20 JUNE 2023
MEXICO
Bhaibheri reShanduro yeNyika Itsva yeMagwaro echiKristu echiGiriki Rakabudiswa Mumutauro wechiNahuatl (Central) Uye wechiTarascan
Musi wa9 June, 2023, Bhaibheri reShanduro yeNyika Itsva yeMagwaro echiKristu echiGiriki rakabudiswa mumutauro wechiNahuatl (Central) uye wechiTarascan. MaBhaibheri aya akabudiswa pazuva rekutanga regungano remunharaunda rine musoro unoti: ‘Iva Nemwoyo Murefu’! rakaitwa mumutauro wechiNahuatl (Central) uye wechiTarascan. Pasi apa pari kuratidza zvimwe zvakaitika pamagungano acho.
Nahuatl (Central)
Hama Sean Scribner, vari muDare Rebazi rekuCentral America, vakabudisa Bhaibheri reShanduro yeNyika Itsva yeMagwaro echiKristu echiGiriki muchiNahuatl (Central) pagungano raiva nevanhu 1 474. Gungano racho rakaitirwa muPuebla, kuMexico. Vanhu vanenge 500 000 vekuMexico vanotaura chiNahuatl (Central), uye vakawanda vacho vanogara nechepakati penyika yacho uye vamwe vari kumaodzanyemba.
Vashanduri vakaedza chaizvo kushandisa mashoko ari nyore kunzwisiswa nevanhu vanotaura chiNahuatl (Central). Bhaibheri iri rine mashoko emuzasi akawanda anoratidza mamwe mataurirwo anogona kuitwa mamwe mashoko mune dzimwe nzvimbo. Chimwe chinonyanya kukosha ndechekuti Bhaibheri iri rakadzosera zita raJehovha panzvimbo yaraiva muMagwaro ekutanga-tanga.
Tarascan
Hama Curtis Mills, vari muDare Rebazi rekuCentral America, vakabudisa Bhaibheri reShanduro yeNyika Itsva yeMagwaro echiKristu echiGiriki muchiTarascan pagungano raiva nevanhu 662. Gungano racho rakaitirwa muMichoacan, kuMexico. Zvinofungidzirwa kuti kune vanhu vanopfuura 175 000 vanogara kuMexico uye vanenge 60 000 vari kuUnited States asi vachitaura chiTarascan.
Kunyange zvazvo kune mamwe maBhaibheri echiTarascan, asi maBhaibheri acho anoshandisa mashoko akaoma kunzwisisa. Uyezve, pamwe pacho haadzidzisi chokwadi cheBhaibheri nenzira yakarurama. Semuenzaniso, rimwe Bhaibheri rinoshandura Johani 10:30 richiti: “Ini naMwari Baba takafanana.” Asi Bhaibheri reShanduro yeNyika Itsva yeMagwaro echiKristu echiGiriki muchiTarascan rinoti: “Ini naBaba tiri vamwe,” kuratidza kuti Jehovha naJesu vakabatana pazvinhu zvavanoita asi havana kuenzana.
Chido chedu ndechekuti dai maBhaibheri aya eShanduro yeNyika Itsva abatsira vanhu vakawanda kuziva Jehovha uye kumunamata.—Isaya 2:3.
Zvimwe Zvaunogona Kufarira
MIBVUNZO INONYANYA KUBVUNZWA
Zvapupu zvaJehovha Zvine Bhaibheri Razvo Here?
Kushandisa shanduro dzakasiyana-siyana dzeBhaibheri kunokubatsira chaizvo pakuridzidza. Zvinhu zvitatu zvakanakira kuti ushandise Shanduro yeNyika Itsva yeMagwaro Matsvene pakudzidza kwako.
MASHANDISIRWO ARI KUITWA MARI YENYU YEZVIPO
Kubudiswa Kwebhuku Rinonyanya Kukosha Kupfuura Mamwe Ese
Pane zvakawanda zvinoitwa pakushandura, kuprinda, uye kubatanidza mapeji eShanduro Yenyika Itsva.
MIBVUNZO INONYANYA KUBVUNZWA
Zvapupu zvaJehovha Zvinoshandisa Testamende Yekare Here?
Pane zvimwe zvikamu zveBhaibheri zvisingachashandi here? Ona kuti vaKristu vangabatsirwa sei pavanoverenga nyaya dzinokosha dzakaitika kare uye mazano anobatsira avanowana muMagwaro echiHebheru.