«Qëndroni vigjilentë, sepse nuk e dini as ditën, as orën.»—MATEU 25:13.

«Mbani sytë hapur dhe rrini zgjuar, sepse nuk e dini se kur është koha e caktuar.»—MARKU 13:33.

Pra, asnjë në tokë nuk e di me saktësi kur do t’i vijë fundi këtij sistemi, ama Perëndia ka vendosur një ‘kohë të caktuar’—«ditën ose orën» fikse—kur do të sjellë fundin. (Mateu 24:36) A do të thotë kjo se s’ka si ta dimë nëse fundi është afër? Aspak. Jezui u tregoi dishepujve ose ndjekësve të tij, të ishin të vëmendshëm ndaj disa ngjarjeve që do të nënkuptonin se fundi ishte te pragu.

Këto ngjarje do të ishin shenja «e përfundimit të sistemit». Jezui tha: «Do të ngrihet komb kundër kombi dhe mbretëri kundër mbretërie e do të ketë mungesa ushqimi dhe tërmete nga njëri vend në tjetrin.» (Mateu 24:3, 7) Tha se do të kishte edhe «murtaja», pra sëmundje epidemike. (Luka 21:11) A i dallon edhe ti ngjarjet që profetizoi Jezui?

Sot njerëzit vuajnë si pasojë e luftërave shkatërrimtare, urisë, tërmeteve dhe sëmundjeve që s’kanë të sosur. Për shembull, në vitin 2004, një tërmet i fuqishëm në Oqeanin Indian shkaktoi një tsunami që vrau rreth 225.000 njerëz. Për 3 vjet, pandemia e COVID-19 shkaktoi rreth 6,9 milionë vdekje në gjithë botën. Jezui tha se ngjarje të tilla do të tregonin se fundi i sistemit do të ishte afër.

Periudhën fiks para fundit, Bibla e quan «ditët e fundit». (2 Pjetrit 3:3, 4) Sipas 2 Timoteut 3:1-5, ditët e fundit do të karakterizoheshin nga një rënie e theksuar morale. (Shih kutinë « Fiks para fundit të botës».) A nuk e sheh që njerëzit janë egoistë, lakmitarë, të egër dhe pa pikë dashurie? Edhe kjo tregon se po jetojmë shumë afër fundit të botës.

Sa do të zgjatin ditët e fundit? Sipas Biblës, vetëm ‘një periudhë të shkurtër kohe’. Pastaj Perëndia do të shkatërrojë «ata që shkatërrojnë tokën».—Zbulesa 11:15-18; 12:12.

Tashmë Perëndia e ka caktuar ditën dhe orën kur do t’i japë fund sistemit të tanishëm të lig. (Mateu 24:36) Por e bukura e kësaj nuk mbaron këtu: Perëndia «nuk dëshiron që të shkatërrohet ndonjë». (2 Pjetrit 3:9) Ai po i jep mundësi njerëzimit ta përputhë jetën me standardet e tij. Pse? Sepse dëshiron t’i mbijetojmë fundit të botës dhe të jetojmë në botën e tij të re, ku toka do të jetë parajsë.

Perëndia ka organizuar një program mësimi mbarëbotëror që t’i ndihmojë njerëzit të mësojnë si të jenë pjesë e botës së re nën Mbretërinë e tij. Jezui tha se lajmi i mirë për Mbretërinë do të predikohej «në gjithë tokën e banuar». (Mateu 24:14) Dëshmitarët e Jehovait përreth botës, harxhojnë miliarda orë që t’u predikojnë dhe t’u mësojnë njerëzve mesazhin shpresëdhënës të Biblës. Jezui tha se kjo fushatë predikimi do të bëhej në të gjithë tokën, para se të vinte fundi.

Qeverisja njerëzore i ka orët e numëruara. Por lajmi i mirë është se ti mund t’i mbijetosh fundit dhe të jetosh në parajsën tokësore që ka premtuar Perëndia. Artikulli tjetër do të tregojë çfarë mund të bësh që të jetosh në botën e re.