Mateyus e fruteri 10:1-42
10 Dati meki a kari den twarfu disipel fu en kon èn a gi den makti fu yagi ogri yeye puru na sma tapu èn fu dresi ibri sortu siki nanga ibri sortu mankeri.
2 Disi na den nen fu den twarfu apostel: A fosiwan na Simon di sma sabi tu leki Petrus. Dan yu abi en brada Andreas, nanga den tu brada Yakobus nanga Yohanes di ben de manpikin fu Sebedeyus.
3 Sosrefi Filipus, Bartolomeyus, Tomas, Mateyus di ben abi a wroko fu teki belasting-moni gi lanti, Yakobus di ben de a manpikin fu Alfeyus, Tadeyus,
4 Simon di ben de wan fayafaya man, nanga Yudas Iskariot di ben tori Yesus bakaten.
5 Yesus seni den twarfu man disi go preiki èn a taigi den: „No go na a kontren fu den trakondre sma èn no go na wan foto na ini Samaria.
6 Na presi fu dati, un musu go soso na den lasi skapu fu Israel.
7 Te unu e go preiki, dan un musu taki: ’A Kownukondre fu hemel kon krosibei kaba.’
8 Meki siki sma kon betre, gi dede sma wan opobaka, meki gwasiman kon krin, yagi den ogri yeye puru na sma tapu. Unu kisi sondro fu pai, sobun un musu gi sma sondro fu meki den pai.
9 No go suku gowtu, solfru, noso kopro fu poti na ini un monisaka na un seibere.
10 No go suku wan nyanyan-saka fu te unu de na pasi èn no suku tu krosi, susu, noso wan tiki, bika a wrokoman warti fu kisi a nyanyan fu en.
11 Awansi na ini sortu foto noso dorpu unu e go, suku suma warti fu teki unu na ini oso èn fu yere a boskopu, dan un tan drape teleki unu gowe.
12 Te unu e go na ini na oso, taki den sma na ini na oso odi.
13 Efu den e teki unu na ini oso, dan un musu blesi den. Ma efu den no e teki unu na ini oso, dan na unu o kisi a blesi.
14 Efu wan presi de pe sma no kari unu kon na inisei noso den no arki san unu taki, dan un musu komoto na ini na oso noso a foto dati èn un musu naki a doti puru na un futu.
15 Fu tru, mi e taigi unu: Na tapu a Krutudei a o moro hebi gi a foto dati, leki gi Sodom nanga Gomora.
16 Luku, mi e seni unu go leki skapu na mindri busidagu. Fu dati ede un musu luku bun leki sneki, ma toku un musu de leki doifi di no e du ogri.
17 Luku bun nanga sma, bika den o tyari unu go na krutu èn den o wipi unu na ini den snoga fu den.
18 Iya, fu mi ede, den o tyari unu go na fesi granman nanga kownu, so taki unu kan preiki gi den èn gi den trakondre sma.
19 Te den e tyari unu go drape, un no musu broko un ede fa unu o taki noso san unu o taki. Na a ten dati unu o sabi san un musu taki,
20 bika a no unu srefi o taki, ma a Tata o gi unu krakti so taki unu o sabi san fu taki.
21 Dan wan brada o tyari en eigi brada go kiri èn wan papa o du a srefi nanga en pikin. Pikin o opo densrefi teige den papa nanga mama èn den o meki sma kiri den.
22 Fu mi nen ede, sma o teige unu. Ma a sma di horidoro te na a kaba, o kisi frulusu.
23 Te den e frufolgu unu na ini a wan foto, dan lowe go na wan tra foto. Bika mi e taigi unu, unu no o kaba preiki na ala den foto fu Israel, fosi a Manpikin fu libisma doro.
24 Wan disipel no bigi moro en leriman èn wan srafu no bigi moro en masra.
25 A bun kaba te wan disipel e tron leki en leriman èn te wan srafu e tron leki en masra. Efu sma e taki dati a masra fu na oso na Beyelsebub, dan den o taki dati fu na osofamiri tu, a no so?
26 Fu dati ede, no frede den. Bika ibri sani di kibri sa kon na krin èn sma sa kon sabi ibri kibritori.
27 San mi e taigi unu wawan, na dati un musu fruteri ala sma. San mi taigi unu safri na ini un yesi, na dati un musu preiki na tapu den daki fu den oso.
28 No frede den sma di kan meki a skin kisi pori, ma di no kan tapu yu fu kisi libi* baka. Na presi fu dati yu musu frede a sma di kan kiri yu na ini Gehena.*
29 Sma e seri tu pikin fowru gi wan sensi di no warti furu, a no so? Ma toku nowan fu den fowru o fadon na gron sondro fu un Tata sabi.
30 A Tata teri srefi ala den wiwiri na tapu un ede.
31 Fu dati ede no frede, bika unu warti moro leki wan heri ipi pikin fowru.
32 Efu wan sma e taigi trawan taki mi nanga en na wán, dan mi o taigi mi Tata na hemel taki mi nanga a sma dati na wán.
33 Ma efu wan sma e taigi trawan taki a no sabi mi, dan mi o taigi mi Tata na hemel tu taki mi no sabi a sma dati.
34 No prakseri taki mi kon fu tyari freide na grontapu. Mi no kon fu tyari freide, ma mi kon fu tyari wan feti-owru.
35 Bika mi kon fu tyari trobi na mindri wan man nanga en papa, na mindri wan umapikin nanga en mama, èn na mindri wan yongu wefi nanga a mama fu en masra.
36 Iya, wan sma sa abi feanti na ini en eigi osofamiri.
37 A sma di lobi en papa, noso en mama moro mi, no warti fu de mi disipel. A sma di lobi en manpikin, noso en umapikin moro mi, no warti fu de mi disipel.
38 A sma di no wani teki en pinapostu èn di no e waka na mi baka, no warti fu de mi disipel.
39 Bika a sma di wani kibri en libi, sa lasi en. Ma a sma di lasi en libi fu mi ede, o feni en.
40 A sma di e teki unu, e teki mi tu èn a sma di e teki mi, e teki a sma di seni mi kon.
41 A sma di e teki wan profeiti fu di a de wan profeiti, o kisi a pai fu wan profeiti. A sma di e teki wan reti-ati sma fu di a de wan reti-ati sma, o kisi a pai fu wan reti-ati sma.
42 Efu wan sma e gi wan fu den pikinwan disi soso wan kan kowru watra fu dringi fu di en na wan disipel, mi e taigi unu fu tru, a o kisi en pai.”
