Psalm 73:1-28
Wan singi fu Asaf.
73 Fu tru, Gado e du bun gi Israel, iya, gi den sma di ati krin.
2 Ma mi, bijna mi kmoto na a reti pasi.Bijna mi grati fadon.
3 Bika mi ben kon dyarusu tapu den sma di abi bigifasi.*Mi ben e dyarusu di mi si a switi libi fu den ogrisma.
4 Den sma disi no e pina fosi den dede.Den e nyan bun èn den gosontu.*
5 Den no abi brok’ede leki tra smaèn den no e pina leki fa tra sma e pina.
6 Dati meki bigifasi kon de leki wan keti na den neki.Ogridu kon de leki wan krosi na den skin.
7 Den fatu so te, taki den ai e pusu kon na doro.Den kon abi moro leki san den ben dren fu kisi.
8 Den e spotu sma èn na soso ogri sani den e taki.
Den e meki bigi fa den o pina sma.
9 Den e dyaf fu di den denki taki den hei leki hemel.Den e waka lontu na grontapu e taki ala sortu sani nanga den mofo.
10 Dati meki a pipel fu Gado e waka baka den ogrisma disièn den ogrisma e kanti bun furu watra gi den fu dringi.
11 Den e taki: „Fa a kan taki Gado sabi san e psa?
A tru taki a Moro Heiwan sabi ala sani?”
12 Na so a libi fu den ogrisma de kba. Noiti den abi brok’ede.
Den e tan suku moro gudu.
13 Na fu soso mi du muiti fu abi wan krin ati.Na fu soso mi wasi mi anu fu sori taki mi no du nowan ogri.
14 Heri dei a sani disi ben e moro mi.Ibri m’manten baka Gado ben e pir’ai gi mi.
15 Ma efu mi ben o taki fu den sani disi,dan mi no ben o du bun nanga a pipel fu yu.
16 Mi ben pruberi fu ferstan a sani disi,ma a ben muilek gi mi.
17 Ma di mi go na ini a moi santa presi fu Gado,mi kon sabi fa sani ben o waka nanga den bakaten.
18 Yu meki den tnapu na wan grati presi.
Yu o meki den fadon, iya, yu o meki taki den no de moro.
19 Fosi yu denki den no o de moro!
Fosi yu denki ogri o miti den èn den o dede!
20 Yehovah, leki wan dren di wan sma e fergiti te a wiki,na so yu o fergiti* den tu te yu wiki.
21 Mi ben kon abi bita-ati.Te na ini mi ati* mi firi pen.
22 Mi no ben man denki krin moro èn mi no ben man ferstan san ben e psa.Gi yu mi ben kon de leki wan meti di no abi ferstan.
23 Ma now mi e fertrow yu ala ten.Yu grabu mi hori na mi ret’anu.
24 Yu e gi mi rai fu sori mi fa mi musu waka.Bakaten yu o meki mi kisi glori.
25 Suma na ini hemel kan yepi mi, boiti yu?
Boiti yu, nowan tra sani na grontapu e gi mi prisiri.
26 Awinsi mi heri skin nanga mi ati kon swaki, tòg mi o fertrow tapu Gado nanga mi heri ati.En na mi stonbergi èn fu ala ten en na a gudu fu mi.
27 Den sma di e hori yu na feanti o dede gwe.
Yu o kiri iniwan sma di e drai baka gi yu.
28 Ma a bun gi mi fu kon krosbei na Gado.
A Moro Hei Masra Yehovah tron mi kibripresi.Dati meki mi o ferteri sma ala san a du.
Futuwortu
^ Noso: „sma di e dyaf”.
^ Noso: „Den bere fatu”.
^ Hebrewtongo: „wiswasi”.
^ Hebrewtongo: „niri”.
