NYAYA IRI PAKAVHA | KUNYENGETERA KUNOBATSIRA HERE?
Nei Vanhu Vachinyengetera?
“Upenyu hwangu hwaingova hwekubheja. Ndakambonyengetera kuti ndihwinhewo mazimari. Asi hapana chakaitika.”—Samuel, * Kenya.
“Tiri kuchikoro, taingodzokorora nemusoro minyengetero yatainge takadzidziswa.”—Teresa, Philippines.
“Ndinonyengetera pandinosangana nematambudziko. Ndinonyengetererawo kuti ndiregererwe zvivi uye kuti ndive muKristu ari nani.”—Magdalene, Ghana.
Zvakataurwa naSamuel, Teresa, naMagdalene zvinoratidza kuti vanhu vanonyengeterera zvakasiyana-siyana, zvimwe zvacho zvine musoro kupfuura zvimwe. Vamwe vanonyengetera nomwoyo wese, asi vamwe vanongoti chero ndaita. Vakawanda vanongonzwa vachida kunyengetera. Vanonyengeterera kuti vapase bvunzo dzokuchikoro, kana kuti chikwata chemutambo chavanofarira chikunde, uye kuti vatungamirirwe naMwari mumhuri mavo, nezvimwewo. Kunyange vaya vasina chitendero chavanopinda vanogara vachinyengetera.
Unonyengetera here? Zvii zvaunonyengeterera? Pasinei nekuti unogara uchinyengetera here kana kuti kwete, zvimwe unombonetseka kuti: ‘Kunyengetera kunobatsira here? Pane anoteerera here?’ Mumwe munyori akati munyengetero “inzira yekungoti urerukirwe . . . kungofanana nekutaura nehove dzatinochengeta mumagirazi pamba.” Vamwe vezvokurapa vanoonawo munyengetero “seimwe nzira yekurapa.” Vanhu vanongonyengetera nekuti ndizvo zvavakajaira here? Vanongozviita kuti vanzwe zviri nani here?
Zvisinei, Bhaibheri rinotiudza kuti munyengetero une zvimwe zvaunobatsira zvinopfuura kungoita kuti unzwe zviri nani. Rinotiudza kuti pane anoteerera minyengetero inoitwa nenzira yakarurama uye inoenderana nezvaanoda. Ichokwadi here ichi? Ngationgororei zvinoita kuti titi ichokwadi.
^ ndima 3 Mamwe mazita akachinjwa.
