VANHU VACHAPARADZA NYIKA HERE?
Mvura Yekunwa
KUDAI panyika pasina mvura, kunyanya mvura yekunwa, paisazoraramika. Zvinhu zvese zvipenyu zviri panyika zvakagadzirwa pachishandiswa zvinhu zvakawandawanda, asi mvura ndiyo inoumba chikamu chakakura. Mvura yekunwa uye yekudiridzisa zvirimwa inobva mumadhamu, munzizi, mumapani uyewo pasi pevhu.
Kukanganiswa Kuri Kuitwa Mvura Yekunwa
Chikamu chakakura chenyika yedu imvura. Asi maererano nezvakataurwa nerimwe sangano rinoona nezvemvura uye mamiriro ekunze rinonzi World Meteorological Organization, “chikamu chidikidiki chemvura yepanyika ndicho chinonwika.” Kunyange zvazvo chikamu ichi chemvura chichifanira kukwanira zvinhu zvese zvipenyu zviri panyika, yakawanda yacho iri kusvibiswa uye yava kuita shoma nemhaka yekuwandirwa uye kuchinja kwemamiriro ekunze. Vaongorori vanofungidzira kuti mumakore 30 anotevera, vanhu vanopfuura 5 bhiriyoni vachange vasisakwanisi kuwana mvura inovakwanira.
Nyika Yedu Yakasikwa Kuti Irambe Iripo Nekusingaperi
Nyika yedu yakasikwa nenzira inoita kuti panyika pagare paine mvura inokwanira zvinhu zvese zvipenyu. Uyewo ivhu, zvisikwa zvemumvura nezuva zvinoshanda pamwe chete kuti zvichenese mvura. Ona humwe uchapupu hunoratidza kuti nyika yedu yakasikwa kuti irambe iripo nekusingaperi.
-
Vaongorori vakaona kuti ivhu rinokwanisa kubvisa zvinhu zvakawanda zvinosvibisa mvura. Panewo zvimwe zvinhu zvinomera mumapani zvinonzi zvinotora mumvura makemikari akadai senitrogen, phosphorus, uye mishonga inouraya zvipembenene.
-
Nyanzvi dzesainzi dzakaongorora kuti zvimwe zvinhu zvakasikwa zvinoita sei kuti mvura igare yakachena. Zvinhu zvinosvibisa mvura zvinosangana nemvura inenge ichiyerera uye zvinobva zvanyungudutswa nemabhakitiriya.
-
Zvimwe zvisikwa zvemumvura zvakaita sehozhwa zvinonzi maclam uye mamussel zvinodya makemikari anenge ari mumvura mumazuva mashomanana. Mashandiro azvinoita anogona kutopfuura nekure mashandiro anoita michina inochenesa mvura.
-
Mvura iri panyika ndiyo inoenda mudenga yogadzira makore yobva yazonaya. Izvi nezvimwewo zvinoitika panyika ndizvo zvinoita kuti mvura irambe iripo.
Zviri Kuedza Kuitwa Nevanhu
Kana tikagadzira zvinhu kuti zvisadonhedza oiri uye tikarasa michetura nenzira yakakodzera, tinoita kuti mvura yedu yekunwa irambe yakachena
Vamwe vaongorori vari kukurudzira vanhu kuti vaedze kuchengetedza mvura. Vari kukurudzira vanhu kuti vagadzire motokari dzavo kuitira kuti dzisarasa oiri uye vasarasire mapiritsi nemishonga inouraya muchimbuzi kana mumadhireni anofamba nemvura.
Mainjiniya akatsvaga dzimwe nzira dzekubvisa sauti mumvura yemumakungwa. Vari kuita izvi kuitira kuti pave nemvura yakawanda yekunwa.
Asi izvi handizvo zvega zvichagadzirisa dambudziko racho nekuti kubvisa sauti mumvura kunodhura uye kunoda magetsi akawanda. Mushumo wakapiwa muna 2021 neSangano Remubatanidzwa Wenyika Dzepasi Rese, (United Nations) panyaya yekuchengetedza mvura yekunwa wakati: “Pasi rese, tiri kufanira kushanda zvakapetwa kaviri kupfuura zvatiri kuita iye zvino.”
Bhaibheri Rinotii?
“Mwari . . . anokwidza madonhwe emvura kumusoro; madonhwe acho anochinja kubva mumhute yake, ova mvura; makore anobva aidurura pasi; oinayisa pasi pane vanhu.” —Jobho 36:26-28.
Maitikiro anoita zvinhu zvakasikwa naMwari panyika anoita kuti mvura irambe iripo uye icheneswe kana yasvibiswa.—Muparidzi 1:7.
Funga izvi: Kana Musiki akagadzira nyika ichikwanisa kuita kuti mvura irambe yakachena, angatadza here kugadzirisa dambudziko rekusvibiswa kwemvura riri kukonzerwa nevanhu? Ona nyaya yakanzi “Mwari Anovimbisa Kuti Nyika Haisi Kuzoparadzwa,” iri papeji 15.
