Na heri grontapu politiek e tyari pratifasi kon. Na ini 2022 sma ben ondrosuku a sani disi (2022 Pew Research Center). Den kon si taki, „65% fu den bigisma na ini 19 kondre taki dati na ini den kondre furu haritaki noso bigi trobi de na mindri sma fu difrenti politiek partij.”

 Yu srefi si taki politiek e tyari pratifasi kon na a presi pe yu e tan? Fu san ede disi de so? Wan lusu de fu a problema disi? Luku san Bijbel e taki.

 Bijbel e kari a ten fu wi „den lasti dei”. A ben taki na fesi dati sma na ini „den lasti dei” ben o abi son denki noso maniri di ben o meki en muilek fu abi wánfasi.

•   „Na ini den lasti dei muilek ten o de di tranga fu pasa, bika sma o lobi densrefi nomo. . . . Den no o wani meki kruderi.”​—2 Timoteyus 3:1-3.

 Furu sma e du muiti fu tiri den kondre bun, ma toku den no man du dati. Sma di abi tra denki e feni en muilek fu wroko makandra fu lusu den problema fu a kondre, èn son leisi den no man wroko makandra srefisrefi. Fu dati ede wi e si now san Bijbel ben taki na fesi langa ten kaba.

•   „Sensi di libisma bigin tiri tra libisma, sani no waka bun gi den.”​—Preikiman 8:9.

 Ma Bijbel e taki tu fa a problema disi o lusu. A e taki fu wan regering ondro a tiri fu wan sma di man puru ala den problema di e meki taki libisma e pina now.

 Bijbel e taki dati a tiriman di man lusu ala den problema fu wi, na Yesus Krestes. Yesus abi a makti, a krakti èn a winsi fu tyari wánfasi nanga freide kon gi ala sma.

•   „Te en e tiri, den reti-ati sma o de leki grun grasi di e opo kon. Freide o de pasa marki.”​—Psalm 72:7.

•   „Ala den pipel fu grontapu o dini en.”​—Psalm 72:11.

 Yesus na a moro bun tiriman, fu di a e broko en ede nanga libisma èn a wani yepi ala sma, spesrutu den wan di trawan e pina.

•   „A o frulusu den pôti sma di e bari suku yepi, Sosrefi ala den mofina sma nanga iniwan sma di no abi yepiman. A o firi sari gi den mofina sma èn gi den pôti sma Èn a o frulusu den pôti sma. A o kibri den libi, so taki sma no man kwinsi den moro noso du ogri-ati sani nanga den.”​—Psalm 72:12-14.

 Wi e gi yu a deki-ati fu kon sabi moro fu Gado Kownukondre. Dati na a regering na hemel di Yesus e tiri. Kon sabi san a regering disi kan du gi yu èn fa yu kan horibaka gi en.

•   Luku a felem San na Gado Kownukondre?

•   Leisi na artikel „Gado Kownukondre​—Wan tirimakti di no kruka.”