Nôno, a no ala kerki na a srefi. Bijbel abi furu eksempre di e sori taki Gado no e feni ala kerki bun. Wi o taki fu tu sani di kerki e du èn di Gado no feni bun.

Nomru 1: Kerki di e anbegi falsi gado

 Bijbel e sori taki te sma e anbegi falsi gado, dan dati „na fu soso”. A e taki tu taki falsi gado „no warti noti” èn taki sma di e anbegi den ’no e feni nowan wini fu den’ (Yeremia 10:3-5; 16:19, 20). Yehovah a Gado ben taigi den Israelsma fu owruten: „Un no musu anbegi nowan tra gado boiti mi” (Eksodes 20:3, 23; 23:24). Te den Israelsma ben e anbegi tra gado, ’Yehovah ati ben e bron’.​—Numeri 25:3; Lefitikus 20:2; Krutuman 2:13, 14.

 Na a srefi fasi Gado e denki ete te sma e anbegi sani di den „e kari ’gado’” (1 Korentesma 8:5, 6; Galasiasma 4:8). Gado no lobi en te sma di wani anbegi en e moksi nanga sma di e anbegi falsi gado. A e taigi den: „Komoto na den mindri èn prati nanga den” (2 Korentesma 6:14-17). Efu ala kerki na a srefi èn efu den alamala e yepi sma fu dini Gado, dan fu san ede Gado ben o taki so wan sani?

Nomru 2: Kerki di e dini a tru Gado na wan fasi di a no feni bun

 Son leisi te den Israelsma ben e anbegi Gado, dan den ben e moksi na anbegi fu den nanga gwenti di den ben teki abra fu sma di e anbegi falsi gado. Ma Yehovah no ben lobi a sani disi kwetikweti (Eksodes 32:8; Deuteronomium 12:2-4). Yesus ben krutu den kerki fesiman fu en ten fu di a fasi fa den ben e anbegi Gado no ben bun. Den ben e du leki den ben e anbegi Gado fayafaya, ma den ben e hoigri fu di den ben ’frigiti den moro prenspari sani fu a Wèt di e taki dati den musu krutu sani na wan reti fasi, den musu abi sari-ati èn den musu tai hori na Gado’.​—Mateyus 23:23.

 Na ini a ten disi tu, na soso den bribi di e leri sma tru tori e yepi sma fu dini Gado. Den tru tori disi wi e feni na ini Bijbel (Yohanes 4:24; 17:17; 2 Timoteyus 3:16, 17). Den kerki di e leri sma sani di no skrifi na ini Bijbel, e meki taki sma no man feni Gado. Furu sani di kerki e leri sma, soleki a leri di e taki dati Gado na dri sma ini wán, taki libisma abi wan sani di no man dede noso taki Gado e bron sma na ini hèl, no skrifi na ini Bijbel leki fa son sma e denki. Ma den kerki teki den leri disi abra fu sma di ben e anbegi falsi gado. Kerki di e leri sma den sani disi e anbegi Gado „fu soso” fu di den e hori densrefi na gwenti fu libisma na presi fu leri sma san Gado e taki.​—Markus 7:7, 8.

 Gado e tegu gi den sortu kerki disi (Titus 1:16). Wan kerki di wani yepi sma fu kon krosibei na Gado, no musu leri sma ala sortu gwenti fu libisma, ma den musu leri sma sani di kan yepi den ibri dei fu den libi. Fu eksempre, Bijbel e taki: „Efu wan sma denki taki a e anbegi Gado, ma a no e basi en tongo, dan a e kori ensrefi. A sma disi e anbegi Gado fu soso. A fasi fu anbegi di wi Gado nanga Tata e si leki wan sani di krin èn di de sondro flaka, na disi: fu sorgu gi pikin di no abi papa nanga mama moro èn gi uma di den masra dede kaba, te den sortu sma disi de na nowtu. Boiti dati, un no musu meki grontapu flaka unu” (Yakobus 1:26, 27).