Miqësitë mund të na ndihmojnë të jemi të lumtur e të suksesshëm. Miqtë e vërtetë nxjerrin më të mirën nga njëri-tjetri dhe na ndihmojnë të përmirësohemi.—Proverbat 27:17.

 Gjithsesi, Bibla thekson sa e rëndësishme është t’i zgjedhim me kujdes miqtë. Ajo paralajmëron për pasojat që vijnë kur zgjedhim llojin e gabuar të miqve. (Proverbat 13:20; 1 Korintasve 15:33) Miq të tillë mund të na shtyjnë të marrim vendime të pamenda ose në ndonjë mënyrë ndikojnë aq sa të humbasim cilësitë e mira.

Në këtë artikull

•  Kush është një mik i mirë?

•  Cilët janë disa shembuj të miqësive të mira në Bibël?

•  A mund të bëhemi miq me Perëndinë?

•  Vargje nga Bibla për miqësinë

 Bibla mëson se miqësitë e ngushta duhen bazuar te diçka më e thellë se ndonjë hobi apo interesat e përbashkëta. Për shembull, Psalmi 119:63 thotë: «I kam miq të gjithë ata që të nderojnë thellësisht dhe ata që zbatojnë urdhrat e tu a.» Vër re se shkrimtari i Biblës thotë se ai zgjidhte si miq ata që donin t’i pëlqenin Perëndisë dhe të jetonin në harmoni me standardet e tij.

 Gjithashtu, Bibla thekson cilat cilësi duhet të ketë një mik i mirë. Për shembull:

•   «Miku i vërtetë të do në çdo kohë dhe të bëhet vëlla në ditë të vështira.»—Proverbat 17:17.

•   «Ka shokë që janë gati ta bëjnë copë njëri-tjetrin, por ka një mik që të bëhet vëlla e shkuar vëllait.»—Proverbat 18:24.

 Këto vargje na mësojnë se një mik i mirë është besnik, i dashur, zemërmirë dhe bujar. Një mik i vërtetë është ai tek i cili mund të mbështetemi në ditë të mira e të këqija. Përveç kësaj, një mik për kokë merr guximin të na flasë kur sheh se po bëjmë diçka të pamend ose kur po marrim një vendim të çalë.—Proverbat 27:6, 9.

 Bibla ka shembuj të miqësive të mira mes njerëzve të moshave, formimeve, kulturave dhe pozitave të ndryshme në shoqëri. Të shohim tri nga këto miqësi.

•   Rutha dhe Naomi. Rutha ishte nusja e djalit të Naomit dhe ka shumë të ngjarë të kishin goxha diferencë moshe. Për më tepër, Rutha vinte nga një kulturë që ndryshonte kryekëput nga ajo e Naomit. Gjithsesi, pavarësisht nga këto ndryshime, lidhën një miqësi tejet të ngushtë e të dashur.—Rutha 1:16.

•   Davidi dhe Jonatani. Duket se Jonatani ishte 30 vjet më i madh se Davidi. Prapëseprapë, Bibla thotë se Davidi dhe Jonatani «u bënë miq të ngushtë».—1 Samuelit 18:1.

•   Jezui dhe apostujt e tij. Jezui kishte autoritet mbi apostujt, sepse ishte mësuesi dhe zotëria i tyre. (Gjoni 13:13) Mirëpo nuk i shihte si të padenjë për miqësinë e tij. Përkundrazi krijoi lidhje të forta me ata që zbatonin mësimet e tij. Ai tha: «Ju kam quajtur miq, sepse ju kam bërë të njohur gjithë gjërat që kam dëgjuar nga Ati im.»—Gjoni 15:14, 15.

 Po, njerëzit mund të jenë miq me Perëndinë. Bibla thotë: «Të ndershmit gëzojnë miqësi të ngushtë me Të.» (Proverbat 3:32) Me fjalë të tjera, Zoti zgjedh miq ata që bëjnë çmos të sillen me dinjitet, të jenë të ndershëm, të respektueshëm e që përpiqen të jetojnë në harmoni me standardet e tij për të drejtën e të gabuarën. Për shembull, për Abrahamin besnik, Shkrimet thonë specifikisht se ishte mik i Perëndisë.—2 Kronikave 20:7; Isaia 41:8; Jakovi 2:23.