Esekièl 10:1-22
10 Na tapu a plata sani di ben de na tapusei fu den kerub-engel, mi si wan sani di ben gersi wan kownusturu fu safir-ston.
2 Dan Gado taki nanga a man di ben weri linnen krosi. A taigi en: „Go na mindri den wiel di e drai, na ondro den kerub-engel. Teki tu anu fu a krofaya di e bron na mindri den kerub-engel. Dan yu musu trowe en na tapu a foto.” Ne mi si fa a go na inisei.
3 Di a man go na inisei, den kerub-engel ben tanapu na a reti-anusei fu a tempel èn a wolku ben furu a heri pikin tempel-dyari.
4 Dan a glori fu Yehovah komoto na den kerub-engel èn a go na a doromofo fu a tempel. Safrisafri a wolku furu a heri tempel èn a heri fesidyari ben brenki nanga a glori fu Yehovah.
5 A babari di den frei fu den kerub-engel ben e meki, ben de fu yere srefi na a bigi dyari. A ben de neleki te na Almakti Gado e taki.
6 Di Gado taigi a man di ben weri linnen krosi fu teki faya na mindri den wiel di e drai èn di de na mindri den kerub-engel, a man go na inisei èn a go tanapu na sei a wiel.
7 Dan wan fu den kerub-engel langa en anu fu teki a faya di ben de na mindri den kerub-engel èn a poti en na ini den anu fu a man di ben weri linnen krosi. A man teki en èn a go na dorosei.
8 Ne mi si wan sani di ben gersi na anu fu wan libisma na ondro den frei fu den kerub-engel.
9 Dan mi si fo wiel na sei den kerub-engel. Wán wiel ben de na sei ibri kerub-engel. Den wiel ben e brenki leki krisolit-ston.
10 Ala den fo wiel ben de a srefi. A ben gersi leki wan wiel ben de na mindri fu wan tra wiel.
11 Te den ben e gowe, den ben kan go na iniwan sei pe den ben wani go. Den no ben abi fu drai fu go na wan tra sei, bika den ben go na a sei pe a fesi fu den kerub-engel ben sori go. Den no ben drai fu go na wan tra sei.
12 Na den heri skin, den baka, den anu, den frei èn na ala den wiel, ai ben de. Na sei ibriwan fu den, wan wiel ben de.
13 Mi yere wan sten e taigi den wiel: „Un bigin go!”
14 Ibriwan fu den ben abi fo fesi. A fosiwan ben de a fesi fu wan kerub-engel, a di fu tu ben de a fesi fu wan libisma. A di fu dri ben de a fesi fu wan lew èn a di fu fo ben de a fesi fu wan aka.
15 Den kerub-engel ben e opo ibri tron baka. Den ben de den srefi libisani di mi si na Kebar-liba.
16 Te den kerub-engel ben gowe, den wiel di ben de na den sei, ben gowe tu. Te den kerub-engel ben opo den frei fu den fu frei go na loktu, dan den wiel di ben de na den sei, no ben go na wan tra sei.
17 Te den libisani ben tan tanapu, den wiel ben tan tanapu tu. Te den libisani ben opo go na loktu, den wiel ben opo go na loktu tu, bika a yeye di ben de na ini den libisani, ben de na ini den wiel tu.
18 A glori fu Yehovah komoto na a doromofo fu a tempel èn a tan tanapu na tapusei fu den kerub-engel.
19 Dan den kerub-engel opo den frei èn leti na mi fesi den opo go na loktu. Di den gowe, den wiel ben de leti na den sei. Den go tanapu na a owstusei portu fu a tempel fu Yehovah èn a glori fu a Gado fu Israel ben de na tapusei fu den.
20 Na den libisani disi mi si na Kebar-liba, na ondro a kownusturu fu a Gado fu Israel. Mi ben sabi taki den ben de kerub-engel.
21 Ibriwan fu den fo libisani ben abi fo fesi èn ibriwan fu den ben abi fo frei. Na ondro den frei, sani ben de di ben gersi den anu fu wan libisma.
22 Den fesi fu den ben gersi den fesi fu den libisani di mi ben si na Kebar-liba. Iya, den ben gersi den srefisrefi. Ibriwan fu den kerub-engel ben gowe langalanga.
