Gi den Hebrewsma 4:1-16
4 We, wan pramisi de ete taki wi kan rostu leki Gado. Dati meki wi musu luku bun taki nowan fu unu lasi a grani fu rostu na a fasi dati,
2 bika sma preiki a bun nyunsu gi wi tu, neleki fa sma ben preiki a bun nyunsu gi den afo fu wi. Ma den no ben feni wini fu a sani di den yere, fu di den no ben abi a srefi bribi leki den wan di ben arki a bun nyunsu,
3 bika wi di e bribi, o rostu na a fasi dati, ma fu den trawan Gado taki: „Na ini mi atibron mi ben sweri: ’Den no o rostu leki mi.’” Gado ben taki disi, aladi a ben klari en wroko sensi a ten di grontapu seti,
4 bika wan presi de na ini Gado Buku pe a taki fu a di fu seibi dei: „Na a di fu seibi dei Gado rostu fu ala en wroko”.
5 Na a srefi presi dati, a e taki tu: „Den no o rostu leki mi.”
6 Den fosi sma di ben yere a bun nyunsu no ben rostu na a fasi dati, fu di den ben trangayesi Gado. Ma son sma de ete di kan rostu na a fasi dati.
7 Dati meki a poti ete wan tra dei, bika baka wan heri pisi ten a e taki na ini a psalm fu David: „Tide.” A de soleki fa ben taki na fesi kaba: „Te unu e arki en sten tide, dan un no musu meki un ati kon tranga”,
8 bika efu Yosua ben tyari den go na wan presi pe den ben kan rostu, dan bakaten Gado no ben o taki fu wan tra dei.
9 Sobun, a pipel fu Gado o feni rostu ete, neleki fa sma ben e rostu na tapu a Sabat-dei,
10 bika a sma di e rostu leki Gado, e rostu sosrefi fu en eigi wroko, neleki fa Gado e rostu fu en eigi wroko.
11 Sobun, meki wi du ala muiti fu kan rostu na a fasi dati, so taki nowan fu wi teki a srefi gwenti fu trangayesi Gado,
12 bika a wortu fu Gado de na libi. A abi krakti èn a srapu moro iniwan feti-owru di e koti na tu sei. A e koti go so dipi, taki a e tyari kon na krin fa wan sma de na inisei* èn fa a de na dorosei.* A e prati bonyo* nanga bonyofatu fu makandra. A man si krin san wan sma e denki na ini en ati èn san a abi na prakseri fu du.
13 Nowan fu den sani di Gado meki na sani di a no man si. Ma a sma di wi musu gi frantwortu, e si ala sani krin èn nowan sani kibri gi en.
14 We, now wi abi wan bigi granpriester di go na ini hemel. Dati na Yesus, a Manpikin fu Gado. Dati meki wi musu tan fruteri sma taki wi e bribi na ini en,
15 bika wi no abi wan granpriester di no man frustan den swakifasi fu wi. Ma wi abi wan granpriester di no ben abi sondu èn di kisi tesi na ala fasi neleki wi.
16 Sobun, meki wi go na fesi a kownusturu fu Gado di e sori wi bun-ati èn meki wi taki nanga en sondro fu frede, so taki a kan abi sari-ati nanga wi èn a kan sori wi bun-ati fu yepi wi na a yoisti ten.
Futuwortu
^ Griki wortu: pneima. Luku „Moro sani”, nr. 9.
^ Griki wortu: psuke. Luku „Moro sani”, nr. 8.
^ Grikitongo: „den skrufu fu den bonyo.”
