„No so langa pasa wi no ben denki taki wi ben o gebroiki sani leki JW Library so furu.” Yu srefi ben denki so tu? Na dati Brada Geoffrey Jackson ben taki na ini Update nr. 6 fu a Tiri Skin 2020. A ben taki tu: „Ma now a situwâsi kenki. Wi e aksi wisrefi: ’Fa wi ben o du efu wi no ben abi den sani disi?’ Na ini den yari di pasa Yehovah sreka wi gi situwâsi leki a wan disi.”

 Ma fa Yehovah sreka wi dan? San den brada ben musu du fu seti a JW Library app, san den musu du fu meki a tan wroko bun, èn san den musu du fu meki en kon moro bun?

 Na ini mei 2013, a Tiri Skin aksi na afdeling MEPS Programming na a edekantoro fu meki wan app di ben o abi a nyun Ingrisitongo Nyun-Grontapuvertaling Bijbel na ini. Brada Paul Willies di e wroko nanga MEPS Programming taki: „Fosi a ten dati wi no ben abi nowan app na den app store. Ma wi seti wan team, wi stop nanga wan tu tra sani di wi ben e du, dan wi bigin wroko makandra nanga wan tu tra afdeling fu seti na app nanga den sani di ben musu kon na ini. Wi begi furu tron èn nanga a yepi fu Yehovah wi ben man tyari na app kon na doro na a alayari konmakandra sowan feifi mun baka di wi bigin!”

 Baka dati den brada ben musu luku fa den ben o poti moro sani ini na app èn fa den ben kan seti en fu wroko nanga moro tongo. Na ini yanuari 2015 furu fu den nyun buku fu wi ben de ini na app na ini Ingrisitongo èn baka siksi mun nomo sma ben kan download den buku disi na ini hondrohondro tra tongo tu.

 Sensi a ten dati den brada poti omeni sani fu meki na app wroko moro bun. Den poti difrenti felem na ini èn den poti ala buku, felem nanga tra sani gi den konmakandra na wán presi. Den brada sorgu tu taki na son vers na ini a Bijbel yu kan go langalanga na a Ondrosuku Bijbel-buku fu luku artikel di e fruteri moro fu a vers dati.

 Sowan 8 milyun sma e opo JW Library tapu den computer, cel noso tablet ibri dei èn moro leki 15 milyun sma e du dati ibri mun! Fa den brada e sorgu taki na app disi tan wroko bun? Brada Willies taki: „Eigenlijk noiti yu e kaba seti wan app. Doronomo wi e poti nyun sani na ini na app èn wi e kenki son sani fu meki en moro makelek gi den sma fu gebroiki en. Fu di a fasi fa den computer, cel nanga tablet e wroko e kenki doronomo, meki wi musu kenki na app doronomo tu so taki a kan wroko nanga den sani disi. Boiti dati wi musu sorgu taki a JW Library app tan wroko bun èn taki a man teki ala den buku nanga felem di wi e kisi doronomo.” Te yu teri ala sani na ini den difrenti tongo na ini a JW Library app, dan a de sowan 200.000 buku èn moro leki 600.000 felem, poku nanga tra sani fu arki!

 Ma a no computer wawan de fanowdu fu meki na app disi wroko bun. Wi musu pai tu gi son computer programa. Wan fu den nomo e kostu 1500 Amerkan dala wan yari kaba. Boiti dati MEPS Programming e gebroiki sowan 10.000 Amerkan dala ibri yari gi den computer nanga tra sani di den e gebroiki fu luku efu app o wroko bun tapu den moro nyun computer, tablet nanga cel.

 Fu di wi abi a JW Library app, meki wi no e gebroiki so furu moni moro fu meki buku èn fu seni den go na difrenti presi na grontapu. Fu eksempre, wi ben meki sowan 12 milyun fu a buku Ondrosuku den Buku fu Bijbel ala dei​—2013. Ma gi 2020, wi meki sowan 5 milyun fu den buku disi nomo aladi a nomru fu preikiman ben kon de sowan 700.000 sma moro furu na heri grontapu. Fa a du kon taki wi no ben abi fu druk so furu fu a buku disi? Furu brada nanga sisa fu wi e leisi a deitekst na ini JW Library now. a

 JW Library e yepi sma na ala sortu fasi. Geneviève di e libi na ini Kanada taki dati na app disi meki a kon kisi a gwenti fu studeri Bijbel. A taki: „Mi o taigi yu eerlijk, efu ibri leisi mi ben o abi fu teki wan lo buku fu studeri, mi no denki taki mi ben o man studeri Bijbel ibri mamanten yèrè. Ma now di mi abi na app, mi e teki mi tablet èn ala sani di mi abi fanowdu de leti drape. Fu di mi man studeri doronomo, meki mi bribi kon moro tranga èn Yehovah tron wan moro bun mati fu mi.”

 Spesrutu na ini a COVID-19 situwâsi na app disi na wan bigi yepi. Charlyn fu Amerkankondre taki: „Moro leki wán yari mi no hori wan fu den nyun buku fu na organisâsi na ini mi anu. Ma toku JW Library gi wi ala san wi abi fanowdu fu tranga wi bribi èn mi e taki Yehovah tangi taki a sorgu wi na so wan lobi-ati fasi.”

 Faye di e libi na den Filippijnen taki san furu fu wi e denki tu. A taki: „Mi e gebroiki a kefalek app disi fu tan krosibei fu Yehovah. Disi na a fosi sani di mi e leisi te mi e opo mamanten. Na disi mi e arki te mi e wroko. Na disi mi e gebroiki fu sreka gi den konmakandra. Na disi mi e gebroiki fu sreka gi mi Bijbelstudie. Te mi abi ten mi e luku den felem. Te mi musu wakti na wan presi, mi e leisi den artikel noso Bijbel. Mi lobi en srefisrefi!”

 Na app disi na wan bigi yepi na ini a preikiwroko tu. Wan leisi di wan sisa na ini Kamerun ben de na ini a preikiwroko, a ben wani gebroiki wan tekst di wan tra sisa ben gebroiki wan tu wiki pasa. Ma a no ben man memre pe a tekst ben skrifi. A sisa taki: „Koloku taki mi ben memre wan pisi fu a tekst. Mi opo na app, mi go na a Bijbel, dan mi suku a pisi di mi ben sabi. Wantewante mi feni a tekst. Nanga na app mi man feni wan lo tekst di mi e frigiti son leisi.”

 Den bijdrage di unu e gi nanga un heri ati na donate.dan124.com meki taki wi ben man meki a JW Library app, wi man sorgu taki a e tan wroko bun, èn wi man sorgu taki nyun sani e kon na ini na app gi den brada nanga sisa fu wi na heri grontapu. Grantangi fu den bijdrage di unu e gi.

1. Oktober 2013​—Den tyari a JW Library app kon na doro di ben abi a nyun Ingrisitongo Nyun-Grontapuvertaling Bijbel na ini

2. Yanuari 2015​—Den poti tra buku na ini Ingrisitongo èn baka dati den poti buku tu na ini hondrohondro tra tongo

3. November 2015​—Sma man poti marki na ini den buku

4. Mei 2016​—Den poti ala sani gi den konmakandra na wán presi

5. Mei 2017​—Sma man skrifi sani na ini na app

6. December 2017​—Den poti moro sani na ini a Studiebijbel

7. Maart 2019​—Sma man download poku nanga tra sani fu arki, den man stream den felem, èn den brada poti artikel fu na Ondrosuku Bijbel-buku na ini na app

8. Yanuari 2021​—Den poti felem nanga tra sani na ini a Koloku fu têgo!-buku