Fa Yesus ben de?
A piki fu Bijbel
Nowan sma sabi soifri fa Yesus ben de, fu di Bijbel no e taki fa en fesi nanga en skin ben tan. Disi e sori taki den sani dati no de prenspari. Ma den sani di Bijbel e taki fu Yesus, kan meki wi frustan pikinso fa a ben de.
Suma a ben gersi: Fu di Yesus en mama ben de wan Dyu, meki a kan taki a ben gersi den sma dati (Hebrewsma 7:14). A no de so taki en fesi ben de tra fasi leki di fu den Dyu. Wan leisi a ben man komoto kibrikibri fu Galilea go na Yerusalem sondro taki sma ben si taki na en (Yohanes 7:10, 11). Èn soleki fa a sori, dan sma no ben man si furu difrenti na mindri en nanga den krosibei mati fu en. Hori na prakseri taki Yudas Iskariot ben musu sori den srudati di ben kon grabu Yesus, suma ben de Yesus.—Mateyus 26:47-49.
En wiwiri: A no kan de so taki Yesus ben abi langa wiwiri fu di Bijbel e taki dati „a de wan syen gi wan man te a abi langa wiwiri”.—1 Korentesma 11:14.
Barba: Yesus ben abi wan barba. A ben hori ensrefi na Dyu wet, di ben taki dati mansma ’no ben musu kotikoti den barba’ (Lefitikus 19:27; Galasiasma 4:4). Boiti dati, Bijbel e taki fu Yesus en barba na ini wan profeititori di ben sori fa a ben o pina.—Yesaya 50:6.
Fa en skin ben de: Soleki fa a sori, dan Yesus ben de wan steifisteifi man di ben gosontu. Di a ben e du a diniwroko fu en, a ben waka hondrohondro kilometer (Mateyus 9:35). A ben krin a Dyu tempel tu leisi, pe a ben drai den tafra tapu fu den sma di ben e broko moni èn wan leisi a ben yagi den meti gwe nanga wan wipi (Lukas 19:45, 46; Yohanes 2:14, 15). Wan buku e taki: „Den Evangelietori e sori krin taki [Yesus] ben de wan tranga man di ben gosontu.”—McClintock and Strong’s Cyclopedia, Volume IV, bladzijde 884.
En fesi: Yesus ben abi switifasi èn a ben e firi gi sma. A no de fu taki dati sma ben kan si dati na en fesi (Mateyus 11:28, 29). Ala sortu sma ben kon na en fu feni trowstu nanga yepi (Lukas 5:12, 13; 7:37, 38). Srefi pikin-nengre no ben frede fu go na en.—Mateyus 19:13-15; Markus 9:35-37.
Fowtu denki di sma abi fu Yesus
Fowtu denki: Son sma e taki dati Yesus ben musu gersi den sma fu Afrika fu di a Bijbel buku Openbaring e taki dati en wiwiri ben weti leki katun èn en futu ben de leki „kopro di sma e faya na ini wan onfu”.—Openbaring 1:14, 15, Nyun Testamenti.
Fa a de trutru: A Bijbel buku Openbaring abi „marki” di ben e tyari a boskopu kon na krin (Openbaring 1:1). Te den vers disi e taki san Yesus en wiwiri nanga futu gersi, dan dati e sori go na den fasi fu Yesus baka di a kon na libi baka. Disi no abi fu du nanga a fasi fa a ben de di a ben de na grontapu. Te Openbaring 1:14 e taki dati Yesus en „ede-wiwiri ben weti, iya, den ben weti srefisrefi”, dan a e poti prakseri na a kloru fu den sani dati nomo. Weti wiwiri abi fu du nanga wan sma di abi koni nanga ondrofeni na ini den omeni yari di a de na libi (Openbaring 3:14). Tra vertaling e agersi Yesus ede-wiwiri nanga snew noso nanga katun, ma disi no wani taki dati na so a ben de trutru.
Yesus en futu „ben e brenki neleki soifri kopro di sma e faya na ini wan onfu” (Openbaring 1:15). Boiti dati, en fesi „ben e brenki neleki te son e skèin krin na mindridei” (Openbaring 1:16). Fu di nowan ras abi a skin kloru dati, meki a fisyun disi musu prenki wan sani. A e sori taki Yesus di kisi wan opobaka „e tan na ini wan leti pe sma no man go”.—1 Timoteyus 6:16.
Fowtu denki: Yesus ben swaki èn mangrimangri.
Fa a de trutru: Den sani di Yesus ben du èn a fasi fa ben de, ben sori taki a ben de wan dyadyaman. Fu eksempre, a no ben frede fu taki dati en na Yesus di wan grupu sma kon nanga feti-owru fu grabu en (Yohanes 18:4-8). A musu de so taki Yesus ben tranga fu di a ben gebroiki ala sortu wrokosani te a ben du en wroko leki temreman.—Markus 6:3.
Ma fu san ede wan sma ben musu yepi Yesus fu tyari en pinapostu? Èn fu san ede a dede fosi den tra man di ben kisi dede strafu tu? (Lukas 23:26; Yohanes 19:31-33) Yesus en skin ben kon swaki srefisrefi leti fosi den kiri en. A no ben sribi heri neti fu den broko-ede di a ben abi (Lukas 22:42-44). Na neti, den Dyu ben naki en èn den wipi en. A tra mamanten den Romesma ben pina en tu (Mateyus 26:67, 68; Yohanes 19:1-3). Ala den sani disi ben musu meki taki a dede moro esi.
Fowtu denki: Yesus ben e sari ala ten.
Fa a de trutru: Yesus ben sori den srefi fasi leki en hemel Tata, Yehovah. Bijbel e taki dati Yehovah na „a koloku Gado” (1 Timoteyus 1:11; Yohanes 14:9). Fu taki en leti, Yesus leri trawan fa den kan de koloku trutru (Mateyus 5:3-9; Lukas 11:28). Ala den sani disi e sori dati yu ben kan si na Yesus en fesi taki a ben de koloku èn taki a ben breiti.
Kande yu lobi den tori disi tu
PRENSPARI LERI FU BIJBEL
Fa wi kan de seiker taki Bijbel e taki san tru?
Efu Bijbel e kon fu Gado, dan a no musu de leki den tra buku di sma skrifi.
