaalia ai faaliliuga eseese o le Tusi Paia o loo iai le suafa tutasi o le Atua.

A‘oga Faa-Kerisiano, Patterson, Niu Ioka. Ia mātau le auala o loo fai ai a matou a‘oga inei, e pei o le A‘oga Faale-Tusi Paia a le Olomatamata o Kiliata, ma le A‘oga mo Sui o Komiti o Lālā ma a Latou Avā. O le a e maimoa ai fo‘i i ni faaaliga po o ni vitiō o loo faamatala ai galuega o loo faatinoina i ofisa, lea e aofia ai le matagaluega o Auaunaga, Tusiata, faapea le Auaunaga i Kaseti ma Vitiō.

Lomia ma le Auina Atu o Lomiga, Wallkill, Niu Ioka. Ia auai i le maimoaga ma e iloa ai le auala o loo lomia ai Tusi Paia ma lomiga faale-Tusi Paia. E te mātauina ai fo‘i le auala o loo tuufaatasia ai nei lomiga eseese ma auina atu i faapotopotoga i le Iunaite Setete, le atu Karipiane, ma isi atunuu o le lalolagi.

O le maimoaga i Brooklyn e tasi le itula; o Patterson e pe ā ma le lua itula; a o Wallkill e pe ā ma le itula ma le ‘afa.

O nei maimoaga e ave e i latou o loo galulue i matagaluega eseese o le Peteli. E latou te manatu i lenei vala, o se vaega o a latou taumafaiga ina ia lagolagoina le galuega tau a‘oa‘o atu o loo faia i le lalolagi aoao. E oo mai iā Me 2014, ua silia i le 5,000 i latou o loo galulue i nei fale tetele, ma e silia i le 3,600 i latou ua toleniina i le auala e faia ai maimoaga. O nei maimoaga e faia i le pe ā ma le 40 gagana.

E leai se totogi.

E leai. O le to‘atele o tagata e asiasi mai e lē o ni Molimau a Ieova. O nei maimoaga e mafai ai e tagata Molimau a Ieova ma ē e lē o ni Molimau, ona malamalama i taumafaiga o loo faia i se auala maopoopo, ina ia lagolago ai le galuega tala‘i i le lalolagi aoao.

E iai se fafine Musalimi mai i Initia na asiasi i Patterson. Na faapea mai o ia ina ua māe‘a lana maimoaga: “Fia fai lava so‘u sao i lenei galuega. Faafetai tele lava mo uiga faaaloalo na outou faaalia mai iā te a‘u.”

Ioe, e mafai! E telē se aafiaga lelei i fanau pe afai e asiasi mai. Na tusi Ioane, o se tasi mai i Amerika na asiasi ane: “Ina ua matou toe fo‘i i le fale, e toetoe o taimi uma e talanoa ai le fanau na matou ō faatasi, e faatatau i le maimoaga. E latou te le‘i iloa muamua pe e faape‘ī le auaunaga i Peteli, a o lenei ua fai ma o latou le sini le fia auauna ai i inā.”

Ioe. E mafai ona faia maimoaga i a matou ofisa i le tele o atunuu. Taga‘i i le matou upega tafa‘ilagi i le vaega Faamatalaga mo Ofisa ma Maimoaga ina ia maua ai isi faamatalaga atili. E matou te valaaulia ma le māfana oe ina ia e asiasi ma maimoa i se tasi o ofisa o le lālā a Molimau a Ieova.