CHIDZIDZO 38
Koshesa Chipo Cheupenyu
Upenyu hwakazara nezvinhu zvinonakidza. Kunyange kana tiine matambudziko, kazhinji pane zvimwe zvinhu zvinenge zvichitotinakidzawo muupenyu. Tingaratidza sei kuti tinokoshesa chipo cheupenyu? Ndechipi chikonzero chikuru chekuti tichikoshese?
1. Nei tichifanira kukoshesa upenyu?
Tinofanira kukoshesa upenyu nekuti chipo chatakapiwa naJehovha, Baba vedu vane rudo. Kwaari “ndiko kunobva upenyu” nekuti ndiye akasika zvinhu zvese. (Pisarema 36:9) “Ndiye anopa vanhu vese upenyu nemweya wekufema nezvinhu zvese.” (Mabasa 17:25, 28) Jehovha ndiye anotipa zvinodiwa nemiviri yedu kuti tirambe tiri vapenyu. Asi anozviita nenzira inoita kuti tinakidzwe neupenyu.—Verengai Mabasa 14:17.
2. Tingaratidza sei kuti tinokoshesa chipo cheupenyu chatakapiwa naJehovha?
Jehovha akatanga kukuda kubva pakabatwa pamuviri pako naamai vako. Dhavhidhi, mumwe munamati waMwari, akafemerwa kunyora kuti: “Maziso enyu akatondiona ndichangotanga kuumbwa.” (Pisarema 139:16) Jehovha anokoshesa upenyu hwako chaizvo. (Verengai Mateu 10:29-31.) Zvingamurwadza chaizvo kana mumwe munhu akasarudza kupfuudza upenyu, kunyange hwake pachake. a (Eksodho 20:13) Zvingamurwadza zvakare kana tichitoita zvekutamba neupenyu tichihuisa pangozi kana kuti tisingatore matanho ekuchengetedza upenyu hwevamwe. Kana tikachengetedza upenyu hwedu, tichiremekedzawo upenyu hwevamwe, tinenge tichitoratidza kuti tinokoshesa chipo chinoshamisa cheupenyu.
WEDZERA KUONGORORA
Ona zvimwe zvaungaita kuti uratidze kuti unokoshesa chipo cheupenyu.
3. Chengetedza utano hwako
VaKristu vakazvitsaurira vanoshandisa zvese zvavari pakushumira Jehovha. Vanoita sevari kupa miviri yavo sechibayiro kuna Mwari. Verengai VaRoma 12:1, 2, mobva makurukura muchishandisa mibvunzo iyi:
-
Chii chinofanira kutipa chido chekuchengetedza upenyu hwedu?
-
Ndezvipi zvaungaita kuti uchengetedze utano hwako?
4. Ngwarira zvinhu zvinogona kukuvadzisa kana kuurayisa vamwe
Bhaibheri rinotikurudzira kusaita zvinhu zvinogona kukonzera njodzi. Ngationei VHIDHIYO inoratidza zvinhu zvaunogona kuita kuti usapinde munjodzi.
Verengai Zvirevo 22:3, mobva makurukura zvaungaita kuti usakonzera njodzi . . .
-
pamba pako.
-
kubasa.
-
paunenge uchitamba mitambo.
-
paunenge uchityaira kana kuti paunokwira motokari nezvimwewo zvekufambisa.
5. Remekedza upenyu hwemwana ari mudumbu
Dhavhidhi akanyora detembo rairatidza kuti Jehovha anokoshesa upenyu hwemwana achiri mudumbu uye anocherechedza makuriro aanenge achiita. Verengai Pisarema 139:13-17, mobva makurukura muchishandisa mubvunzo uyu:
-
Kuna Jehovha upenyu hwemunhu hunotanga paanoberekwa here kana kuti panobata amai vake pamuviri?
