Pasi rese, vanhu vakawanda vari kufarira kunzwa nyaya yekusadya nyama.

•   “Nyaya yekusadya nyama inobva pamafungiro ane vamwe vanhu ekuti hazvina kunaka kuitira mhuka utsinye, kudzidya, kana kushandisa zvinhu zvinobva padziri kugadzira zvekupfeka kana zvimwewo.”—The Vegan Society.

 Chimwewo chikonzero chinoita kuti vamwe varege kudya nyama ndechekuti vanenge vachiti vari kuchengetedza nharaunda, vanotiwo zvinobatsira pautano uye vamwe vanorega nekuda kwechitendero chavo.

•   “Kurega kudya nyama uku kwakasiyana nezvinoitwa nevanhu vachiitira utano hwavo nekuti nyaya yacho vanotoiona sekunge kuti chitendero uye vanoti kudya nyama kunoratidza kuti hauna tsitsi nemhuka. Vanotiwo kuita izvi kunobatsira pakugadzirisa matambudziko ari panyika.”—Britannica Academic.

 Kusadya nyama kuchagadzirisa matambudziko ari panyika here? Bhaibheri rinomboti kudii?

 Bhaibheri rinoratidza kuti Musiki wedu Jehovha Mwari, a anokoshesa vanhu kupfuura mhuka uye akavapa simba pamusoro pemhuka. (Genesisi 1:27, 28) Nekufamba kwakazoita nguva, Mwari akabvumira vanhu kuti vadye nyama yemhuka. (Genesisi 9:3) Asi haabvumire kuti tiitire mhuka utsinye.—Zvirevo 12:10.

 Bhaibheri rinoratidza kuti zviri kumunhu mumwe nemumwe kuti odya nyama here kana kuti orega. b Kudya kana kusadya hakuiti kuti munhu awedzere kufarirwa naMwari. (1 VaKorinde 8:8) Hapana anofanira kushora mumwe pachisarudzo chaanenge aita kuti odya nyama here kana kuti orega.—VaRoma 14:3.

 Bhaibheri rinoratidza kuti zvatinosarudza kuita muupenyu hazvifi zvakagadzirisa matambudziko ari munyika. Matambudziko akawanda ari munyika anokonzerwa nezvematongerwo enyika, kunetsana kwevanhu uye zveupfumi izvo zvisingakwanisi kugadziriswa nevanhu. Bhaibheri rinoti:

•   “Chakakombama hachigoni kutwasanudzwa.”—Muparidzi 1:15.

 Musiki wedu ndiye achagadzirisa matambudziko atiri kusangana nawo. Bhaibheri rinoshandisa mashoko ekufananidzira richitsanangura magadzirisiro aachaita matambudziko edu.

•   “Uye ndakaona denga idzva nenyika itsva; nekuti denga rekare nenyika yekare zvakanga zvisisipo, uye gungwa rakanga risisipo.”—Zvakazarurwa 21:1.

 Mwari achabvisa “denga rekare,” kureva hurumende dzevanhu odzitsiva ‘nedenga idzva,’ kureva hurumende yake yekudenga. Umambo hwake huchabvisa “nyika yekare,” kureva vanhu vakaipa uye huchatonga “nyika itsva,” kureva vanhu vanoda kutongwa neumambo ihwohwo.

 Vanhu pavanenge vava kutongwa neUmambo hwaMwari ndipo chete pavachakwanisa kugarisana nemhuka zvakanaka uye kuchengetedza nharaunda.—Isaya 11:6-9.