Gado wani taki yu leri sabi en èn taki yu tron en mati. A wani taki yu lobi en èn dini en nanga yu heri ati (Mateyus 22:37, 38; Yakobus 4:8). Te yu poti prakseri na a fasi fa Yesus ben e libi èn na den sani di a ben e leri sma, dan yu o kon sabi fa yu kan du a wani fu Gado (Yohanes 7:16, 17). Yesus no ben leri sma nomo san na a wani fu Gado, ma a ben sori dati tu nanga a fasi fa a ben e libi. A ben taki dati a no kon fu ’du san ensrefi wani, ma fu du a wani fu a sma di seni en kon.’​—Yohanes 6:38.

Mi abi wan dren noso wan fisyun fanowdu fu kon sabi san na a wani fu Gado?

 Nôno, fu di ala san Gado wani taki wi sabi, skrifi na ini Bijbel. A e sori wi ala san wi abi fanowdu fu de „srekasreka fu du ibri bun wroko” (2 Timoteyus 3:16, 17). Gado wani taki wi gebroiki Bijbel nanga wi „frustan” fu kon sabi san na a wani fu en.​—Romesma 12:1, 2; Efeisesma 5:17.

Mi o man du a wani fu Gado?

 Iya, seiker. Bijbel e taki: „Den komando fu en no de wan hebi” (1 Yohanes 5:3). Dati no wani taki dati a makriki ala ten fu du san Gado wani. Ma a o go bun nanga yu te yu e du dati. Yesus ben taki: „Koloku fu den sma di e yere a wortu fu Gado èn e du san a wortu e taki.”​—Lukas 11:28.