Markus e fruteri 4:1-41
4 Baka dati, a bigin gi leri baka na sekanti. Wan heri ipi sma ben kon na en. Dati meki a go sidon na ini wan boto na tapu a se, ma ala den sma ben de na a syoro.
2 Na so a bigin fruteri agersitori fu leri den furu sani. Disi na san a taigi den:
3 „Un arki. Wan saiman ben go sai siri.
4 Di a ben e sai, wan tu siri fadon na seipasi èn den fowru kon nyan den.
5 Tra siri fadon na tapu ston-gron èn a no de fu taki dati furu doti no ben de. Sobun, den siri opo wantewante, fu di den no ben de dipi na ini a gron.
6 Ma di son opo, a bron den pransun. Fu di den no ben abi rutu, meki den kon drei èn den dede.
7 Tra siri fadon na mindri den makabon. Di den makabon gro kon, den kiri den. Dati meki den no ben gi froktu.
8 Ma tra siri fadon na tapu bun doti. Di den gro kon moro bigi, den bigin gi froktu. A wan gi dritenti tron so furu froktu, a trawan siksitenti tron so furu, èn ete wan trawan wán hondro tron so furu.”
9 Baka dati Yesus taki: „A sma di abi yesi fu arki, meki a arki.”
10 Di a ben de en wawan, dan wan tu sma nanga den twarfu apostel kon na en èn den bigin aksi en sani di abi fu du nanga den agersitori.
11 Dati meki a taigi den: „Na unu kisi a grani fu kon frustan a santa kibritori fu Gado Kownukondre. Ma den tra sma e yere soso agersitori.
12 Dati meki den e luku, ma den no e si, èn den e yere, ma den no e frustan san a wani taki. Den no o drai kon baka srefi fu kisi pardon fu sondu.”
13 A taigi den tu: „Efu unu no e frustan na agersitori disi, dan fa unu o frustan ala den tra agersitori?
14 A saiman e sai a wortu.
15 A siri di fadon na seipasi na a wortu di sai na ini den sma di yere en. Ma te den yere a wortu, dan wantewante Satan e kon èn a e puru a wortu di ben sai na ini den.
16 Sosrefi, yu abi sma di de leki den siri di sai na tapu ston-gron. Te den yere a wortu, dan den e teki en wantewante nanga prisiri.
17 Ma a wortu no e teki rutu na ini den ati. Fu dati ede den e tan wan pisi ten nomo. Ma te banawtu kon noso te sma e frufolgu den fu a wortu ede, dan den e fadon wantewante.
18 Trawan sai na mindri den makabon. Den na den sma di yere a wortu,
19 ma den broko-ede fu a grontapu disi, a bedrigifasi fu gudu, nanga a wani di sma wani tra sani tu, e kon na ini den ati. Dati e kiri a wortu èn a no kan meki froktu.
20 Den siri di sai na tapu bun doti, na den sma di e arki a wortu èn di e teki en nanga prisiri. Dan den e gi dritenti tron so furu froktu, siksitenti tron so furu, nanga wán hondro tron so furu.”
21 Baka dati a taigi den: „Wan sma no e poti wan lampu na ondro wan baskita noso na ondro wan bedi, a no so? Ma a e poti a lampu na tapu wan hei presi, a no so?
22 Sobun, nowan sani kibri so, taki a no sa kon na krin. Ala sani di ai no man si, sa kon de fu si.
23 A sma di abi yesi fu arki, meki a arki.”
24 A taigi den tu: „Arki bun san unu e yere. Na a fasi fa unu e libi nanga trawan, na a fasi dati den o libi nanga unu tu, iya, den o du moro leki dati srefi.
25 A sma di abi kaba, sa kisi moro. Ma a sma di no abi, o lasi srefi den sani di a abi.”
26 Ne a taki moro fara: „Yu kan taki dati a Kownukondre fu Gado de neleki te wan man e trowe siri na tapu a gron.
27 Te neti a man e sribi èn na deiten a e opo. A siri e gro teleki a kon bigi, ma a man no sabi fa dati pasa.
28 Safrisafri a gron e gi nyanyan fu ensrefi. Fosi, a pransun e opo kon, dan a e gi nyanyan èn te fu kaba a nyanyan e kon lepi.
29 Ma te a nyanyan lepi kaba, dan a man e koti en nanga wan grasinefi, bika kotiten doro kaba.”
30 Yesus taki tu: „Nanga san wi sa agersi a Kownukondre fu Gado, noso nanga sortu agersitori wi sa tyari kon na krin san na a Kownukondre?
31 A de leki wan mosterd-siri di de a moro pikin siri na grontapu te den e sai en na ini a gron.
32 Ma te a sai kaba, a e bigin gro èn a e bigi moro ala den tra gruntubon. A bon e kisi bigi taki èn den fowru di e frei na loktu man feni wan tanpresi na ini a skaduw fu a bon.”
33 Na so Yesus gebroiki furu fu den agersitori disi fu fruteri den sma a wortu, solanga den ben man frustan en.
34 Iya, a no ben taki nanga den sondro fu gi wan agersitori. Ma te en nanga den disipel fu en ben de den wawan, dan a ben tyari ala sani kon na krin gi den.
35 A srefi dei dati, di neti ben doro kaba, a taigi den: „Kon meki wi abra go na a tra sei fu a se.”
36 Fu dati ede den seni den sma gowe èn wantewante den tyari Yesus gowe nanga a boto pe a ben sidon na ini kaba. Tra boto ben de tu nanga en.
37 Ne wán kefalek bigi winti bigin wai èn den skwala ben naki kon na ini a boto, so taki a boto ben e kon furu nanga watra.
38 Ma Yesus ben de na bakasei fu a boto èn a ben didon sribi nanga en ede na tapu wan kunsu. Dati meki den wiki en èn den aksi en: „Leriman, yu no e broko yu ede taki wi o sungu?”
39 Di a yere dati, a opo, dan a bari a winti èn a taigi a se: „Tapu! Tan tiri!” Dan a winti saka èn ala sani kon tiri.
40 Baka dati a taigi den: „Fu san ede unu e frede so? Un no abi bribi ete?”
41 Ma den ben frede srefisrefi èn den taigi makandra: „Suma na a sma disi? Srefi a winti nanga a se e du san a e taki.”
