«E vërteta do t’ju lirojë»

KJO thënie e Jezu Krishtit, që gjendet në Bibël te Gjoni 8:32, është një e vërtetë absolute. Ajo na çliron nga besëtytnitë dhe zakonet që nuk i pëlqejnë Perëndisë dhe që na dëmtojnë. Rastet në vijim tregojnë se si e vërteta biblike ka liruar njerëz të vendeve të ndryshme nga disa zakone mbytëse që lidhen me Krishtlindjet.

E vërteta biblike i liroi

Argjentinë «Familja jonë ka shpëtuar nga problemet që vijnë nga të ngrënët e të pirët me tepri dhe nga dhuratat që nuk i përballonim dot financiarisht»,—thotë Oskari.

Mario u lehtësua jashtë mase kur i treguan për «gënjeshtrën e Krishtlindjeve», siç e quan ai. «Tani kënaqem kur ua shpreh vlerësimin të  tjerëve me anë të dhuratave në çfarëdo periudhe të vitit dhe kur ma mban xhepi»,—thotë ai.

Kanada «Më pëlqen shumë të jap e të marr dhurata,—shkruan Elfi.—Por nuk më pëlqen kur bëhen me detyrim. Kur familja jonë vendosi të mos i festonte Krishtlindjet, ishte sikur morëm pushimet.»

Uli, një nga vajzat e Elfit, sjell ndër mend: «Pasi prindërit vendosën të mos festonin Krishtlindjet, na bënin surpriza me dhurata dhe aktivitete zbavitëse gjatë gjithë vitit, dhe kjo na pëlqente shumë. Kur shokët e klasës na pyetnin se me ç’rast na i bënin, me krenari u thoshim: ‘Kot, për qejf.’ Megjithatë, për prindërit nuk ishte e lehtë të ndryshonin mënyrën e jetesës sipas të vërtetës biblike, pasi kjo nënkuptonte kundërshtime dhe presione nga të afërmit. Por nuk u lëkundën. Fakti që ishin aq të vendosur për ta adhuruar siç duhej Perëndinë Jehova, ndikoi shumë tek unë.»

Për Silvian, mosfestimi i Krishtlindjeve «ishte një lehtësim». Ajo thotë: «Ndihesha kaq mirë nga ky ndryshim! E dija që po i pëlqeja Perëndisë Jehova dhe kjo më bënte më të lumtur se një mijë festa Krishtlindjesh bashkë.»

Kenia Piteri shkruan: «Kur festoja Krishtlindjet, hyja në borxh deri në grykë për dhuratat dhe drekat e darkat e kushtueshme. Sigurisht, kjo do të thoshte se duhej të punoja jashtë orarit, gjë që më pengonte të rrija me familjen. Ndjeva një kënaqësi të vërtetë kur u lehtësova nga e gjithë kjo!»

«Jap e marr dhurata me familjarët e miqtë në çdo kohë»,—thotë Karolina.​—Besoj se dhurata të tilla surprizë, të bëra nga zemra, janë dhuratat më të mira.»

Japoni «Fëmijët tanë,​—shkruajnë Hiroshi dhe Ria,​—nuk i pretendojnë dhuratat dhe nuk i marrin për të mirëqena. Nuk kanë rënë në këtë kurth. Si prindër, jemi të lumtur kur shohim se e kanë kuptuar që dhënia duhet të vijë nga zemra.»

Keikoja sjell ndër mend: «Familja jonë e kishte zakon t’i festonte Krishtlindjet. Pasi siguroheshim që djalin e kishte zënë gjumi, burri dhe unë i vinim një dhuratë në anë të krevatit. Të nesërmen në mëngjes i thoshim: ‘Ngaqë ke qenë djalë i mirë, Plaku i Krishtlindjeve të ka sjellë një dhuratë.’ Kur mësova të vërtetën për Krishtlindjet dhe ia tregova djalit atë që kisha mësuar, ai filloi të qante ngaqë kuptoi se e kishin gënjyer. Në atë çast, e kuptova vërtet që Krishtlindjet nuk janë aq të bukura siç i paraqesin. Përkundrazi, janë një gënjeshtër dhe duke ushqyer këtë gënjeshtër, ndihesha sikur kisha tradhtuar djalin tim.»

Filipine Dejvi thotë: «Është e vështirë ta përshkruash me fjalë gëzimin që na jep Jehovai me anë të të vërtetave të kulluara që gjenden në Bibël. Kur familja jonë u bën dhurata të tjerëve, nuk presim ndonjë gjë në këmbim. Përveç kësaj, ne japim nga zemra.»

Njerëzit që u cituan më sipër, janë vetëm disa nga miliona veta që kanë mësuar nga përvoja se e vërteta biblike të liron. Ç’është më e rëndësishme, kur jetojmë në përputhje me këtë të vërtetë, gëzojmë zemrën e Perëndisë. (Proverbat 27:11) Jezu Krishti tha: «Adhuruesit e vërtetë do ta adhurojnë Atin me frymë dhe të vërtetë, sepse Ati po kërkon adhurues të tillë.» (Gjoni 4:23) Kur Perëndia shqyrton zemrën tënde, a sheh dikë që e dëshiron me zjarr të vërtetën? Shpresojmë që përgjigja të jetë një po e fortë!

[Figura në faqen 9]

Të krishterët japin nga dashuria dhe në çdo periudhë të vitit