Pasi krijoi burrin dhe gruan e parë, Zoti i lidhi së bashku në martesë. Ai e themeloi martesën në mënyrë që burri dhe gruaja të kishin një lidhje të veçantë me njëri-tjetrin dhe kështu të krijonin një ambient familjar të ngrohtë e të qëndrueshëm.—Zanafilla 1:27, 28; 2:18.

 Zoti dëshiron që çiftet e martuara të jenë të lumtura. (Proverbat 5:18) Ja pse, me anë të Biblës, na jep disa norma dhe parime që mund ta bëjnë të suksesshme martesën.

Në këtë artikull do të shohim:

•  Cilat janë normat e Zotit për martesën?

•  Çfarë thotë Bibla për ndarjen dhe divorcin?

•  A duhet të regjistrohet ligjërisht martesa që të jetë e miratuar nga Zoti?

•  Sipas Biblës, cilat role dhe përgjegjësi kanë burri dhe gruaja?

•  A i detyron Zoti çiftet e martuara të kenë fëmijë?

•  Si mund të më ndihmojë Bibla në lidhje me martesën?

•  Vargje nga Bibla për martesën

 Që nga fillimi, Zoti e krijoi martesën si një lidhje mes një burri dhe një gruaje. (Zanafilla 2:24) Ai nuk i miraton poligaminë, aktet homoseksuale dhe bashkëjetesën pa qenë të martuar. (1 Korintasve 6:9; 1 Selanikasve 4:3) Jezui i mësoi dishepujt e tij të zbatonin standardin që kishte vendosur në fillim Zoti për martesën.—Marku 10:6-8.

 Zoti e sheh martesën si një lidhje të përjetshme. Kur martohen, një burrë dhe një grua premtojnë se do t’i qëndrojnë besnikë njëri-tjetrit dhe do të jetojnë së bashku për gjithë jetën. Zoti pret nga të dy që ta mbajnë këtë premtim.—Marku 10:9.

 Ka raste kur njëri nga bashkëshortët është i detyruar të qëndrojë larg tjetrit, për shembull, kur ka ndonjë çështje familjare urgjente. Megjithatë, Bibla nuk e miraton ndarjen për shkak të problemeve martesore. Përkundrazi, i nxit çiftet e martuara që kanë këto probleme, të bëjnë përpjekje maksimale për t’u pajtuar.—1 Korintasve 7:10.

 E vetmja bazë nga Shkrimet për t’u divorcuar është imoraliteti seksual. (Mateu 19:9) Prandaj, nëse një çift vendos të ndahet ose të divorcohet për ndonjë arsye tjetër, sipas Shkrimeve, asnjëri nga partnerët nuk është i lirë të lidhet me dikë tjetër ose të rimartohet.—Mateu 5:32; 1 Korintasve 7:11.

 Zoti kërkon që shërbëtorët e tij t’u binden ligjeve të shtetit për martesën. (Titit 3:1) Një çift që, kur është e mundur, e regjistron ligjërisht martesën, tregon respekt për autoritetet shtetërore dhe për pikëpamjen e Zotit, që e konsideron martesën si një angazhim të përhershëm. a

•   Përgjegjësitë e përbashkëta. Burri dhe gruaja duhet ta trajtojnë njëri-tjetrin me dashuri dhe respekt. (Efesianëve 5:33) Duhet të plotësojnë në mënyrë të dashur nevojat seksuale të njëri-tjetrit dhe duhet të shmangin çdo formë tradhtie. (1 Korintasve 7:3; Hebrenjve 13:4) Nëse kanë fëmijë, të dy kanë përgjegjësi për t’u kujdesur për ta.—Proverbat 6:20.

   Bibla nuk thotë me hollësi si duhet të organizohen çiftet e martuara, për sa i përket punës shekullare dhe punëve të shtëpisë. Ata mund të vendosin së bashku se çfarë është më e mira për familjen e tyre.

•   Roli i burrit. Bibla thotë se «burri është kreu i gruas së tij». (Efesianëve 5:23) Ai është kreu në kuptimin që ka përgjegjësinë të drejtojë familjen dhe të marrë vendime për të mirën e gruas dhe fëmijëve.

   Duhet të përpiqet fort që ata të kenë çfarë u nevojitet në aspektin fizik dhe emocional, si edhe një miqësi të ngushtë me Zotin. (1 Timoteut 5:8) Burri i vlerëson jashtë mase cilësitë dhe aftësitë e gruas. Këtë e tregon kur bashkëpunon me të dhe merr parasysh mendimet dhe ndjenjat e saj para se të marrë një vendim. (Proverbat 31:11, 28) Bibla thotë se burri duhet të kujdeset për përgjegjësitë e veta në mënyrë të dashur.—Kolosianëve 3:19.

•   Roli i gruas. Bibla thotë se «gruaja duhet të ketë respekt të thellë për burrin». (Efesianëve 5:33) Zoti është i kënaqur kur gruaja respekton rolin që ai i ka dhënë burrit.

   Roli i saj është të bashkëpunojë me burrin duke e ndihmuar që të marrë vendime të mençura dhe duke mbështetur autoritetin e tij. (Zanafilla 2:18) Bibla i thur lëvdata gruas që përmbush rolin e saj të rëndësishëm në martesë.—Proverbat 31:10.

 Jo. Në të kaluarën, Zoti u dha urdhër disa shërbëtorëve të tij që të bënin fëmijë. (Zanafilla 1:28; 9:1) Por ky urdhër nuk zbatohet për të krishterët. Jezui nuk i urdhëroi kurrë dishepujt e tij të bënin fëmijë. As ndonjë nga dishepujt e tij të hershëm nuk tha se çiftet e martuara duhet të bëjnë patjetër fëmijë. Çdo çift është i lirë të vendosë vetë nëse do të ketë fëmijë.

 Bibla përmban parime që mund t’i ndihmojnë çiftet ta nisin mbarë martesën dhe t’i shmangin problemet, ose t’i përballojnë ato.

 Parimet e Biblës mund t’i ndihmojnë çiftet e martuara . . .

•   të tregojnë dashuri të vërtetë.—1 Korintasve 13:4-7; Kolosianëve 3:14.

•   të përballojnë mospërputhjet.—1 Korintasve 10:24.

•   të jenë dëgjues të mirë.—Jakovi 1:19.

•   të tregojnë respekt.—Romakëve 12:10.

•   të falin.—1 Pjetrit 4:8.

•   të jenë besnikë.—Marku 10:9.

•   të jenë të duruar.—Efesianëve 4:2, 3.

•   të punojnë si skuadër.—Eklisiastiu 4:9.

•   të thellojnë përkushtimin ndaj njëri-tjetrit.—Kënga e Solomonit 8:7.