Na heri grontapu sma e du bigi ogri fu di den wani kenki sani na politiek sei.

•   Sma kiri 39 politiekman na a pisi ten fu a verkiezing fu 2023-2024 na ini Meksikow. Noiti ete den ben kiri so furu politiekman na a ten fu verkiezing. Boiti dati, sma du wan lo tra ogri tu fu di den wani taki sani kenki na politiek sei.

•   No so langa psa, sma du wan lo ogri na Europa fu di den wani taki sani kenki na politiek sei èn den pruberi fu kiri a minister-presidenti fu Slowakia tapu 15 mei 2024 sosrefi.

•   Tapu 15 september 2024, furu sma na Amerkankondre skreki di wan sma pruberi fu kiri Donald Trump di ben de presidenti fosi. Èn dati ben de a di fu tu leisi di a sori leki wan sma pruberi fu kiri en.

 Fu san ede sma e du so furu ogri fu kan kenki sani na politiek sei? Wan ten o kon pe disi no o psa moro? San Bijbel e taki?

 Bijbel ben taki na fesi dati na ini a ten disi di Gado Wortu e kari „den lasti dei”, furu sma ben o firi fu du ogri èn den no ben o agri nanga makandra.

•   „Na ini den lasti dei muilek ten o de di tranga fu pasa, bika sma . . . no o de nanga tangi. . . . Den no o wani meki kruderi. . . . Den o du ogri-ati sani. . . . Den o tori trawan. Den o du san densrefi wani. Den o abi bigimemre.”​—2 Timoteyus 3:1-4.

 Bijbel taki tu dati na ini a ten disi dyugudyugu ben o de fu di sma opo densrefi teige tiriman èn fu di furu bruya de na politiek sei (Lukas 21:9). Ma wan ten o kon taki sma no o du ogri moro na politiek sei èn pratifasi no o de moro.

 Bijbel e taki dati Gado o puru ala libisma regering èn na presi fu dati a o poti en eigi regering di de na hemel.

•   „A Gado fu hemel o seti wan kownukondre di . . . o broko ala den [tra] kownukondre disi pisipisi èn a o tyari wan kaba kon na den. A kownukondre srefi o tan fu têgo.”​—Danièl 2:44.

 Gado Kownukondre o tyari pipel kon na wán èn a o meki taki freide de na heri grontapu.

•   Yesus Krestes, di Bijbel e kari „Granman fu Freide” na a Tiriman fu a Kownukondre. En o sorgu taki „ala ten sani o waka bun”.​—Yesaya 9:6, 7.

•   Den sma di a Kownukondre disi e tiri e leri nownow kba fa fu libi na ini freide. San na a bakapisi? Bijbel taki: „Den o naki den feti-owru kon tron plugu èn den lansri o tron grasinefi. Nowan pipel o teki feti-owru fu go feti nanga wan tra pipel èn den no o leri fu feti moro.”​—Yesaya 2:3, 4.

 Efu yu wani leri moro fu a tori disi, dan leisi na artikel di nen „San Gado Kownukondre o du?” èn luku a felem di nen San na Gado Kownukondre?