Lukas e fruteri 15:1-32
15 We, ala den sma di e teki belasting-moni gi lanti, nanga den sondari, tan kon na Yesus fu yere san a ben e taki.
2 Dati meki den Fariseiman nanga den leriman fu Wèt ben e krutukrutu. Den taki: „A man disi e kari sondari kon èn a e nyan nanga den.”
3 Ne Yesus fruteri den na agersitori disi:
4 „Suma fu unu di abi wán hondro skapu èn di lasi wan fu den, no sa libi den tra neigitenti na neigi skapu na a sabana fu go suku a lasi skapu teleki a feni en?
5 Te a feni a skapu, a e poti en na tapu en skowru èn a e prisiri.
6 Te a kon na oso, dan a e kari mati nanga birtisma kon èn a e taigi den: ’Un prisiri nanga mi, bika mi feni a skapu fu mi di ben lasi.’
7 Mi e taigi unu taki moro prisiri o de na hemel te wán sondari abi berow, leki te neigitenti na neigi reti-ati sma no abi fu sori berow.
8 Sosrefi, sortu uma di abi tin solfru moni,* ma di lasi wan fu den, no sa leti wan lampu èn sibi en oso fu suku finifini teleki a feni en?
9 Te a feni en, a e kari den mati nanga den birtisma fu en kon èn a e taki: ’Un prisiri nanga mi, bika mi feni a solfru moni di mi ben lasi.’
10 Fu dati ede mi e taigi unu taki den engel fu Gado e prisiri te wán sondari abi berow.”
11 Baka dati a taki: „Wan man ben abi tu manpikin.
12 A moro yonguwan fu den taigi en papa: ’Mi papa, gi mi a pisi fu a gudu di mi musu kisi.’ Ne a papa prati a gudu fu en gi den manpikin.
13 Wan tu dei baka dati, a moro yonguwan teki ala en sani, dan a go na wan farawe kondre èn drape a frumorsu en gudu, fu di a ben libi wan yayolibi.
14 Di a frumorsu ala sani, wan hebi angriten kon na ini a heri kondre dati èn a bigin pina.
15 A go wroko srefi gi wan sma fu a kondre dati. A sma seni en go luku agu na ini den gron fu en.
16 Angri ben kiri en so te, taki a ben lostu a nyanyan fu den agu srefi, ma nowan sma ben gi en wan sani.
17 Di a kisi ensrefi, a taki: ’Den wrokoman fu mi papa abi brede pasa marki, dan mi e dede dyaso fu angri!
18 Mi o go na mi papa èn mi o taigi en: „Mi papa, mi sondu teige hemel èn teige yu.
19 Mi no warti moro fu yu kari mi yu manpikin. Meki mi tron leki wan fu den wrokoman fu yu.”’
20 Dati meki a opo go na en papa. A ben de fara fu oso ete, di en papa si en. Ne a papa firi sari, a lon go brasa en boi èn a gi en wan switi bosi.
21 Dan a manpikin taigi en: ’Mi papa, mi sondu teige hemel èn teige yu. Mi no warti moro fu yu kari mi yu manpikin. Meki mi tron leki wan fu den wrokoman fu yu.’
22 Ma a papa taigi den srafu fu en: ’Esi-esi, go teki wan langa krosi, a moro bunwan, dan un weri disi gi en. Poti wan linga na en finga èn susu na en futu.
23 Tyari a fatu yongu mankaw kon èn srakti en. Meki wi nyan èn meki prisiri,
24 bika a boi fu mi disi ben dede, ma a kon na libi baka. A ben lasi, ma mi feni en baka.’ Ne den bigin meki prisiri.
25 Disiten a moro bigi manpikin fu en ben de na ini a gron. Di a ben e kon na oso, a yere poku e prei èn sma ben e dansi.
26 Dati meki a kari wan fu den futuboi kon èn a aksi en san e pasa.
27 A futuboi taigi en: ’Yu brada kon èn yu papa srakti a fatu yongu mankaw, fu di yu brada kon baka na yu papa èn a de gosontu.’
28 Ne a moro bigi manpikin ati bron èn a no ben wani go na inisei. Dan en papa kon na dorosei èn a begi en fu kon na inisei.
29 A taigi en papa: ’Someni yari kaba mi dini yu leki srafu èn noiti mi trangayesi yu, ma noiti ete yu gi mi wan pikin krabita so taki mi nanga den mati fu mi ben kan meki prisiri.
30 Ma di a manpikin fu yu disi doro, baka di a nyan den gudu fu yu kaba nanga huru-uma, dan yu lon go srakti a fatu yongu mankaw gi en.’
31 Ne a papa taigi en: ’Mi pikin, yu ben de nanga mi ala ten èn ala sani fu mi na fu yu.
32 Ma wi musu breiti èn prisiri, bika yu brada ben dede, ma a kon na libi baka. A ben lasi, ma wi feni en baka.’”
Futuwortu
^ Griki wortu: drakmo. Luku „Moro sani”, nr. 15.
