Bijbel e taki wán leisi nomo fu tatoeage, na ini Lefitikus 19:28. A e taki: „Un no musu kotikoti marki na un skin.” Gado ben gi a pipel fu Israel a komando disi fu sori taki a ben poti den aparti fu den pipel di ben e tan na den lontu. Den pipel di ben e tan na den lontu ben e kotikoti marki noso a nen fu den gado fu den na den skin (Deuteronomium 14:2). Aladi Kresten no de ondro a wet di Gado ben gi Moses, a prenspari fu luku san wi kan leri fu a gronprakseri di de fu feni na ini a wet disi.

Wan Kresten kan poti wan tatoeage tapu en skin?

 Den Bijbeltekst di e kon now kan yepi yu fu frustan a tori disi moro bun:

•   „Umasma musu moi densrefi. . . na wan lespeki fasi” (1 Timoteyus 2:9). A gronprakseri disi na gi man nanga uma. Wi musu lespeki den firi fu trawan èn wi no musu du sani fu sma poti prakseri na wi te dati no de fanowdu.

•   Son sma e poti wan tatoeage fu di den feni taki den mag du san den wani, èn trawan e poti wan tatoeage fu sori taki na den e bosroiti san den wani du nanga den skin. Ma Bijbel e gi Kresten a deki-ati disi: „Gi un skin na Gado leki wan srakti-ofrandi di e libi, di de santa èn di Gado feni bun. Na so fasi unu o gebroiki un frustan te unu e du santa wroko” (Romesma 12:1). Gebroiki yu „frustan” èn aksi yusrefi fu san ede yu wani wan tatoeage. Na fu di furu sma e poti tatoeage, noso na fu di yu wani sori taki yu de fu wan spesrutu grupu? No frigiti taki yu man kenki yu prakseri bakaten, ma yu no o man puru a tatoeage moro. Te yu e denki bun fu san ede yu wani du wan sani, dan dati o yepi yu fu teki koni bosroiti.​—Odo 4:7.

•   „Te wan sma e wroko tranga, dan den sani di a abi na prakseri fu du o tyari wini kon gi en. Ma ibri sma di e du sani tumusi esi o pina” (Odo 21:5). Nofo tron te sma e bosroiti fu poti wan tatoeage, den no e teki ten fu denki fu a tori. Ma a bosroiti di den e teki kan meki taki sma no o wani tron mati fu den èn a kan meki en muilek gi den fu feni wroko. A diri fu puru wan tatoeage èn a e hati srefisrefi. Ondrosuku e sori taki furu sma di ben poti tatoeage e winsi taki den no ben du dati. Wan tra sani di e sori dati, na taki moro nanga moro bisnis e opo kon di e puru tatoeage gi sma.