Deuteronomium 14:1-29
14 Unu na manpikin fu Yehovah un Gado. Te wan sma dede, un no musu koti un skin èn un no musu krebi un fesi-ede.
2 Bika Yehovah un Gado e si unu leki wan santa pipel. Yehovah teki unu fu tron en pipel, wan spesrutu gudu na mindri ala tra pipel di de na grontapu.
3 Un no musu nyan nowan sani di no krin.
4 Disi na den sortu meti di unu kan nyan: kaw, skapu, krabita,
5 difrenti sortu dia,* èn krabita nanga skapu di unu no e kweki leki osometi.
6 Unu kan nyan ibri meti di abi ondrofutu* di prati krinkrin na tu èn di e kaw en nyanyan baka.
7 Ma un no musu nyan sonwan fu den meti di e kaw den nyanyan baka noso di abi ondrofutu di prati krinkrin na tu. Un no musu nyan a kameili, a hei, nanga a bergi-konikoni,* bika den meti disi e kaw den nyanyan baka, ma den ondrofutu no prati na tu. Gi unu, den meti disi no krin.
8 Un no musu nyan agu tu, bika na ondrofutu fu den prati na tu, ma den no e kaw den nyanyan baka. Gi unu, den meti disi no krin. Un no musu nyan den meti disi kwetikweti, èn un no musu fasi a dedeskin fu den.
9 Fu ala den meti di e libi na ini watra, unu kan nyan den wan disi: Ala meti di abi fisimaka nanga fisibuba unu kan nyan.
10 Un no musu nyan nowan meti di no abi fisimaka nanga fisibuba. Gi unu, den meti disi no krin.
11 Unu kan nyan ibri fowru di krin.
12 Ma un no musu nyan den fowru disi: a bigi aka, a fisi-aka, a blaka tingifowru,
13 a redi aka, a blaka aka, nanga tra sortu aka,
14 ala sortu bigi blaka fowru,
15 a stroisifowru, na owrukuku, a sedoifi, ala sortu pikin aka,
16 a pikin owrukuku, a langayesi owrukuku, a bigi gansi,
17 a pelikaan-fowru, a tingifowru, a fisiman-fowru,
18 a nengrekopu, ala sortu sabaku, a hop-fowru, nanga a fremusu.
19 Gi unu, ala pikin meti di e frei na ini bigi grupu no krin. Un no musu nyan den.
20 Unu kan nyan ibri krin meti di e frei.
21 Un no musu nyan nowan meti te a dede kaba, bika unu na wan santa pipel gi Yehovah un Gado. Unu kan gi a meti na wan trakondre sma di e libi na ini un foto èn a kan nyan en. Noso un kan seri a meti gi wan trakondre sma.
Un no musu bori wan pikin krabita na ini a merki fu en mama.
22 Ibri yari te unu koti a nyanyan na den gron, dan un musu puru wan di fu tin pisi fu ala a nyanyan èn poti dati aparti.
23 Na so unu musu du nanga un aleisi, un nyun win, un oli, èn a fosi pikin fu un kaw nanga skapu. Na a presi di Yehovah un Gado o sori unu, sobun a presi di o tyari en nen, na drape un musu tyari den sani disi. Na drape un musu nyan noso dringi den sani disi. Dan unu o leri fu lespeki Yehovah un Gado ala ten.
24 Kon meki wi taki dati a presi pe Yehovah un Gado taigi unu fu kari en nen, de bun fara. Efu Yehovah un Gado blesi unu nanga so furu sani taki unu no man tyari ala sani go drape,
25 dan un musu seri den. Poti a moni na ini wan saka, dan un tyari en go na a presi di Yehovah un Gado o sori unu.
26 Boiti dati, un musu tyari a moni fu bai iniwan sani di unu lostu fu nyan noso dringi, sani soleki kaw, skapu, krabita, win noso iniwan tra sani di abi sopi na ini, nanga iniwan tra sani di unu abi fanowdu. Te un de drape, dan unu nanga un osofamiri musu nyan èn meki prisiri na fesi Yehovah un Gado.
27 Unu musu memre den Leifisma, bika den no o kisi wan pisi fu a kondre èn den no o kisi wan famirigudu neleki unu.
28 Na a kaba fu ibri dri yari un musu teki wan di fu tin pisi fu ala nyanyan di unu koti na ini a yari dati, èn un musu tyari en go poti na ini un foto.
29 Dan un musu kari son sma na ini a foto fu kon nyan teleki den bere furu. Kari sma soleki den Leifisma di no o kisi wan pisi fu a kondre èn di no o kisi wan famirigudu neleki unu, den trakondre sma di e tan na un mindri, den pikin di no abi papa, nanga den uma di den masra dede. Te unu du dati, dan Yehovah un Gado o blesi ala sani di unu o du.
Futuwortu
^ Na ini a Hebrew tekst difrenti sortu dia kari dyaso. Na ini Bakratongo den dia disi nen hert, gazelle, reebok, antilope, nanga gems.
^ Bakratongo: „klipdas.”
