Një panel me ekspertë të të drejtave të njeriut pranë Kombeve të Bashkuara (OKB) ka publikuar një dokument 15-faqësh, ku deklaron se Rusia shkeli ligjet ndërkombëtare kur arrestoi dhe burgosi 18 Dëshmitarë të Jehovait në qytete të ndryshme, nga maji i 2018-s deri në qershor të 2019-s. Si përfundim, paneli i ekspertëve kërkon lirimin e menjëhershëm e të pakushtëzuar të Dëshmitarëve që janë ende në burg.

Një kopje paraprake e dokumentit u botua më 15 maj 2020. Dokumenti përfundimtar do të vihet së shpejti në dispozicion në faqen ueb të OKB-së.

Kjo është hera e tretë brenda një viti që Grupi i Punës kundër Burgosjes Arbitrare ka nxjerrë këtë përfundim në favor të vëllezërve e motrave tona. Në këtë dokument, Grupi i Punës dënon padrejtësitë e panumërta që ka bërë qeveria ruse ndaj vëllezërve e motrave tona.

Për sa i përket «forcës ekstreme» që përdorën autoritetet kur arrestuan Dëshmitarët, Grupi i Punës nxori përfundimin se «policia ruse nuk kishte arsye të vlefshme për këtë» dhe thekson se «asnjë [Dëshmitar] nuk duhej të ishte arrestuar e nuk duhej të ishte mbajtur në paraburgim dhe se asnjëri prej tyre nuk duhej të ishte proceduar e nuk duhet të procedohet penalisht në të ardhmen».

Ekspertët hedhin poshtë në mënyrë kategorike akuzën e ngritur kundër Dëshmitarëve për aktivitet «ekstremist». Ata shpjegojnë se vëllezërit e motrat thjesht kanë ushtruar «paqësisht të drejtën e tyre për liri fetare».

Në dokument, ekspertët dënojnë edhe taktikat që u përdorën gjatë procesit gjyqësor të vëllezërve tanë. Për shembull, gjatë seancave dëgjimore në paraburgim, dy motra i mbajtën të mbyllura në kafaz në sallën e gjyqit. Siç shpjegon Grupi i Punës, ligjet ndërkombëtare thonë se kushdo ka të drejtën «të konsiderohet i pafajshëm derisa të vërtetohet fajësia». Për këtë arsye, motrat tona nuk duhej të ishin mbajtur «në pranga ose kafaze gjatë seancave gjyqësore e as nuk duhej të ishin sjellë në sallën e gjyqit sikur të ishin kriminele të rrezikshme».

Grupi i Punës kërkon që Rusia t’i eliminojë të gjitha dosjet kriminale të 18 Dëshmitarëve dhe t’i kompensojë në përputhje me ligjet ndërkombëtare. Për më tepër, Rusisë i është kërkuar «të hetojë plotësisht e me objektivitet të gjitha rrethanat që i kontribuan këtij mohimi arbitrar të lirisë» dhe «të ndërmarrë masat e duhura kundër personave përgjegjës për shkeljen e të drejtave [të Dëshmitarëve]».

Në dokumentin e Grupit të Punës thuhet se 18 Dëshmitarët janë «vetëm disa nga Dëshmitarët e Jehovait në Rusi që janë arrestuar, burgosur dhe akuzuar për veprimtari kriminale, numri i të cilëve rritet dita-ditës, vetëm se po ushtrojnë të drejtën e lirisë fetare», një e drejtë që mbrohet nga një konventë ndërkombëtare ku bën pjesë edhe Rusia. Kështu, ndonëse dokumenti përqendrohet te 18 vëllezërit e motrat, Grupi i Punës deklaroi fare qartë se rekomandimet e tyre «aplikohen për këdo që është në rrethana të ngjashme».

Dokumenti i Grupit të Punës nuk është garanci se vëllezërit e motrat në Rusi do të shfajësohen, por shpresojmë që ta përmirësojë situatën. Jemi në pritje të përgjigjes së Rusisë. Ndërkohë, ndërsa vëllezërit e motrat tona në Rusi përballojnë me guxim përndjekjen, e dimë se Ati ynë i dashur, Jehovai, do t’i mbushë plot gëzim e paqe ngaqë besojnë tek Ai.—Romakëve 15:13.