Mitemo yakapiwa vaIsraeri naJehovha yaichengetedza amai nemwana achiri mudumbu. Verengai Eksodho 21:22, 23, mobva makurukura muchishandisa mibvunzo iyi:
-
Jehovha aiona sei munhu aiuraya mwana ari mudumbu netsaona?
-
Saka aizonzwa sei dai munhu aizviita achiziva? b
-
Unofungei nezvemaonero aMwari panyaya iyi?
Kunyange mukadzi anenge achitokoshesa upenyu angatombofunga kuti hapana zvimwe zvekuita kunze kwekubvisa pamuviri. Verengai Isaya 41:10, mobva makurukura muchishandisa mibvunzo iyi:
-
Kana mukadzi achiona sekuti ari kumanikidzwa kubvisa pamuviri, anofanira kutsvaga rubatsiro kunaani? Nei uchidaro?
VAMWE VANOTI: “Mukadzi ane kodzero yekubvisa pamuviri, nekuti munhu wese anoita zvaanoda nemuviri wake.”
-
Chii chinoita kuti uve nechokwadi kuti Jehovha anokoshesa upenyu hwaamai nehwemwana wavo achiri mudumbu?
PFUPISO
Bhaibheri rinotidzidzisa kuti tide, tiremekedze uye tichengetedze chipo cheupenyu chatakapiwa naJehovha, hungava hwedu kana kuti hwevamwe.
Kudzokorora
-
Nei Jehovha achikoshesa upenyu hwemunhu?
-
Jehovha anonzwa sei kana munhu akasarudza kupfuudza upenyu hwemumwe munhu?
-
Nei uchikoshesa chipo cheupenyu?
WEDZERA PANE ZVAWADZIDZA
Tingaratidza sei kuti tinotenda Jehovha nechipo cheupenyu chaakatipa?
Inzwa mhinduro yemubvunzo wekuti, Mwari anoregerera mukadzi akambobvisa pamuviri here?
“Bhaibheri Rinotii Nezvekubvisa Pamuviri?” (Nyaya iri paIndaneti)
Verenga unzwe kuti maonero anoita Mwari upenyu anotibatsira sei pakusarudza zvekuzvivaraidza nazvo.
“‘Mitambo Yokunyanyisa’—Unofanira Kuzviisa Pangozi Here?” (Mukai!, October 8, 2000)
Ko kana munhu aine pfungwa dzekuzviuraya? Inzwa kuti Bhaibheri ringamubatsira sei.
“Ndiri Kufunga Kuzviuraya—Bhaibheri Rinogona Kundibatsira Here?” (Nyaya iri paIndaneti)
a Jehovha ane hanya zvikuru nevanhu vakaora mwoyo. (Pisarema 34:18) Anonzwisisa kushungurudzika kunogona kuita kuti munhu ade kuzviuraya, uye anoda kubatsira. Kuti uone kuti Jehovha anogona kubatsira sei munhu kuti akunde pfungwa dzakadaro, verenga nyaya inoti; “Ndiri Kufunga Kuzviuraya—Bhaibheri Rinogona Kundibatsira Here?” iri kutaurwa muchidzidzo chino pachikamu chakanzi “Wedzera Pane Zvawadzidza.”
b Vaya vakambobvisa pamuviri havafaniri kuramba vachizvipa mhosva kana kuzvitongesa nekuti Jehovha anogona kuvaregerera. Kuti unzwe zvakawanda verenga nyaya inoti “Bhaibheri Rinotii Nezvekubvisa Pamuviri?” iri kutaurwa muchidzidzo chino pachikamu chakanzi “Wedzera Pane Zvawadzidza.”
Zvimwe Zvaunogona Kufarira
MIBVUNZO INONYANYA KUBVUNZWA
Kosi yeBhaibheri Inoitiswa neZvapupu zvaJehovha Yakaita Sei?
Paunoita kosi yeBhaibheri inoitiswa neZvapupu zvaJehovha, unogona kushandisa chero Bhaibheri raunaro. Mhuri yako neshamwari vanogona kuvapowo paunenge uchidzidza.
