Bijbel e gi wi bun rai fu man teki koni bosroiti. A kan yepi wi fu „kisi koni [nanga] frustan” (Odo 4:5). Son leisi Bijbel e fruteri wi san na a moro bun bosroiti. Ma tra leisi a e gi wi rai di kan yepi wi fu teki wan koni bosroiti.

Na ini na artikel disi

•  Sani di kan yepi yu fu teki wan bun bosroiti

•  Mi kan kenki wan bosroiti di mi teki kaba?

•  San mi musu du efu mi teki wan fowtu bosroiti di mi no man kenki?

•   No teki wan bosroiti esi-esi. Bijbel e taki: „A koniwan e luku bun pe a e poti en futu” (Odo 14:15). Efu yu e teki wan bosroiti esi-esi, dan yu kan misi prenspari sani di bun fu sabi. Teki yu ten fu prakseri bun sortu bosroiti yu o teki.​—1 Tesalonikasma 5:21.

•   No luku nomo fa yusrefi e denki noso firi fu a tori. Bijbel e warskow wi taki wi no kan frutrow ala ten tapu wi ati (Odo 28:26; Yeremia 17:9). Fu eksempre, a kan taki wi no o man teki bun bosroiti te wi mandi, te wi firi sari, te wi broko saka, te wi no abi pasensi noso te wi weri tumusi.​—Odo 24:10; 29:22.

•   Begi fu kisi koni (Yakobus 1:5). Gado breiti fu piki den sortu begi dati. A de wan lobi-ati Papa di wani taki den pikin fu en musu wai pasi gi problema. „Yehovah srefi e gi sma koni. Te a e opo en mofo, sabi nanga a koni fu man si sani krin, e komoto na ini” (Odo 2:6). a A moro prenspari fasi fa a e gi a koni dati de nanga yepi fu Bijbel.​—2 Timoteyus 3:16, 17.

•   Ondrosuku sani. Fu man teki wan bun bosroiti, dan yu musu ondrosuku sani bun fosi. Bijbel e taki: „Wan koni sma o arki èn a o wani teki moro leri” (Odo 1:5). Pe yu kan feni sani di man yepi yu èn di yu man frutrow?

   Luku fosi san Bijbel e taki fu a tori. Fu di wi Mekiman sabi san bun gi wi, meki en Wortu abi rai di wi kan frutrow trutru (Psalm 25:12). Son leisi Bijbel abi wet noso komando di e sori wi krin sortu bosroiti wi musu teki (Yesaya 48:17, 18). Ma furu tron Bijbel no e taki krin san wi musu du. Na presi fu dati, Bijbel abi moi gronprakseri. Den kan yepi wi fu teki wan koni bosroiti di e difrenti kande fu san wan tra sma ben o du, ma toku a bun. Efu yu wani sabi sortu Bijbeltekst abi fu du nanga a bosroiti di yu musu teki, dan ondrosuku san Bijbel artikel noso buku e taki fu a tori, soleki den wan di yu kan feni tapu a website disi. b

   Gi son bosroiti, a kan de fanowdu fu ondrosuku tra artikel di de fu frutrow. Fu eksempre, fosi yu o bai wan sani, spesrutu te a diri, dan na wan koni sani fu kon sabi moro fu a sani dati èn fu a fabriki di meki en. Luku sosrefi efu den o yepi yu te a sani broko noso te yu wani tyari en go na a wenkri baka. Yu musu luku tu efu a sani di yu wani bai, na trutru san yu abi fanowdu.

   Bijbel e taki: „Te sma no e taki krin nanga makandra, ala sani e bruya” (Odo 15:22). Sobun, fosi yu teki wan bosroiti, aksi rai fu sma di yu e frutrow. Fu eksempre, na wan koni sani fu aksi rai fu wan datra te yu musu teki wan bosroiti di abi fu du nanga a gosontu fu yu (Mateyus 9:12). Son leisi yu kan taki nanga sma di ben de na ini a srefi sortu situwâsi leki yu. Ma hori na prakseri taki a no den sma dati o teki wan bosroiti gi yu. Na yu srefi o abi fu teki a bosroiti èn yu o abi fu libi nanga den bakapisi.​—Galasiasma 6:4, 5.

•   Luku ala sei fu a tori. Te yu kaba ondrosuku ala san yu ben man feni fu a tori, dan yu kan skrifi ala den difrenti bosroiti di yu man teki. Skrifi tu sortu bun nanga takru bakapisi ibri bosroiti kan abi. Nanga wan krin ati yu musu luku san kan pasa te yu e teki a bosroiti (Deuteronomium 32:29). Fu eksempre, san a bosroiti fu yu o du gi yu, gi yu famiri noso gi tra sma? (Odo 22:3; Romesma 14:19) Te yu e denki bun fu den aksi disi èn yu e hori na prakseri san Bijbel e leri, dan dati o yepi yu fu teki wan koni bosroiti di e sori lobi.

•   Teki a bosroiti. Son leisi, wi e draidrai fu teki wan bosroiti fu di wi e tweifri. Ma efu wi no e teki wan bosroiti, dan wi kan misi wan moi okasi, noso wi kan kon na ini wan situwâsi san wi no wani. Te yu no e teki wan bosroiti, dan dati na a srefi leki te wan sma no e teki wan bun bosroiti. Fu agersi a tori disi, Bijbel e taki: „A sma di e luku a winti, no o sai siri. A sma di e luku den wolku, no o koti nyanyan.”​—Preikiman 11:4.

 No frigiti taki srefi a moro koni bosroiti kande no de a moro bun wan. Nofo tron te wi e bosroiti fu du wan sani, dan wi musu tapu nanga wan tra sani. Sani kan pasa tu di wi no ben fruwakti (Preikiman 9:11). Sobun, te yu kon sabi ala san yu ben man feni fu a tori, dan teki wan bosroiti di de a moro bun wan gi yu.

 Te yu teki wan bosroiti kaba, dan a kan taki a situwâsi fu yu e kenki, noso kande yu kon si taki a fosi bosroiti fu yu no go leki fa yu ben fruwakti. Dan a ben o de wan koni sani fu denki a tori baka èn fu teki wan tra bosroiti di o abi wan moro bun bakapisi kande.

 Ma son bosroiti yu no musu kenki (Psalm 15:4). Fu eksempre, Gado e fruwakti taki trowpatna tan du san den pramisi di den trow (Maleaki 2:16; Mateyus 19:6). c Te problema e kon na ini a trowlibi, dan den musu meki ala muiti fu lusu den problema, na presi fu broko a trow.

 A kan pasa nanga wi alamala taki wi e teki wan bosroiti di no bun noso di no koni (Yakobus 3:2). Kande wi e sari srefi noso wi ati e krutu wi. A kan (Psalm 69:5). Iya, te wi abi den firi disi son leisi, dan dati kan de wan bun sani gi wi, bika a kan tapu wi fu meki a srefi fowtu baka! (Odo 14:9) Ma Bijbel e gi wi a rai fu luku bun taki wi ati no krutu wi doronomo, bika dati kan broko wi èn a kan meki en muilek gi wi fu denki krin (2 Korentesma 2:7). d Bijbel e taki: „Yehovah na wan Gado di abi sari-ati nanga switifasi” (Psalm 103:8-13). Sobun, luku san yu kan leri fu wan fowtu bosroiti di yu no man kenki, èn du san yu man fu meki a situwâsi kon moro betre.