Di Yesus gi en libi leki frulusu-ofrandi, a frulusu ala libisma di e gi yesi na Gado (Mateyus 20:28). Dati meki Bijbel e kari Yesus a „Frulusuman fu grontapu” (1 Yohanes 4:​14). Bijbel e taki tu: „Nowan tra sma kan gi wi frulusu, bika Gado no gi sma na grontapu nowan enkri tra nen di sa meki wi kisi frulusu.”​—Tori fu den apostel 4:​12.

 Yesus ’dede gi ala sma’ di e sori bribi na ini en (Hebrewsma 2:9; Yohanes 3:​16). Baka dati „Gado gi en wan opobaka” èn Yesus drai go baka na hemel leki wan yeye (Tori fu den apostel 3:​15). Drape Yesus man ’frulusu den sma krinkrin di a e yepi fu kon na fesi Gado, bika a e tan na libi fu ala ten fu taki gi den’.​—Hebrewsma 7:​25.

Fu san ede a de fanowdu taki Yesus e taki gi wi?

 Wi alamala na sondusma (Romesma 3:​23). Sondu de leki wan skotu di de na mindri wi nanga Gado, èn a e meki taki wi e dede (Romesma 6:​23). Ma Yesus de leki „wan yepiman” noso wan afkati gi den sma di e sori bribi na ini a frulusu-ofrandi fu en (1 Yohanes 2:1). Yesus e taki gi den sma dati èn a e aksi Gado fu arki den begi fu den. A e aksi Gado tu fu gi den pardon fu den sondu fu den (Mateyus 1:​21 Romesma 8:​34). Te Yesus e aksi Gado den sani disi, dan Gado e du wan sani fu di disi e kruderi nanga a wani fu en. Gado seni Yesus kon na grontapu „fu meki grontapu kisi frulusu nanga yepi fu en.”​—Yohanes 3:​17.

Na bribi nomo wan sma musu bribi na ini Yesus fu man kisi frulusu?

 Nôno. A tru taki wi musu bribi na ini Yesus fu man kisi frulusu, ma moro de fanowdu (Tori fu den apostel 16:30, 31). Bijbel e taki: „Neleki fa a skin dede te wan sma no e bro moro, na so bribi na wan dede sani te wan sma no e du sani fu sori a bribi fu en” (Yakobus 2:26). Efu wi wani kisi frulusu, dan:

•   Wi musu leri sabi Yesus nanga en Papa Yehovah.​—Yohanes 17:3.

•   Wi musu bribi na ini den.​—Yohanes 12:44; 14:1.

•   Wi e sori bribi te wi e du san den e aksi fu wi (Lukas 6:​46; 1 Yohanes 2:​17). Yesus ben taki dati a no ala sma di ben o kari en „Masra” ben o kisi frulusu, ma soso den sma di „e du a wani fu [en] Tata na hemel”.​—Mateyus 7:​21.

•   Wi musu tan sori bribi, awinsi wi e kisi problema. Yesus ben tyari disi kon na krin di a taki: „A sma di horidoro te na a kaba, na en o kisi frulusu.”​—Mateyus 24:13.