Na ini na artikel disi

•  San na a frantwortu fu wan papa?

•  Fu san ede a frantwortu di wan papa abi na wan spesrutu sani?

•  Papa nanga den umapikin fu den

•  Rai gi papa

•   Fosi yu pikin gebore. Den sani di yu e du leki wan masra nownow kaba e sori sortu papa yu o de bakaten. Wan buku e taki:

   „Te wan uma de nanga bere èn a masra e yepi en bai sani na wenkri, a e tyari en go na datra èn a e si a beibi na ini a bere fu a mama noso a e yere fa na ati fu a beibi e naki, dan wi sabi taki a papa disi o meki moro muiti yepi en patna nanga en beibi baka te a gebore.”​—Do Fathers Matter?

   „Mi no ben wani taki mi frow denki taki na en wawan ben musu tyari a frantwortu fu a beibi na ini en bere. Dati meki mi ben du ala san mi man fu yepi en. Wi ben sreka a beibi kamra makandra srefi. A ben de wan spesrutu ten gi un ala tu fu di wi ben e sreka sani gi a beibi makandra.”​—James.

   San Bijbel e leri wi: „No poti prakseri na un eigi afersi nomo, ma poti prakseri na den afersi fu trawan.”​—Filipisma 2:4.

•   Baka te yu pikin gebore. Te yu e prei nanga yu beibi èn yu e hori en, dan a lobi di unu e firi gi makandra o kon moro tranga. Yu nanga yu frow musu teki a frantwortu fu sorgu gi a beibi. Te yu leki papa e yepi sorgu yu pikin, dan a o gro moro bun. Te yu e du san yu man fu meki a lobi di yu e firi gi yu pikin kon moro tranga, dan yu e sori taki a pikin prenspari gi yu trutru.

   „Lolo na gron nanga yu pikin. Prei nanga en. Du lawlaw sani nanga en. No teki sani tumusi seryusu. No frigiti taki unu leki papa nanga mama na den fosi sma pe a pikin o leri san na lobi.”​—Richard.

   San Bijbel e leri wi: „Pikin na gudu di Yehovah gi yu. Den pikin di e komoto na ini yu bere na wan blesi fu en.”​—Psalm 127:3.

•   Te yu pikin e gro kon bigi. Sabiman kon si taki te wan papa de wan bun mati fu en pikin, dan den pikin disi e du en moro bun na skoro. Den no e meki sani bruya den èn a no e pasa so esi taki den e gebroiki drugs noso taki den e du ogri. Teki ten fu tron wan bun mati fu yu pikin.

   „Di mi boi froisi, a taigi mi taki san a ben o misi moro na den takimakandra di wi ben abi te wi ben de na ini oto e rèi noso te wi ben e sidon nyan na tafra. Son leisi wi ben abi moi takimakandra na wan ten di wi srefi no ben fruwakti. Na fu di wi ben de so furu nanga makandra, meki wi ben man taki so furu.”​—Dennis.

   San Bijbel e leri wi: „Luku bun taki unu no waka leki don sma, ma leki koni sma. Un musu gebroiki a ten fu unu na wan koni fasi.”​—Efeisesma 5:15, 16.

 Furu sma feni taki a papa na a wan di musu wroko moni fu sorgu na osofamiri èn taki na en musu sorgu taki ogri no e miti den. Na a tra sei den feni taki wan mama ati safu moro èn fu dati ede a moro makelek gi en fu sabi san a musu du fu meki en osofamiri firi bun (Deuteronomium 1:31; Yesaya 49:15). Na ini son osofamiri a e pasa taki wan mama e du den sani di wan papa musu du, noso a papa e du den sani di wan mama musu du. Ma sabiman taki dati a papa nanga a mama musu du san de fanowdu fu kweki den pikin fu den. a

 Judith Wallerstein, wan uma di ondrosuku furu sani fu na osofamiri-libi, fruteri san kon pasa nanga en wan leisi. A taki: „Di a meisje fu mi ben abi twarfu yari, wagi naki en. A ben wani en papa kon nanga en na ini a ambulance fu di a ben feni taki a papa ben o man yepi en moro bun te dati ben o de fanowdu. Ma baka ten, di a ben de na ini ati-oso kaba, a ben wani mi sidon sei a bedi heri dei nanga en fu trowstu en.” b

 „Te wan mama de en wawan, dan kande a muilek gi en fu meki en osofamiri e firi korostu noso fu sorgu taki ogri no e miti den, ma gi wan papa a no hebi so. Ma a moro makelek gi wan mama fu sori en pikin taki a lobi en èn taki sabi fa a e firi, fu di a e arki den nanga pasensi. Dus a papa nanga a mama musu wroko makandra fu sorgu na osofamiri.”​—Daniel.

 San Bijbel e leri wi: „Mi manpikin, gi yesi na a leri di yu papa e gi yu èn no drai baka gi a wèt fu yu mama” (Odo 1:8).

 Yu leki papa musu leri yu umapikin san a musu du fu meki mansma lespeki en. A kan leri disi na tu fasi:

•   A e si fa yu e libi nanga en mama. Te yu lobi yu frow èn yu e lespeki en, dan yu umapikin e si san musu prenspari gi en te a gro kon bigi. Te a o suku wan masra, a o sabi sortu fasi a wani taki a masra disi musu abi.​—1 Petrus 3:7.

•   A e si fa yu e libi nanga en. Te yu e sori lespeki gi yu umapikin, dan yu e leri en fu lespeki ensrefi. A e leri tu taki na so tra mansma taki musu sori lespeki gi en.

   Ma te yu e krutukrutu yu umapikin ala ten baka, dan a kan lasi lespeki gi ensrefi èn kande a o du sani fu meki tra man poti prakseri na en. Èn wi sabi taki den sortu man disi no o suku a bun fu en.

   „Te wan papa lobi en meisje èn a e yepi en, dan a no o pasa so esi taki a o kon lobi wan man di no o de wan bun masra gi en.”​—Wayne.