Bashkëshortët që e respektojnë njëri-tjetrin, sillen me përzemërsi edhe kur kanë mosmarrëveshje. Libri Ten Lessons to Transform Your Marriage thotë: «Këto çifte nuk ngulin këmbë tek e vetja. Përkundrazi, vazhdojnë të flasin me njëri-tjetrin për gjërat që s’janë dakord. E dëgjojnë me respekt pikëpamjen e bashkëshortit dhe gjejnë gjuhën e përbashkët.»

PARIMI BIBLIK: «Dashuria . . . nuk kërkon interesat e veta.»​—1 Korintasve 13:4, 5.

«Të respektoj time shoqe, do të thotë se i çmoj vlerat e saj dhe se nuk dua të bëj asgjë që do të dëmtonte atë ose martesën tonë.»​—Mikea.

Kur mungon respekti, në komunikimin mes çiftit mund të ketë kritikë, sarkazmë e madje përçmim​—veçori që studiuesit i përcaktojnë si shenjat e para të divorcit.

«Komentet ofenduese, me nënkuptim ose shakatë pa vend për bashkëshorten, vetëm sa do t’i shkatërrojnë vetëvlerësimin, do t’i humbin besimin te ti dhe do të rrënojnë martesën.»​—Brajani.

ANALIZO VETEN

Kushtoju vëmendje bisedave dhe veprimeve të tua gjatë një jave. Pastaj pyet veten:

• «Sa shpesh e kritikova bashkëshortin dhe sa shpesh e komplimentova?»

• «Në ç’mënyra specifike i tregova respekt?»

FOL ME BASHKËSHORTIN

• Cilat veprime e fjalë ju bëjnë të ndiheni të respektuar?

• Për shkak të cilave veprime e fjalë nuk ndiheni të respektuar?

SUGJERIME

• Shkruaj tri mënyra që do të të pëlqente që bashkëshorti të të respektonte. Të njëjtën gjë të bëjë edhe ai. Shkëmbeni listat dhe përpiquni ta respektoni njëri-tjetrin në mënyrat që përcaktuat.

• Bëj një listë me cilësitë që admiron te bashkëshorti. Pas kësaj thuaja sa shumë i çmon këto cilësi.

«Të respektoj tim shoq, do të thotë ta tregoj me veprime se e vlerësoj dhe se dua që të jetë i lumtur. Jo gjithmonë është e nevojshme diçka e jashtëzakonshme; ndonjëherë mjafton një sërë veprimesh të vogla për të shfaqur respekt të sinqertë.»​—Megani.

Në fund të fundit, nuk është puna nëse mendon se po e respekton apo jo bashkëshortin, por nëse ai ndihet i respektuar.

PARIMI BIBLIK: «Vishuni me dhembshuri të butë, mirëdashje, përulësi mendjeje, butësi dhe [durim].»​—Kolosianëve 3:12.